გუშინ, საქართველოს ნაკრებისა და „ნაპოლის“ თავდამსხმელი ხვიჩა კვარაცხელია ლონდონის „არსენალს“ დაუკავშირეს.
გამოცემა „Footballtransfers.com“- ის მტკიცებით, ლონდონელები ეცდებიან, რომ „ნაპოლის“ სპორტულ დირექტორ მაურო მელუზოსთან კარგი ურთიერთობა გამოიყენონ და კვარას ტრანსფერი თავის სასარგებლოდ გადაწყვიტონ.
მელუზო ადრე „სპეციაში“ მუშაობდა, რა დროსაც მან ხელი შეუწყო „არსენალს“ იაკუბ კივიორის ტრანსფერზე მოლაპარაკებებში. ლონდონელები იმედოვნებენ, რომ მელუზოსთან გარიგებას ამჯერადაც შეძლებენ. თუმცა, ხვიჩას ნეაპოლური კლუბიდან წასვლის შანსი მცირეა.
ცნობილმა ბრიტანელმა ჟურნალისტმა ბენ ჯეიკობსმა კი ხვიჩა კვარაცხელიას „მანჩესტერ სიტიში“ შესაძლო ტრანსფერზე ილაპარაკა.
„გვარდიოლას სურვილის შემთხვევაში, „მანჩესტერ სიტი“ კვარაცხელიას შეძენას შეძლებს, კლუბს ამისი ფინანსური რესურსი გააჩნია, მათ ხომ რამდენიმე კვირის წინ დეკლან რაისის სანაცვლოდ 90-მილიონიანი შეთავაზება გააკეთეს. თუმცა გარიგების განხორციელება რთული იქნება, რადგან ამ ეტაპზე „ნაპოლის“ ქართველის გასხვისება არ სურს.
ქართველს ნეაპოლელები „კვარადონას“ ეძახიან, ისინი კვარაცხელიას მარადონასთან აიგივებენ, რაც მის სათამაშო დონეზე მეტყველებს. ხვიჩას არა მხოლოდ „მანჩესტერ სიტის“, არამედ „ნიუკასლსაც“ უკავშირებენ. მიუხედავად ამისა, ამ ზაფხულს კვარაცხელიას პრემიერლიგაში გადაბარგება ნაკლებად სავარაუდოა, თუმცა, თუ ეს მოხდა, ძალიან მომგებიანი იქნება“, – განაცხადა ბენ ჯეიკობსმა.
გუშინ, ვიქტორ ოსიმენის აგენტი რობერტო კალენდა კასტელ დი სანგროში ჩავიდა, სადაც „ნაპოლი“ წინასასეზონო შეკრებაზე იმყოფება.
იტალიური მედიის მტკიცებით, მისი იქ ყოფნის მიზეზი ახალი კონტრაქტია, რომლის თაობაზე აურელიო დე ლაურენტისს შეხვდება. „ნაპოლი“ ნიგერიელს სეზონში შვიდ მილიონ ევროს და ხელშეკრულების 2027 წლამდე განახლებას სთავაზობს.
მხარეები პრაქტიკულად შეთანხმებული არიან და უახლოეს ხანში ინფორმაცია ოფიციალურად უნდა დადასტურდეს.
გამოცემა „WSport“-ის ინფორმაციით, „ნაპოლის“ შემტევი ირვინ ლოსანო კარიერას „ლოს ანჯელესში“ გააგრძელებს. საინტერესოა, რომ მანამდე მექსიკელმა ფეხბურთელმა არაბულ კლუბს, ასევე „ლიდს იუნაიტედს“, „სტოკ სიტისა“ და „ევერტონს“ უარი განუცხადა.
მალე ამერიკელები „ნაპოლის“ ოფიციალური წინადადებით მიმართავენ. თავად 28 წლის ფეხბურთელს ქალაქ ნეაპოლის დატოვება და კარიერის MLS-ში გაგრძელება სურს.
ლოსანო „ნაპოლის“ 2019 წელს ნიდერლანდების „პსვ“-დან 42 მილიონი ევროს სანაცვლოდ შეუერთდა.
საქართველოს ნაკრებისა და „მეცის“ თავდამსხმელი გიორგი მიქაუტაძე ესპანური „კადისის“ დაინტერესების წყარო გახდა.
ესპანელებმა ქართველი შემტევის შესახებ ინფორმაცია გამოითხოვეს. ცხადია, მისი ფასიც მათთვის ცნობილია, რამაც ინტერესი გაანელა, მაგრამ 22 წლის ფეხბურთელი „კადისის“ დღის წესრიგში რჩება.
ამავდროულად ფრანგული მედია ამტკიცებს, რომ „მეცმა“ უარით გაისტუმრა რომის „ლაციო“, რომელიც 15 მილიონ ევროს იხდიდა. ფრანგების პოზიცია ურყევია – გიორგის 20 მილიონ ევროდ აფასებენ.
დღეს, ლიეტუვის საკალათბურთო ნაკრები საქართველოს უძლიერესი შემადგენლობით დაუხვდება და ეს პირველი შემთხვევა იქნება, როდესაც მსოფლიოს ჩემპიონატისთვის მზადების ციკლში ბალტიისპირელები მოედანზე საუკეთესო მოთამაშეებით გავლენ.
ლიეტუვა – საქართველოს ამხანაგური დაპირისპირება კაუნასში, თბილისის დროით 20:30 საათზე დაიწყება და როგორც ლიეტუვის კალათბურთის ფედერაცია აანონსებს, საქმეში ეროვნული ნაკრების კაპიტანს იონას ვალანჩუნასსაც ვიხილავთ.
ავტორი
