გუშინ, საქართველოს ეროვნული გუნდისა და „ნაპოლის“ თავდამსხმელი ხვიჩა კვარაცხელია იტალიურ მასმედიაში კვლავ მთავარი სასაუბრო თემა გახლდათ.
ახლო წარსულში ცნობილმა იტალიელმა თავდამსხმელმა კრისტიან ვიერიმ „Bobo TV“-ის ეთერში ხვიჩა კვარაცხელიაზე ისაუბრა:
„სპალეტი რაღაცებს უბრალოდ არ ლაპარაკობს. როდესაც მან თქვა, რომ კვარამ მარადონას დონის გოლი გაიტანა და კიმი მსოფლიოში საუკეთესო მცველია, ამას მიზეზი ექნება. კვარაცხელიას გოლი სიგიჟეა. ის „მანჩესტერ იუნაიტედში“ რომ გადავიდეს, ჯორჯ ბესტის დროს დააბრუნებს. მოუთმენლად ველოდები „აინტრახტთან“ ჩემპიონთა ლიგის მატჩს. ნახეთ, რა თქვა ფაუზი გულამმა? ჯუნტოლიმ უთხრა მას, რომ ფენომენი ნახა და კვარაცხელიაზე ესაუბრა. ასე რომ, ჯუნტოლი უნდა შევაქოთ, ის ძალიან კარგად მუშაობს“.
„ნაპოლის“ ყოფილმა ფეხბურთელმა ემანუელე კალაიომ ხვიჩა კვარაცხელიასთვის 10 ნომრის გადაცემაზე ილაპარაკა:
„როგორც ანტი-იუვენტინო, ვისურვებდი, რომ ჩემპიონობა 23 აპრილს, ტურინში თამაშით გავინაღდოთ, ეს ცუდი სულაც არ იქნება. ჩემზე რომ იყოს, ამ დღეს ავირჩევდი. თუმცა, 7 მაისს, „ფიორენტინას“ წინააღმდეგაც კარგი იქნება, რადგან მატჩი ნეაპოლშია. იმედი მაქვს, რომ „ნაპოლი“ მალე გაიფორმებს ჩემპიონობას, რომ ჩემპიონთა ლიგაზე სრულად კონცენტრაცია შეძლოს.
კვარაცხელიას 10 ნომერი? ჩემს მეგობარ პამპა სოსას ეცვა ეს მაისური, ასე რომ, ერთხელ კვარამაც შეიძლება ჩაიცვას. ის მარადონას შემდეგ „ნაპოლის“ ისტორიაში ყველაზე ნიჭიერი ფეხბურთელია“.
ვეტერანმა იტალიელმა ფეხბურთელმა ანტონიო კასანომ ხვიჩა კვარაცხელიათი აღტაცება კიდევ ერთხელ არ დამალა.
„კვარაცხელია ჩემთვის მსოფლიოს საუკეთესო მარცხენა გარემარბია. ის კომანზე ძლიერია, გრილიშზე ძლიერია, „ბარსელონას“ ძირითად შემადგენლობაში მშვიდად, უპრობლემოდ ითამაშებდა. დღეისთვის კვარაცხელია ფენომენალური ფეხბურთელია. მინდა, ვნახო, ჩემპიონთა ლიგაზე მისი სტაბილური თამაში და მომდევნო სეზონში როგორ ითამაშებს, მაგრამ წელს ისეთი რაღაცეები გვაჩვენა, რაც ლოგიკაში არ ჯდება. კვარაცხელია რაფაელ ლეაუზე ბევრად ძლიერია, მან უფრო მეტი რაღაცის გაკეთება იცის, რომ „მილანის“ ფეხბურთელმა“.
გუშინ, გამოცემამ „Todofichajes“ გაავრცელა ცნობა, რომ გიორგი მამარდაშვილის მადრიდის „ატლეტიკოში“ გადასვლა გადაწყვეტილია იმ შემთხვევაში, თუკი ამ გუნდს მთავარი მეკარე იან ობლაკი დატოვებს.
„თუკი იან ობლაკი ბოლოს და ბოლოს არჩევანს პრემიერლიგაზე გააკეთებს, „ატლეტიკოს“ წინასწარ აქვს გადაწყვეტილი, ვინ შეცვლის სლოვენიელ მეკარეს ჩოლო სიმეონეს გუნდში. ეს გიორგი მამარდაშვილია.
საქართველოს ნაკრების მეკარემ თავი წარმოაჩინა, როგორც თანამედროვეობის ერთ-ერთმა ყველაზე სრულყოფილმა გოლკიპერმა. აღარაფერს ვამბობთ იმაზე, რომ ამ სეზონში ის „ვალენსიას“ მთავარი იმედია.
„ვალენსია“, უფრო ზუსტად კი მისი მფლობელი პიტერ ლიმი, ხელიდან არ გაუშვებს შანსს, ისარგებლოს ქართველის ტრანსფერით, რომელიც ხელში იაფად ჩაიგდო და რომელიც ბოლო პერიოდის ერთ-ერთ ყველაზე სარფიან გასხვისებად შეიძლება იქცეს.
მამარდაშვილმა, რომელიც მეკარისთვის საკმაოდ ძვირად, 25 მილიონ ევროდ ფასდება, შესაძლოა ობლაკი შეცვალოს. თანაც, ქართველი სულ 22 წლისაა, რაც იმას ნიშნავს, რომ მასზე ფსონის ჩასვლა მომდევნო ათწლეულის განმავლობაში შეიძლება. რა თქმა უნდა, ეს იმ შემთხვევაში, თუკი სლოვენიელი მადრიდს დაემშვიდობება და ინგლისში გაემგზავრება“.
ევრო 2024-ის შესარჩევი ეტაპის პირველ ტურში საქართველოს ეროვნული გუნდი ნორვეგიის ნაკრებს 28 მარტს, ბათუმში დაუპირისპირდება.
გუშინ ნორვეგიელთა მთავარმა მწვრთნელმა სტალე სოლბაკენმა დაასახელა შემადგენლობა, რომლითაც ნორვეგია ესპანეთისა (25 მარტს) და საქართველოს ნაკრებებს (28 მარტი) დაუპირისპირდება.
განაცხადში არიან ნორვეგიელთა მთავარი ვარსკლავები: ერლინგ ჰაალანდი და მარტინ ოდეგორი. გარდა ამისა, შემადგენლობაშია ხვიჩა კვარაცხელიას თანაგუნდელი „ნაპოლიდან“, ლეო ოსტიგორი და ზურიკო დავითაშვილის თანაგუნდელი „ბორდოდან“, სტიან გრეგერსენი.
გუშინ გამოცემამ „The Athletic“ საინტერესო ინფორმაცია გამოაქვეყნა.
2026 წლის მუნდიალი, რომელიც აშშ-ში, მექსიკასა და კანადაში გაიმართება, ისტორიაში უდიდესი იქნება. მასში მონაწილეობას 48 გუნდი მიიღებს და არა 32, როგორც ადრე იყო. ეს მსოფლიო ჩემპიონატი ისტორიაში ყველაზე ხანგრძლივი გამოვა: 39 დღეს გასტანს, რომელიც 104 მატჩს მოიცავს.
ფიფას თავდაპირველი იდეა 16 სამგუნდა ჯგუფისგან შემდგარი ტურნირი გახლდათ, რომელთაგან ორ-ორი საუკეთესო „ფლეი-ოფში“ გავიდოდა. ეს ფორმატი ნიშნავდა 80 მატჩს, 16-ით მეტს, ვიდრე ახლანდელია.
თუმცა, სამგუნდიან ჯგუფებს აქვს მნიშვნელოვანი ნაკლი: ბოლო ტურის მღელვარების დაკარგვა და იმის ალბათობის გაზრდა, რომ ბოლო მატჩში ორი გუნდი ერთმანეთს სასურველ შედეგზე შეუთანხმდება.
ახალ ფორმატის მიხედვით, 12 ოთხგუნდა ჯგუფი შეიქმნება. გამარჯვებულ 2-2 გუნდს ასევე საუკეთესო რვა მესამედგილოსანიც დაემატება და ფლეი ოფის გათამაშებაში 32 გუნდი მიიღებს მონაწილეობას.
ავტორი
