გუშინ, იტალიურმა გამოცემამ „Corriere dello Sport“ გაავრცელა ინფორმაცია რომ ხვიჩა კვარაცხელიამ თერაპიული კურსი საქართველოში გაიარა, ვარჯიში უკვე განაახლა და უახლოეს დღეებში „ნაპოლის“ შეუერთდება.
საქართველოს ნაკრების ფეხბურთელმა ტრავმა ჩემპიონთა ლიგაზე, „ლივერპულის“ წინააღმდეგ შეხვედრაში მიიღო, რის გამოც „სერია ა“–ში სამი, ეროვნულ ნაკრებში კი ერთი მატჩის გამოტოვება მოუწია.
ლუჩანო სპალეტის გუნდი სეზონის მეორე ნახევრისთვის მზადებას კასტელ ვოლტურნოში განაგრძობს, 12 დეკემბერს კი ანტალიაში გაემგზავრება და იქ რამდენიმე ამხანაგურ შეხვედრას თურქულ კლუბებთან და ინგლისურ „კრისტალ პალასთან“ გამართავს.
გუშინ, საფრანგეთის ნაკრებისა და „მილანის“ ყოფილმა ფეხბურთელმა მარსელ დესაიმ გამოცემა „Gazzetta Dello Sport“–თან განაცხადა, რომ მიმდინარე სეზონში „ნაპოლი“ იტალიის ჩემპიონი ვერ გახდება.
ფრანგს ხვიჩა კვარაცხელიაზეც ჰკითხეს, მაგრამ რატომღაც მან ქართველ ფეხბურთელზე პასუხს თავი აარიდა.
„მომწონს „ნაპოლის“ ენერგიული თამაში, მაგრამ მეეჭვება, რომ ფსიქოლოგიურად ბოლომდე გაძლონ. მათ ამისათვის შესაბამისი შემადგენლობა არ ჰყავთ, „იუვეს“ და „მილანს“ კი ამით სარგებლობა შეუძლიათ“, – თქვა მარსელ დესაიმ.
კვიპროსის ჩემპიონატში „ანორთოსისმა“ მორიგი მატჩი ჩაატარა, თუმცა მასში ქართველ მეკარეს მონაწილეობა არ მიუღია. როგორც ბერძნული მედია იტყობინება ამის მიზეზი ის არის, რომ მან მატჩამდე დისკომფორტი იგრძნო, ვარჯიში ვეღარ გააგრძელა და მატჩიც ამის გამო გამოტოვა.
ჯერ–ჯერობით უცნობია თუ რამდენად სერიოზულია გიორგი ლორიას ტრავმა.
გუშინ, იტალიური რაგბის კომერციულმა დირექტორმა, წარსულში ცნობილმა მორაგბე კარლო ჩეკინატომ ბრიტანული „ The Rugby Paper“-თან განაცხადა, რომ ის „ექვსი ერის“ გაფართოების მომხრეა, თუმცა სასტიკი წინააღმდეგია ტურნირში გავარდნა–აღმასვლის ფლეი ოფი დაინიშნოს.
„მე ძალიან დიდ პატივს ვცემ ქართულ რაგბის და მის მიღწევებს“, – განაცხადა ჩეკინატომ.
ბორჯღალოსანთა წევრი დავით ნინიაშვილი კი ფრანგულ „TOP 14“–ში საოცრად თამაშობს და „ლიონის“ ერთ–ერთი მთავარი ლიდერია. მან შარშანდელ სეზონში კლუბთან ერთად „ჩელენჯ ქაფი“ მოიგო და ამ სეზონში „TOP 14“–ში უკვე ოთხი ლელო დადო.
ნინიაშვილის თამაშს ფრანგული მასმედიაც გამოეხმაურა.
„Rugbyrama“: – „ქართველი ფენომენი მხოლოდ 20 წლისაა. ის უცხოპლანეტელს ჰგავს. ნინიაშვილი „ლიონის“ შეტევის ერთ–ერთი მთავარი დამრტყმელი ძალაა. ერთი–ერთზე ძალიან სახიფათოა, მაღალ ბურთებზე შესანიშნავად თამაშობს. დავითს „ლიონის“ ძირითადში თავის დასამკვიდრებლად ცოტა დრო დასჭირდა. „ლიონმა“ შარშან „ჩელენჯ ქაფი“ ნინიაშვილთან ერთად მოიგო. ქართველმა მორაგბემ წლევანდელი სეზონიც შესანიშნავად დაიწყო, წლევანდელ სეზონში ოთხი ლელო დადო. მან ნოემბრის ტესტებზეც უელსის დამარცხებაში დიდი წვლილი შეიტანა“.
„LeProgres“ – „ნინიაშვილი თავის ასაკობრივ კატეგორიაში მსოფლიოს საუკეთესო მოთამაშეა. ის ბრილიანტია, რომელსაც კიდევ უფრო შეუძლია გაბრწყინება. მას შეუძლია მოედნის ყველა კუთხეში ცეცხლის ანთება. მას დიდი მომავალი აქვს. თამაშს კარგად კითხულობს, ძალიან სწრაფია და კარგად აზროვნებს“.
გუშინ, მსოფლიოს სპორტულ მასმედიაში ადრე გავრცელებული ინფორმაცია, იმის შესახებ, რომ ამერიკული MLS-ის გუნდი „ინტერ მაიამი“ ლეო მესისთან მოლაპარაკებებს აწარმოებდა, მისმა გარემოცვამ უარყო.
ბრიტანული მედიაში იწერებოდა იმის შესახებ, რომ დევიდ ბექჰემის თანამფლობელობაში მყოფი „ინტერ მაიამი“ ლეო მესისთან კონტრაქტის დეტალებს ათანხმებდა, მასთან ერთად კი გუნდში ლუის სუარესის და სესკ ფაბრეგასის ტრანსფერზეც მუშაობდა.
„CNN“–მა მესის წარმომადგენელთან საუბარში დაადგინა, რომ ეს ინფორმაცია სიმართლეს არ შეესაბამებოდა:
„ეს ტყუილია, ცრუ ინფორმაციაა“. – განაცხადა მისმა წარმომადგენელმა მარსელო მენდესმა.
გუშინ კიდევ ერთხელ ცნობილი გახდა, რომ მას შემდეგ, რაც უეფამ რუსულ კლუბებს და ეროვნულ გუნდს თავისი ეგიდით ჩასატარებელ საერთაშორისო ტურნირებზე ასპარეზობა აუკრძალა, რუსეთის ფეხბურთის ფედერაცია კონფედერაციის შეცვლაზე დაფიქრდა.
„რამდენიმე თვის წინ ვამბობდი, რომ აზიაზე ფიქრი ნაადრევი იყო, მაგრამ ამჟამად ეს ის შესაძლებლობაა, რომელიც აუცილებლად უნდა განვიხილოთ. მე ჯერ არ მილაპარაკია აზიის წარმომადგენელთან, რადგან უეფა კვლავ ევროპული ოჯახის ნაწილად გვთვლის და მის ზურგს უკან მოლაპარაკების გამართვა უსიამოვნო იქნებოდა, თუმცა ამ საკითხის შესახებ აუცილებლად უნდა ვიფიქროთ“ – განაცხადა გუშინ რუსეთის ფეხბურთის ფედერაციის პრეზიდენტმა ალექსანდრ დიუკოვმა.
ავტორი
