გუშინ ცნობილი გახდა, რომ „ნაპოლისა“ და საქართველოს ნაკრების თავდამსხმელი ხვიჩა კვარაცხელია იტალიურ „ტრანსფერმარკეტზე“ ნოემბერში ყველაზე მეტჯერ მოძებნადი ფეხბურთელი გახდა.
ტრავმის გამო ნოემბერში ქართველს თითქმის არ უთამაშია, მაგრამ გულშემატკივრებს ყველაზე მეტად მაინც ხვიჩა აინტერესებდათ.
3-4 დეკემბერს ძიუდოში სეზონის ერთ-ერთი მნიშვნელოვანი ტურნირი გაიმართება – ტოკიოს „დიდი მუზარადი“. მასში 61 ქვეყნის 351 ფალავანია დარეგისტრირებული – 205 ვაჟი და 146 ქალი.
ტოკიოში საქართველო შედარებით მცირე გუნდით იქნება წარმოდგენილი: აქცენტი უფრო ქალთა ტურნირზეა გადატანილი, თუმცა იქაც მხოლოდ ხუთი მონაწილე გვეყოლება. ვაჟებში მხოლოდ ოლიმპიური და ევროპის ჩემპიონი ლაშა ბექაური იჭიდავებს, ვინც პერსონალურადაა მიწვეული ორგანიზატორთა მიერ.
რაც შეეხება ქალთა გუნდის შემადგენლობას. ტოკიოში ეთერ ლიპარტელიანი, ნინო ლოლაძე (ორივე – 57), ეთერ ასკილაშვილი (63), ნინო გულბანი (70) და სოფიო სომხიშვილი (+78) იჭიდავებენ. ამათგან, უფროსთა ნაკრებში მხოლოდ ლიპარტელიანი და სომხიშვილი გამოდიან, სხვები კი ჯერაც ახალგაზრდული ან სულაც ჭაბუკთა ნაკრების წევრები არიან.
საქართველოს ძალოსანთა ნაკრები კი უძლიერესი შემადგენლობით მიიღებს მონაწილეობას მსოფლიოს 2022 წლის ჩემპიონატში, რომელსაც 5-16 დეკემბერს კოლუმბიის დედაქალაქი ბოგოტა უმასპინძლებს.
ძალოსნობის საერთაშორისო ფედერაციის ვებ-გვერდზე უკვე გამოჩნდა ტურნირის განაცხადი, რომელშიც საქართველოს ვაჟთა ნაკრების 12 წევრი ფიგურირებს. ესენი არიან:
რამინ შამილიშვილი (55 კგ.), შოთა მიშველიძე, გოდერძი ბერდელიძე (ორივე – 61 კგ.), გურამ გიორბელიძე (67 კგ,), კახი ასანიძე (73 კგ.), რევაზ დავითაძე (89 კგ.), ირაკლი გობეჯიშვილი (96 კგ.), ირაკლი ჩხეიძე (102 კგ.), გიორგი ჩხეიძე, ზაზა ლომთაძე (ორივე – 109 კგ.), ლაშა ტალახაძე (+109 კგ.). სარეზერვო სიაშია კიდევ ერთი მძიმეწონოსანი აკაკი ტალახაძე.
საქართველოს ნაკრებს წარმომადგენელი მხოლოდ ერთ – 81 კგ-მდე წონით კატეგორიაში არ ეყოლება. მთავარი ყურადღება რასაკვირველია ლაშა ტალახაძის მიმართ იქნება მიპყრობილი. ქართველ ზედიზედ ხუთი მსოფლიოს ჩემპიონატი აქვს მოგებული და ბოგოტაშიც უმთავრესი ფავორიტი იქნება.
შარშან მსოფლიოს პირველობას უზბეკეთის დედაქალაქმა ტაშკენტმა უმასპინძლა და ტალახაძის გარდა, კვარცხლბეკზე ასვლა კიდევ ორმა ქართველმა ძალოსანმა მოახერხა: ვერცხლის მედალს დაეუფლა შოთა მიშველიძე (61 კგ.), ბრინჯაო კი რევაზ დავითაძემ (89 კგ.) აიღო.
გუშინ, რაგბში, „შემოდგომის სერიების“ ოფიციალურმა ვებ-გვერდმა ნოემბრის ტესტების შედეგების მიხედვით სანაკრებო რეიტინგი გამოაქვეყნა და მასში საქართველოს მორაგბეთა ეროვნულ გუნდი მე-11 ადგილზე აღმოჩნდა.
საქართველოს ეროვნული გუნდი კლასიფიკაციაში მხოლოდ „ექვსი ერისა“ (ირლანდია, საფრანგეთი, ინგლისი, უელსი, შოტლანდია, იტალია) და „ოთხი ერის“ (ახალი ზელანდია, სამხრეთ აფრიკა, ავსტრალია, არგენტინა) წარმომადგენლებს ჩამორჩება.
„ეს საქართველოს ნაკრებისთვის ისტორიული წელი იყო. მათ პირველად მოუგეს იტალიასა და უელსს, დავით ნინიაშვილის სახით კი პლანეტის ერთ-ერთი ყველაზე დიდი ტალანტი ჰყავთ. ისინი უელსს 2023 წლის მსოფლიო თასზეც შეხვდებიან, სადაც მეტოქეებად ავსტრალია, ფიჯი და პორტუგალიაც ეყოლებათ და უდავოა, რომ როგორც მინიმუმ მე-3 ადგილისთვის იბრძოლებენ. ეს მათ შემდეგი მსოფლიო თასის ავტომატურ კვალიფიკაციას მოუტანთ, იქნებ კი, საერთოდაც ისტორიაში პირველი მეოთხედ ფინალისთვისაც იბრძოლონ, რისთვისაც ჯგუფში მე-2 პოზიციის დაკავება იქნება საჭირო“, – დაწერა „შემოდგომის სერიების“ ოფიციალურმა ვებგვერდმა.
გუშინ, გამოცემამ „Record“ გაავრცელა ცნობა, რომ „მანჩესტერ იუნაიტედის“ ნახევარმცველმა ბრუნო ფერნანდეშმა შესაძლოა, კარიერა მადრიდის „რეალში“ განაგრძოს.
მადრიდული გუნდი პორტუგალიელი ფეხბურთელის დამატებითაა დაინტერესებული და მომავალი წლის ზაფხულში მის გადაბირებას სერიოზულად შეეცდება.
ავტორი
