78 წლის ასაკში, პოეტი ენვერ ნიჟარაძე გარდაიცვალა.
როგორც პარლამენტის ბიბლიოთეკის თავმჯდომარე, კონსტანტინე გამსახურდია სოციალურ ქსელში წერს, დრამატურგი, ლიტერატურათმცოდნე ენვერ ნიჟარაძე გერმანიაში, რამდენიმე დღის წინ გარდაიცვალა.
“სამწუხაროდ გვტოვებენ ადამიანები, რომლებთანაც დაკავშირებულნი ვიყავით და ვართ იმ დიდი, ეპოქალური მოვლენებით, რამაც ახალ, დამოუკიდებელ საქართველოს ჩაუყარა საფუძველი.
რამდენიმე დღის წინ ბერლინში გარდაიცვალა ენვერ ნიჟარაძე, პოეტი, ლიტერატურათმცოდნე, ავტორი პოეტური კრებულებისა და უაღრესად საინტერესო წიგნებისა;
(მაგალითად, გრ. რობაქიძეზე და ქართულ-ევროპულ ლიტერატურულ ურთიერთობებზე) მწერალთა კავშირის მდივანი მუხრან მაჭავარიანის თავმჯდომარეობისას, 1991 წლის 9 აპრილის საქართველოს დამოუკიდებელი რესპუბლიკის ვიცეპრემიერი.
1992-1993 წლების მრისხანე ვანდეას შემდეგ მან აირჩია როგორც შინაგანი, ისე პირდაპირი ემიგრაცია და განრიდება ბერლინში, დააახლოებით ისე, როგორც ნოდარ წულეისკირმა სოფელ წერაქვში.
დაგვამახსოვრდა უაღრესად ქართული სულით და მართალი სიტყვით, ვინც უმძიმეს წლებში, ყოველ დღე მოკითხვას აბარებდა “საქართველოდან გროზნოსაკენ მიმავალ ღრუბელს.” (მისივე ლექსიდან)
ვაბრალებთ მონღოლს,
ვაბრალებთ ხაზარს,
ვაბრალებთ თურქეთს,
ვაბრალებთ ირანს.
ვაბრალებთ ჩეჩენს,
ვაბრალებთ კაზაკს,
ვაბრალებთ რუსეთს
შარაგზის ფირალს.
ვაბრალებთ მრუდე
განგების ისარს,
რომ გაგვიხლიჩა
ცა, უნაპრალო,
დაქცევას ჩვენსას
ვაბრალებთ ვის არ
ოღონდაც ჩვენ თავს
არ დავაბრალოთ.
(ენვერ ნიჟარაძე)
მსუბუქი ყოფილიყოს ბატონი ენვერის ნეშტისთვის ქართული მიწა. მისი სული კი მოიხსენოს უფალმა ღმერთმა თავისი მარადიულ სასუფეველში.“, – წერს გამსახურდია.
