27 დეკემბერს, ოზურგეთის მუნიციპალიტეტის მერმა, კონსტანტინე შარაშენიძემ კოლეჯ „ჰორიზონტში“, 2019 წლის საქმიანობის შემაჯამებელი ანგარიში წარადგინა.
მერის ანგარიშის წარდგენას, ძირითადად, საჯარო მოხელეები, საკრებულოს თავმჯდომარე და დეპუტატები, სკოლების დირექტორები, ა(ა)იპ ორგანიზაციებში დასაქმებული პირები და ჟურნალისტები ესწრებოდნენ. მათ დასაწყისში დოკუმენტური ვიდეომასალა წარადგინეს, სადაც თავმოყრილი იყო, თუ რა გაკეთდა მუნიციპალიტეტში ერთი წლის განმავლობაში.
ძირითადად, ეს იყო 2019 წელს გახორციელებული ინფრასრუქტურული, სოციალური და საგანმანათლებლო პროექტების ირგვლივ, ვიზუალური მხარის ჩვენება.
კერძოდ, ადგილობრივი და ცენტრალური ბიუჯეტის დაფინანსებით გახორციელდა მასშტაბური ინფრასტრუქტურული პროექტები _ მოასფალტებული გზების საერთო მოცულობა შეადგენს 22 272 მეტრს.
კოტე შარაშენიძემ აღნიშნა, რომ ვიდეომასალით 20 წუთში ჩაეტია გაკეთებული საქმე, თუმცა, ამას ფიზიკურდ დიდი შრომა და ძალისხმევა დასჭირდა.
მან დაასახელა კონკრეტული ციფრები, თუ რა თანხები დაიხარჯა მუნიციპალიტეტის ბიუჯეტიდან სარეაბილიტაციო პროექტებზე:
_ მუნიციპალიტეტმა 1 268 739 ლარით დააფინანსა სოფელ ოზურგეთის კულტურის სახლის რეაბილიტაციის პროექტი.
სარემონტო სამუშაოები ჩაუტარდა ოზურგეთის მუნიციპალიტეტის
საბავშვო ბაღებს.
სახელმწიფო და ადგილობრივი სახსრებით მიმდინარეობს ისტორიული მუზეუმის სრული რეკონსტრუქცია.
ასევე, ადგილობრივი და სახელმწიფო ბიუჯეტის დაფინანსებით, 2019 წელს 20 სოფელში წყალმომარაგების სამუშაოები გახორციელდა. 20 საჯარო სკოლას კი რეაბილიტაცია ჩაუტარდა.
რაოდენ გასაკვირიც უნდა იყოს, საკმაო დრო დასჭირდა სამადლობლების მოსმენას, რითაც კოტე შარაშენიძეს დარბაზში მყოფმა არაერთმა პირმა მიმართა: ბახვის საჯარო სკოლის დირექტორმა, მზია ვაშალომიძემ, შრომის საჯარო სკოლის დირექტორმა რუსუდან ცეცხლაძემ, მასწავლებელმა მაია გოგუაძემ, ფოლკლორის ცენტრის დირექტორმა ავთანდილ სურგულაძემ, თეატრის სამხატვრო ხელმძღვანელმა ვასილ ჩიგოგიძემ, დეპუტატმა ლელა საჯაიამ და სხვებმა. მათ უმეტესად ინფრასტრუქტურული სამუშაოების ჩატარებას გაუსვეს ხაზი და დაჯილდოებასაც კი შეპირდნენ მერს.
კოტე შარაშენიძემ საპასუხოდ თქვა, რომ დღეის მდგომარეობით, ერთადერთი მუნიციპალიტეტია ოზურგეთი, სადაც მერიას და საკრებულოს შორის ერთიანი კოორდინაცია არსებობს.
_ დასაწყისში იყო რაღაც გაუგებრობები, თუმცა, ჩვენ შორის საქმიანი დამოკიდებულება არსებობს და სამაგალითო ურთიერთობა გვაქვს. ზოგან დღემდე “ჭამენ ” ერთმანეთს. ჩვენ შევძელით, საქმის კეთება. სოფლის დეპუტატი რომ შემოდის ჩემთან, მე ვიცი, რომ მთელი სოფელი შემოდის. ასე ვუყურებ ამ ყველაფერს. ბიძინა ივანიშვილს არავისთვის შეურჩენია და არ შეარჩენს ღალატს. სახელმწიფო მოხელეებსა და ჩინოვნიკებზე მაქვს საუბარი… მე შემიძლია და ხელმეწიფება, მიხარია, რომ ასე ვთანამშრომლობთ და აქ ბრძანდებით ყველა. ასეთი თანამშრმლობით ბევრი კარგი საქმე გაკეთდება და დეპუტატების წვლილი დიდია ამ საქმეში, _ ასე დაასრულა მან თავისი გამოსვლა.
შარაშენიძეს არ დაუკონკრეტებია, რატომ მოიხსენია ამ კონტექსტში ბიძინა ივანიშვილი. სავარაუდოდ, მან ეს ხმამაღალი განცხადება გააკეთა, ერთის მხრივ, იმიტომ, რომ ხაზი გაუსვა ოზურგეთის საკრებულოში მმართველი პარტიის უმრავლესობასთან საქმიან და შეხმატკბილებულ ურთიერთობას და მეორეს მხრივ, მოახლოებული 2020 წლის საპარლამენტო არჩევნებში „ქართული ოცნების“ მხარდაჭერა გამოხატა.
