კონსერვატორიის მცირე დარბაზში საქველმოქმედო კონცერტი გაიმართა. კონცერტში მონაწილეობდნენ ოპერის მომღერალი, სოპრანო სოფიო გორდელაძე, კონცერტმაისტერი ნათია ქავთარაძე.
სოფიო გორდელაძის თქმით, საღამოზე დამსწრე საზოგადოებას მიაწოდეს ინფორმაცია, რომ კონცერტი საქველმოქმედო ხასიათს ატარებდა და აქ შეგროვებული თანხით, საახალწლო დღეებში ოზურგეთის მუნიციპალიტეტის სოფელ ლიხაურისა და სოფელ ცხემლისხიდში სოციალურად დაუცველ ოჯახებს დაეხმარებოდნენ.
“ლიხაურში ოთხშვილიან ოჯახს მივუტანეთ სარეცხი მანქანა, ხოლო ცხემლისხიდში ასევე ოთხშვილიან ოჯახს ნაძვის ხე. ორივე ოჯახს ასევე მივუტანეთ საკვები და ტკბილეული. ამ ოჯახების შერჩევაში ლიხაურში დაფუძნებული არასამთავრობო ორგანიზაცია “თანადგომა – ერთსულოვნებას“ წარმომადგენლები დაგვეხმარა,“_ გვითხრა სოფიო გორდელაძემ.
ნათია ქავთარაძე: გურია იმიტომ შევარჩეით, რომ მე და სოფო ოზურგეთიდან ვართ. აქედან გამომდინარე, დავუკავშირდით ნათია ღაჟონიას და მოხდა ორი ოჯახის შერჩევა. მინდა ვთქვა, რომ ყველას შეგვიძლია სხვადასხვა ფორმით გავაკეთოთ მსგავსი აქციები და გავახაროთ ის ოჯახები, რომლებსაც საშუალება, არ აქვს ბავშვებს შეუძინონ საახალწლოდ ნაძვის ხე ან კიდევ ტკბილეული.
არასამთავრობო ორგანიზაცია “თანადგომა – ერთსულოვნებას“ დამფუძნებლის, ნათია ღაჟონიას თქმით, ყველას შეუძლია დაეხმარონ იმ ოჯახებს, ვისაც სოციალურად უჭირს.
“ამ ეტაპზე ორმა მუსიკოსმა შეძლო საახალწლოდ ორი ოჯახის წევრები გაეხარებინა. იმედია, რომ ეს მუხტი გადამდები იქნება,“ – გვითხრა ღაჟონიამ.
