გუშინ იტალიურმა გამოცემა „გაძეტა დელო სპორტმა“ გაავრცელა ინფორმაცია, რომ დიდი ალბათობით ხვიჩა კვარაცხელია „სერია A“–ს მომდევნო ტურსაც გამოტოვებს. დღეს „ნაპოლი” საკუთარ მინდორზე „ემპოლის“ მიიღებს. ხვიჩას უკვე გაუცდა „ატალანტასთან“ მატჩი, რომელიც გუნდმა მის გარეშე იმარჯვა.
იტალიური მასმედიის ცნობით ქართველი ამ დღეებში ფიზიოთერაპევტის მეთვალყურეობის ქვეშ სატრენაჟორო დარბაზში ემზადება და კლუბის ხელმძღვანელობა არ აპირებს, ხელოვნურად დააჩქაროს მისი გამოჯანმრთელობა, რათა ტრავმა არ გამიზეზდეს.
ალბათ კვარაცხელია არც სანაკრებო მატჩისთვის იქნება მზად. 17 ნოემბერს საქართველოს ეროვნული გუნდი არაბთა გაერთიანებულ საამიროებში ამხანაგურ მატჩს მაროკოს ნაკრებთან გამართავს.
„ატალანტასთან“ მატჩის შემდეგ „ნაპოლის“ თავკაცმა ლუჩანო სპალეტიმ ხვიჩა კვარაცხელიაზე პრესკონფერენციაზე ისაუბრა და მედიას მოუწოდა, რომ შეწყვიტონ ყოველთვის მასზე შეკითხვების დასმა.
სპალეტის ამ განცხადებას იტალიაში გამოეხმაურება მოჰყვა. „ნაპოლის“ მთავარი მწვრთნელის კომენტარზე „DAZN“–ის ეთერში თავიანთი პოზიცია დააფიქსირეს ვეტერანმა ფეხბურთელებმა რიკარდო მონტოლივომ და ვალონ ბეჰრამიმ.
რიკარდო მონტოლივო: „სპალეტის არ სურს, რომ „ნაპოლი“ იდენტიფიცირებული მხოლოდ კვარასთან იყოს, არამედ – მთელ გუნდთან. როდესაც ფეხბურთელი ხვდები, რომ ძალიან მაგარი თანაგუნდელი გყავს, რომელსაც იმ შემთხვევაშიც შეუძლია თამაში, თუ მთელი კვირის განმავლობაში ერთხელაც არ უვარჯიშია, ამ ფაქტს ეგუები, ეს ყოველთვის ასე იყო“.
ვალონ ბეჰრამი: „ამ ბიჭზე ამდენს მხოლოდ იმიტომ არ ვსაუბრობთ, რომ ეს უბრალოდ ტრენდია, არამედ იმიტომ, რომ ის განსხვავებას ქმნის, როგორც „სერია A“–ში, ისე ჩემპიონთა ლიგაზე. ჩემი კარიერის განმავლობაში მყავდა ძლიერი თანაგუნდელები, რომელთაც კვირაში ძალიან ცოტაც რომ ევარჯიშათ, პირადად მე ყოველთვის მინდოდა ისინი მატჩის დროს მოედანზე გასულიყვნენ და ეთამაშათ. ამას გარდა, ცხადია, რომ როდესაც მთელი სათამაშო სისტემა მუშაობს, სპალეტის შეუძლია ნებისმიერი გადაწყვეტილება მიიღოს და ნებისმიერი ტექნიკური არჩევანი გააკეთოს“.
გუშინ, შვეიცარიის ქალაქ ნიონში, უეფას შტაბბინაში, გაიმართა ჩემპიონთა ლიგის მერვედფინალური სტადიის წილისყრა.
კენჭისყრამ ასეთი შედეგი მოგვცა:
ლაიპციგი (გერმანია) – მანჩესტერ სიტი (ინგლისი)
ბრიუგე (ბელგია) – ბენფიკა (პორტუგალია)
ლივერპული (ინგლისი) – რეალი (ესპანეთი)
მილანი (იტალია) – ტოტენჰემი (ინგლისი)
აინტრახტი (გერმანია) – ნაპოლი (იტალია)
დორტმუნდი (გერმანია) – ჩელსი (ინგლისი)
ინტერი (იტალია) – პორტუ (პორტუგალია)
პარი სენ–ჟერმენი (საფრანგეთი) – ბაიერნი (გერმანია)
პირველი მატჩები 2023 წლის 14/15, 21/22 თებერვალს გაიმართება, ხოლო საპაუხო – 7/8 და 14/15 მარტს. ჩემპიონთა ლიგის ფინალს მომავალი წლის 10 ივნისს სტამბოლის „ქემალ ათათურქის“ სახელობის ოლიმპიურის სტადიონი უმასპინძლებს.
გუშინვე „ნაპოლის“ მთავარმა მწვრთნელმა ლუჩიანო სპალეტიმ ჩემპიონთა ლიგის მერვედფინალური ეტაპის წილისყრა შემდეგნაირად შეაფასა.
„ამ ეტაპზე უკვე ყველა მატჩი ძალიან რთულია. „პსჟ“–ის აცილების გამო შეგვიძლია გავიხაროთ. „აინტრახტი“ ევროპის ლიგის მოქმედი გამარჯვებულია, რომელიც აღავლობის გზაზე დგას.
დარწმუნებული ვარ, ადვილი თამაში არ გველის. მათ ევროპის რანგით მეორე ტურნირი მოიგეს“, – განაცხადა სპალეტიმ.
საკუთარი მოსაზრება გამოთქვა ახლო წარსულში ცნობილმა იტალიელმა მცველმა ალესანდრო კოსტაკურტამაც.
ჟურნალისტები მას დაეკითხნენ, თუ რამდენი პროცენტი აქვს შანსი ხვიჩა კვარაცხელიას გუნდს, რომ „აინტრახტის“ ბარიერი დაძლიოს. კოსტაკურტამ ფავორიტად თავისი ქვეყნის კლუბი მიიჩნია და „ნაპოლის“გასვლის შანსი 72%-ით შეაფასა.
უფრო მეტად სჯერა სპალეტის გუნდის ცნობილ იტალიელ ჟურნალისტ პაოლო კონდოს, რომელიც „ნაპოლის“ შანსებს 75%-ით აფასებს.
ავტორი
