გუშინ, საქართველოს ეროვნული გუნდისა და „ნაპოლის“ თავდამსხმელმა ხვიჩა კვარაცხელიამ მიღებული ტრავმის შემდეგ მოედანზე ინდივიდუალურად პირველად ივარჯიშა. იტალიური მედიის მტკიცებით, ქართველი ფეხბურთელი დიდი ალბათობით 11 აგვისტოს კვიპროსის „აპოლონთან“ სპარინგს გამოტოვებს, 19 აგვისტოს კი „ფროზინონესთან“ „სერია A“-ს პირველი ტურის მატჩისთვის მზად იქნება.
საინტერესოა, რომ ნეაპოლური კლუბის რიგებში, საერთო ჯგუფთან ერთად ივარჯიშეს ახალწვეულმა ნატანმა, ვიქტორ ოსიმენმა და პიოტრ ზელინსკიმ, ხოლო ანდრე-ფრანკ ზამბო ანგისა ტრავმას მკურნალობს.
გუშინ, „ნაპოლის“ პორტუგალიელმა მარცხენა მცველმა, მარიო რუიმ კლუბის პრეზიდენტს, აურელიო დე ლაურენტისს შეატყობინა, რომ მას გუნდიდან წასვლა სურს.
32 წლის ფეხბურთელს „ნაპოლისთან“ კონტრაქტის გახანგრძლივება სურდა და მზად იყო, ხელფასიც კი დაეკლო. რუი ახლოს იყო ახალი ხელშეკრულების გაფორმებასთან, მაგრამ, ჯერჯერობით, იტალიის მოქმედი ჩემპიონების მხრიდან შეთავაზება არ ყოფილა. ახალი სეზონის დაწყებამდე 2 კვირაზე ნაკლებია დარჩენილი, შესაბამისად, პორტუგალიელი მის შემდეგ ნაბიჯებს სერიოზულად გეგმავს.
მარიო რუის აგენტი რუდი გარსიასა და აურელიო დე ლაურენტისს უკვე დაუკავშირდა და აცნობა, რომ იმ შემთხვევაში, თუ რომელიმე სხვა კლუბიდან კარგი წინადადება იქნება, მაშინ ის ნეაპოლს დატოვებს. პორტუგალიელი იმედგაცრუებულია, რადგან დე ლაურენტისის დაპირების მიუხედავად, მას ახალი კონტრაქტი არ შესთავაზეს. მარიო რუის ამჟამინდელი ხელშეკრულება ნაპოლისთან 2025 წლის ივნისში ეწურება.
მოსკოვის „დინამოს“ მთავარმა მწვრთნელმა მარცელ ლიჩკამ საბა საზონოვზე და მის უცხოურ პერსპექტივებზე ისაუბრა.
„ვიცი, რომ „ლაციოზე“, „ლიონზე“ და „გალათასარაიზე“ საუბრობენ, მაგრამ იგივე სიტუაციაა ზახარიანთან დაკავშირებითაც. ვნახოთ, რა მოხდება, ყველაფერს ვნახავთ“.
საბა საზონოვს მოსკოვის „დინამოსთან“ კონტრაქტი 2024 წლის ზაფხულამდე აკავშირებს. ფრანგული მედია წერდა, რომ „ლიონი“ მზად არის მასში 3-4 მილიონი ევრო გადაიხადოს და 5-წლიანი კონტრაქტი გაუფორმოს. ასევე დაუკავშირეს რომის „ლაციოს“, „სასუოლოს“ და „გალათასარაის“, თუმცა, ჯერჯერობით, ის რუსული გუნდის რიგებში რჩება. მან საქართველოს ეროვნულ ნაკრებში 2 მატჩი ჩაატარა, ხოლო 21-წლამდელებში 7-ჯერ გავიდა მოედანზე და 1 გოლი გაიტანა.
გერმანიის მე-2 ბუნდესლიგის მე-2 ტურში ბუდუ ზივზივაძის „კარლსრუე“ სახლში „ჰამბურგს“ დაუპირისპირდა და ქართველის მიერ ბოლო, 95-ე წუთზე გატანილი გოლით 1 ქულის მოპოვება შეძლო.
ქართველის ამ წარმატებას გამოცემა „ka-news.de“ გამოეხმაურა.
„ბუდუ ზივზივაძეს ამ დრომდე „კარლსრუეში“ რთული პერიოდი ჰქონდა და თითქოს ქართველი ფეხბურთელი კლუბს მალე დატოვებდა. ახლა კი, მისი სიტუაცია შესაძლოა, გაუმჯობესდეს. ზივზივაძის აზრით, „ჰამბურგთან“ გატანილი გოლი მას გააძლიერებს, – „ვფიქრობ, ეს გოლი დამეხმარება“, – აღნიშნა ქართველმა ფეხბურთელმა, რომელმაც „ჰამბურგთან“ შეხვედრაში მე-5 დამატებულ წუთზე ანგარიში გაათანაბრა. ეს მას თავდაჯერებას შემატებს.
ბუდუ უნგრული კლუბიდან, „ფეჰერვარიდან“ „კარლსრუეში“ იანვარში გადავიდა და მას შემდეგ ამ გუნდში რთული პერიოდი ჰქონდა და ისე ჩანდა, თითქოს 29 წლის ფეხბურთელი კლუბს მალე დატოვებდა. ეროვნული ნაკრების ფეხბურთელთან ნაადრევად გამომშვიდობება გამორიცხულია. მას კონტრაქტი 2025 წლამდე აქვს გაფორმებული. განსაკუთრებით უნდა გავითვალისწინოთ ისიც, რომ „კარლსრუე“ ჯერ ახალ თავდამსხმელს ეძებს. „ჰამბურგთან“ გოლი მის საუკეთესო თვისებებს მთავარ მწვრთნელ კრისტიან აიხნერთან უფრო კარგად წარმოაჩენ,“ – დაწერა გერმანულმა გამოცემამ.
ავტორი
