გუშინ გამოცემამ „Corriere del Mezzogiorno“ გაავრცელა ცნობა, რომ საქართველოს ეროვნული გუნდისა და „ნაპოლის“ თავდამსხმელი ხვიჩა კვარაცხელია ვარჯიშს 28 ნოემბერს განაახლებს.
„კვარა“ დასვენების დღეებს საქართველოში ატარებს. ხვიჩა მშობლიურ მხარეს ესტუმრა და გულშემატკივრებს ავტოგრაფები დაურიგა. 21 წლის შემტევი ლუმბაგოს რეაბილიტაციის პროგრამას აგრძელებს, რათა მომდევნო კვირის ორშაბათისთვის გუნდთან ერთად ვარჯიში განაახლოს“, – დაწერა გამოცემამ.
ასევე გუშინ ვებგვერდმა „Napolipiu.com“ გაავრცელა ცნობა რომ „ნაპოლი“ მეორე წრისთვის მოსამზადებელ შეკრებას თურქეთში გაივლის და რამდენიმე ამხანაგურ მატჩსაც გამართავს.
„კატარის 2022 წლის მსოფლიო ჩემპიონატი ლუჩანო სპალეტისთვის სასარგებლოა, რადგან 4 იანვარს „ინტერის“ წინააღმდეგ მის განკარგულებაში ხვიჩა კვარაცხელია და ამირ რაჰმანი იქნებიან. „ნაპოლი“ თურქეთში მოემზადება. ამხანაგურ მატჩებს კი, დიდი ალბათობით, „კრისტალ პალასთან“, „ფულემთან“ და თურქულ „ქარაგუმრუკთან“ ჩაატარებს. 1-დან 12 დეკემბრამდე შესაძლოა, კიდევ ორი ტესტ–მატჩი გაიმართოს და ერთ–ერთი გუნდი იტალიის ჩემპიონატიდან იყოს“, – გვამცნო საიტმა „Napolipiu.com“.
გამოცემამ „7 Gold“ მიმდინარე სეზონში „ნაპოლის“ სამი საუკეთესო და სამი ყველაზე ცუდი ფეხბურთელის ჩამონათვალი. რჩეულებში პირველ ადგილს ხვიჩა კვარაცხელია იკავებს, მის შემდეგ კი ვიქტორ ოსიმენი და კიმ მინ–ჯაე მოდიან.
რაც შეეხება ნაკლებად გამორჩეულ ფეხბურთელებს, მათ სიაში მატეო პოლიტანო, ალექს მერეტი და ნტანგი ნდომბელე არიან.
იტალიის ნაკრებისა და კანადური „ტორონტოს“ ფეხბურთელმა ფედერიკო ბერნარდესკიმ გამოცემა „Gazzetta Dello Sport“–თან სხვა საინტერესო თემებთან ერთად ხვიჩა კვარაცხელიაზეც ისაუბრა.
„იუვენტუსს“ პოტენციურად უფრო ძლიერი შემადგენლობა ჰყავს, ვიდრე „ნაპოლის“, რომელიც გიჟურად თამაშობს და ექსტრაორდინალური ფეხბურთელი ჰყავს – კვარაცხელია. ჩემი აზრით, ის „სერია A“–ს საუკეთესო მოთამაშეა. წლებია ასეთი სრულყოფილი ფეხბურთელი არ მინახავს: ფიზიკურად ძლიერია, ბევრს დარბის ჭკვიანია, ძლიერი ხასიათი და დამანგრეველი სიჩქარე აქვს. „ნაპოლის“ ზაფხულში გაუჭირდება ქართველი ფეხბურთელის შენარჩუნება“.
„ნაპოლისა“ და ხვიჩა კვარცხელიას საკითხს კიდევ ერთი ცნობილი იტალიელი მოთამაშე შეეხო. ახლო წარსულში ლეგენდარულმა ფეხბურთელმა ფილიპო ინძაგიმ „Sportitalia“–სთან ინტერვიუში განაცხადა რომ ევროპაში ამჟამად ყველაზე კარგ ფეხბურთს ლუჩანო სპალეტის გუნდი თამაშობს.
„ნაპოლი“ ევროპაში საუკეთესო ფეხბურთს თამაშობს. ლუჩანო სპალეტი უნდა შევაქო, რადგან მისი წყალობით გუნდს მკაფიო პროფილი აქვს და კლუბის ხელმძღვანელობამაც შესანიშნავი ტრანსფერები გააკეთა. მათ რამდენიმე უცნობი მოთამაშე იყიდეს, განსაკუთრებით კვარაცხელია, მაგრამ ქართველი წარმოუდგენელ რაღაცებს აკეთებს“, – აღნიშნა პიპო ინძაგიმ.
გუშინ ფრანგულმა გამოცემამ „Francebleu.fr“ „ლიგა 2“–ის საშემოდგომო ეტაპზე „მეცის“ გამოსვლა შეაფასა და გიორგი მიქაუტაძის თამაშს „ბრწყინვალე, მაგრამ არასტაბილური“ უწოდა.
„სეზონის ამ ნაწილში „მეცის“ თავდამსხმელებში საუკეთესო უდავოდ გიორგი მიქაუტაძე იყო. ქართველმა ფეხბურთელმა 8 გოლი გაიტანა და 5 საგოლე გადაცემა გააკეთა.
ის ბრწყინვალეა, მაგრამ – არასტაბილური.“სერენის“ ყოფილ თავდამსხმელს დიდი პაუზა ჰქონდა – თითქმის ორი თვის განმავლობაში გოლი არ ჰქონდა გატანილი“, – დაწერა ფრანგულმა გამოცემამ.
რამდენიმე კვირის წინ საქართველოს ნაკრების შემტევი ბუდუ ზივზივაძე, რომელსაც უნგრული „ფეჰერვარის“ ფანებმა „უიპეშტთან“ შეხვედრის შემდეგ ყოფილ თანაგუნდელთან მაისურის გაცვლაზე სკანდალი აუგორეს კლუბის დუბლშემადგენლობაში გადაიყვანეს. ცნობილი გახდა რომ ზივზივაძე ამჟამინდელ მდგომარეობასთან შეგუებას არ აპირებს.
„ორი კვირის წინ ოპერაცია გავიკეთე მხართან, ლავიწის ძვალთან იოგები დამიზიანდა. რეაბილიტაცია კარგად მიმდინარეობს, მაგრამ დაახლოებიოთ ორი კვირა ხელი ისევ ჩამოკიდებული მექნება. თუმცა ორშაბათიდან ხელის ამოძრავება დავიწყე, რომ ელასტიურობა დაუბრუნდეს, ორ კვირაში კი უნგრეთში ჩავალ და სრულ რეაბილიტაციას დავიწყებ.
წესით, იანვრის პირველ რიცხვებში უკვე სრული დატვირთვით ვივარჯიშებ. კარგი იქნებოდა, ეს არ მომსვლოდა, მაგრამ რახან მოხდა, ვფიქრობ, კარგ დროს დაემთხვა – ახლა შესვენებაა, მსოფლიოს ჩემპიონატი მიმდინარეობს. გუნდში რომ დავბრუნდები, მექნება საშუალება, რომ კონდიციები აღვიდგინო. არ ვაპირებ, დრო მეორე გუნდში გავატარო. „ფეჰერვარიდან“ წასვლა მინდა, თანაც, კონტრაქტის დასრულებამდე ექვსი თვე დარჩა. როგორც ვიცი, კლუბის ხელმძღვანელობას თავადაც სურს, რომ გუნდი დავტოვო. ამიტომ ამ საკითხზე ჩემს მენეჯერთან ერთად ვმუშაობ და უახლოეს პერიოდში გადაწყდება, სად გავაგრძელებ კარიერას. არის რაღაც შემოთავაზებები, თუმცა, ჯერ კონკრეტული ისეთი არაფერია, რომ სერიოზულად დავფიქრდე და გადაწყვეტილება მივიღო. სავარაუდოდ, დეკემბრისთვის ყველაფერი გაირკვევა. რა თქმა უნდა, იმედი მაქვს, რომ „ფეჰერვარზე“ უკეთეს გუნდში და უკეთეს ჩემპიონატში გადავალ“, – განაცხადა ბუდუ ზივზივაძემ.
ავტორი
