სოციალურ ქსელ Facebook-ში არსებულ ჯგუფ “ბახმაროში” ვრცელდება ინფორმაცია, რომ კურორტ ბახმაროზე ახალდარგული ნაძვებს კოცონის დასანთებად ჭრიან.
გავრცელებული ინფორმაციის გადასამოწმებლად ჩოხატაურის მუნიციპალიტეტის მერის წარმომადგენელს ბახმაროს ადმინისტრაციულ ერთეულში რომან კალანდაძეს დავუკავშირდით.
რომან კალანდაძის თქმით, ხეების ჭრის ფაქტთან დაკავშირებით ინფორმაცია არ აქვს და ეს სატყეო სააგენტოს პრეროგატივაა.
“ალბათ, კოცონისთვის თუ ჭრიან. გუშინ წინ, საღამოს დავინახეთ და დავაფიქსირეთ ფაქტი, სატყეო სააგენტოს დავუკავშირდით და ვაცნობეთ აღნიშნულ ფაქტთან დაკავშირებით. თუ გაატარეს რაიმე პრევენციული ღონისძიება, ამას მე ვერ გეტყვით. ჩვენი კომპეტენციაა, რომ თუ დავინახეთ ფაქტი შევატყობინოთ სატყეო სააგენტოს”,_ ამბობს კალანდაძე.
მოჭრეს თუ არა ახალდარგული ნაძვები და რა ზომებს იღებს სატყეო სააგენტო _ ამის გასარკვევად ბახმაროს სატყეო სპეციალიტს, არსენ ჭკუასელს ვესაუბრეთ.
“საღამოს კოცონის დასანთებად ბავშვებმა ჩამოიტანეს ტყიდან. ჩვენც გვეგონა, რომ მოჭრილი იყო, მაგრამ ფაქტის გადამოწმების შემდეგ ვნახეთ, რომ მოთხრილი და მოტეხილი იყო. იყო მოგლეჯილი ხეები, რასაც ხელით ვერ იზამ. დაცვა მაინც გავაძლიერეთ. გვიან საღამოს საათებში შემოვლას ვაწარმოებთ. ჯერჯერობით სხვა შემთხვევა არ დაგვიფიქსირებია. მოსახლოებასაც გაფრთხილება მივეცით, უფროსებს და მშობლებს. ძირითადად ტყეში ბავშვები დადიან საღამოს პირზე კოცონის დასანთებად. თუ შევამჩნევთ ხის მოჭრის ან განზრახ დაზიანების ფაქტს, დაჯარიმდება ნებისმიერი. ჯარიმის ოდენობას სასამართლო განსაზღვრავს.
ზოგიერთ ადგილებში მოგლეჯილია ნედლი ხეები, წიწვები, მაგრამ ქვემოთ რომ ჩამოიტან და დადებ გზაზე, ჩანს რომ ვინმემ მოჭრა, მაგრამ ადგილზე რომ მივდივართ, მოჭრილი არ ჩანს”,_ განაცხადა ჭკუასელმა და კურორტ ბახმაროზე მყოფ მოსახლეობას მოუწოდებს, კოცონის დანთებისათვის ნუ გამოიყენებენ ნაძვის, სოჭის და ნებისმიერი სახის ხე-ტყის და ახალგაზრდა აღმონაცენის მოჭრას ან მოგლეჯას.
