დღეს, ხვიჩა კვარაცხელიას „ნაპოლი“, იტალიის პირველობის მორიგ შეხვედრაში სტუმრად „სალერნიტანას“ დაუპირისპირდება.
რამდენიმე დღის წინ გავრცელდა ცნობა, რომ ქართველი შემტევი გაცივებული გახლდათ და კლუბთან ერთად არ ვარჯიშობდა. იყო საშიშროებაც რომ დღევანდელი მატჩის გამოტოვება მოუხდებოდა.
სამწუხაროდ ეს ვარაუდი გამართლდა. ლუჩანო სპალეტიმ მატჩისწინა პრესკონფერენციაზე დაადასტურა, რომ კვარაცხელია „სალერნიტანასთან“ ვერ ითამაშებს, რადგან გუნდსქალაქ სალერნოში საერთოდ არ გაჰყვება.
„სალერნოში ჩვენთან ერთად არ მოდის, სახლში დარჩება. სიცხე არ აქვს, მაგრამ წუხელ კარგად არ იყო, ექიმმა წამლები უნდა მისცეს. ამიტომ, სჯობს არ გავრისკოთ“, – განაცხადა ლუჩანო სპალეტიმ.
გუშინ, იტალიურ მასმედიას ნეაპოლური გუნდის შემტევი ვიქტორ ოსიმენი ესაუბრა და ხვიჩა კვარაცხელიას კარგი თამაში განსაკუთრებულად გამოყო:
„კვარაცხელია ერთ-ერთი ყველაზე ნიჭიერი ფეხბურთელია, წარმოუდგენელია. მას უნიკალური ტექნიკური შესაძლებლობები აქვს, მაგრამ რასაკვირველია, ვერ დავივიწყებ სხვა ტექნიკურ ძლიერ ფეხბურთელებს, ვისთან ერთადაც მითამაშია, როგორებიცაა ლორენცო ინსინიე და დრის მერტენსი, ისინიც ტექნიკურად ძალიან ძლიერები იყვნენ, მაგრამ კვარაცხელია ჯერ კიდევ ახალგაზრდაა და მიუხედავად ამისა, დაამტკიცა, რომ გუნდისთვის ფუნდამენტურია.
ქართველი იმსახურებს ყველა იმ აღიარებას, რაც აქვს და კიდევ უკეთესს ვუსურვებ, რადგან ეს მისთვის მხოლოდ დასაწყისია. მოედანზე ერთმანეთს ვეხმარებით, ის ძალიან ბევრ გადაცემას მაძლევს და ერთად ძალიან კარგად ვთამაშობთ, ეს ორივესთვის მნიშვნელოვანია.
„იუვენტუსთან“ დაუვიწყარი საღამო იყო. ჩემთვის დიდი ბედნიერებაა გახარებული ფანების დანახვა და ყველაზე ლამაზი სწორედ ის იყო, რომ მატჩის დასრულების შემდეგ გახარებული ხალხი დავინახე. მიზანი სეზონში? ჩემპიონობა არ არის ერთადერთი მიზანი, რომელიც ამ სეზონში გვაქვს“, – განაცხადა ვიქტორ ოსიმენმა.
გუშინ, ბრაზილიელი ფეხბურთელი დანი ალვეში ესპანეთის პოლიციამ დააკავა. 39 წლის მცველი სექსუალური შევიწროების ბრალდებით სასამართლოში პოლიციის მანქანით გადაიყვანეს და მოსამართლემ უნდა გადაწყვიტოს, გაუშვებს თუ არა, „ბარსელონას“ ყოფილ ფეხბურთელს ციხეში.
ალვეშს ერთ-ერთი ქალბატონი სექსუალურ შევიწროებაში ადანაშაულებს და ამბობს, რომ ფეხბურთელი მას სხეულის ინტიმურ ადგილებზე ეხებოდა. სავარაუდო შემთხვევა 30 დეკემბერს, ღამის კლუბში მოხდა, ხოლო პოლიციაში საჩივარი გოგონამ 2 იანვარს შეიტანა.
დანი ალვეში ამჟამად მექსიკური „პუმასის“ ფეხბურთელია.
ბრაზილიის ფეხბურთის კონფედერაცია იმედს არ კარგავს, რომ ქვეყნის ეროვნული ნაკრების მთავარი მწვრთნელის თანამდებობაზე იტალიელ ფეხბურთის სპეციალისტს კარლო ანჩელოტის დანიშნავს, ამ საქმეში კი რონალდოს დახმარებას გეგმავს.
ბრაზილიური ფეხბურთის ხელმძღვანელობა ახლო მომავალში აპირებს ესპანეთში ჩავიდეს და პირადად ეცადოს მადრიდის „რეალის“ ამჟამინდელი მთავარი მწვრთნელის გადაბირებას.
კარლო ანჩელოტის „რეალთან“ ხელშეკრულება 2024 წლის ზაფხულამდე აკავშირებს
რამდენიმე დღის წინ ანჩელოტის წარმომადგენლებმა განაცხადეს, რომ მზად არიან ბრაზილიელთა შეთავაზება განიხილონ. გარიგებაში შესაძლოა დიდი როლი ითამაშოს ბრაზილიის ნაკრების ყოფილმა ვარსკვლავმა რონალდომ, რომელსაც იტალიელ მწვრთნელთან კარგი ურთიერთობა აქვს.
63 წლის ანჩელოტიმ „რეალი“ 2021 წლის ზაფხულში ჩაიბარა და გასულ სეზონში ესპანეთის ჩემპიონის ტიტული და ჩემპიონთა ლიგა მოიგო. ამას გარდა, იტალიის, გერმანიის, საფრანგეთისა და ინგლისის ჩემპიონატებშიც უმარჯვია. საერთო ჯამში, იტალიელს საკლუბო დონეზე 24 ტიტული აქვს, ნაკრებში კი არასდროს უმუშავია.
ბრაზილიის ნაკრები თავკაცის გარეშე მას მერე დარჩა, რაც 2022 წლის მუნდიალის მეოთხედფინალში ხორვატიასთან მარცხის შემდეგ, წასვლის შესახებ ტიტემ გამოაცხადა.
ავტორი
