სანამ თბილისში საგამოძიებო უწყებები მსხვილ მარკეტების ქსელებში შედიან, ჩოხატაურსა და სხვა რეგიონებში მოსახლეობა ყოველდღიურად მზარდი ფასების წინაშე მარტო რჩება. ადგილობრივი ოპოზიციის წარმომადგენლები ხელისუფლების ბოლოდროინდელ ნაბიჯებს, მათ შორის სამთავრობო კომისიის შექმნას “კრიზისის მართვის იმიტაციად” აფასებენ.
_ როგორ ფიქრობთ, რამდენად ეფექტური შეიძლება სამთავრობო კომისიის მუშაობა ფასების დასაწევად?_ ამ კითხვით პარტია “ახალის” ჩოხატაურის ორგანიზაციის ხელმძღვანელს, ბაჩო ახალაძეს მივმართეთ.
“ხელისუფლების მიერ გადადგმული ნაბიჯები — მათ შორის საგამოძიებო უწყების „აგროჰაბში“ შესვლა და ფასების დასაწევად შექმნილი სამთავრობო კომისია — ერთიან კონტექსტში უნდა განვიხილოთ და სწორედ ამ კონტექსტში იკვეთება მათი მთავარი პრობლემა. საგამოძიებო მოქმედებები უფრო ჰგავს საზოგადოებისთვის გათვლილ დემონსტრაციულ ჟესტს, ვიდრე სისტემურ და თანმიმდევრულ პოლიტიკას. წლების განმავლობაში ფასების ზრდა, ბაზრების მონოპოლიზაცია და სოციალური მდგომარეობის გაუარესება ხელისუფლების პირდაპირი პასუხისმგებლობა იყო, თუმცა რეაგირება დაიწყო მხოლოდ მაშინ, როცა უკმაყოფილება კრიტიკულ ნიშნულს მიუახლოვდა. ეს აჩენს განცდას, რომ ხელისუფლება ცდილობს პასუხისმგებლობის გადატანას კერძო სექტორზე და არა იმ ეკონომიკური პოლიტიკის გადახედვას, რომელმაც ეს კრიზისი შექმნა. ამავე ლოგიკის გაგრძელებაა სამთავრობო კომისიის შექმნაც. ჩემი ხედვით, ეს არის კრიზისის მართვის იმიტაცია — ინსტრუმენტი, რომელსაც ხელისუფლება ხშირად იყენებს დროის გასაყვანად და აქტიურობის ილუზიის შესაქმნელად. ფასების ზრდის ძირეული მიზეზები — სუსტი ანტიმონოპოლიური პოლიტიკა, მონოპოლიზებული ბაზრები, არაეფექტიანი ეკონომიკური მმართველობა და სოციალური პოლიტიკის არარსებობა — კომისიის ფორმატში ვერ გადაიჭრება, მით უმეტეს მაშინ, როცა ამ კომისიას ხელმძღვანელობს ისავე ხელისუფლება, რომელმაც პრობლემა შექმნა. განსაკუთრებით საგანგაშოა სელექტიური სამართლის რისკი. როდესაც საგამოძიებო სტრუქტურები შედიან ერთ კონკრეტულ ქსელში, ხოლო სხვა მსხვილი მოთამაშეები სისტემის მიღმა რჩებიან, ეს აძლიერებს ეჭვს, რომ სამართალი გამოიყენება არა პრინციპულად, არამედ პოლიტიკური მიზანშეწონილობით. ასეთ პირობებში ბიზნესი ხდება პოლიტიკური დღის წესრიგის მძევალი, ხოლო მოქალაქე — ამ სპექტაკლის მაყურებელი. საბოლოოდ, ჩემი შეფასებით, ხელისუფლების ეს ნაბიჯები ვერ გახდება ფასების შემცირების რეალური მექანიზმი. ეს არის მოკლევადიან ეფექტზე გათვლილი პოლიტიკური პიარ-ქმედებები, რომლებიც მიზნად ისახავს საზოგადოებრივი უკმაყოფილების განეიტრალებას და არა სისტემური პრობლემების გადაწყვეტას. ფასები არ დაიწევს მანამ, სანამ არ შეიცვლება ეკონომიკური პოლიტიკა….”,_ გვპასუხობს ბაჩო ახალაძე.
ჩოხატაურის საკრებულოს წევრი პარტია “ლელოდან”, მამუკა ცინცაძე ამბობს, რომ ფასების დაწევაზე საუბარი სიცრუეა.
“სიცრუეა ყველაფერი. სამწუხაროა, რომ მის ამომრჩევლებსაც ატყუებენ და ისინიც ტყუვდებიან. მარკეტების სიმრავლე აძვირებს პროდუქტსო და პირიქით არ უნდა გააიაფოს? თუ მთავრობა არ შეიცვალა, არ ეშველება არაფერი. ინვესტიცია ევროპიდან არ შემოდის, კონკურენციის საგენტო მარტო ფურცელზე არსებობს. შეიძლება ვიღაცას დაავალონ და ძალით დააწევინონ ფასი, თვალის ასახვევად და ისევ ბიზნესი იზარალებს. ღარიბაშვილიც საუბრობდა ფასებზე, მაგრამ შეიცვალა რამე?”,_ ამბობს მამუკა ცინცაძე.
სახელმწიფო უსაფრთხოების სამსახურმა სურსათის ფასების საკითხის დეტალურ შესწავლაზე განცხადება გასული წლის 24 დეკემებრს გაავრცელა. სუს-ის უფროსის პირველმა მოადგილემ, ლაშა მაღრაძემ განაცხადა, რომ მკაცრი სამართლებრივი რეაგირება მოჰყვება ნებისმიერ მართლსაწინააღმდეგო ქმედებას.
დღეს ცნობილი გახდა, რომ სახელმწიფო უსაფრთხოების სამსახური და ფინანსთა სამინისტროს საგამოძიებო სამსახური “აგროჰაბსა” და სადისტრიბუციო კომპანიებში შევიდნენ და შესყიდვებთან დაკავშირებულ დოკუმენტაციას ეცნობიან.
2025 წლის დეკემბერში პრემიერ-მინისტრიმა განაცხადა, რომ საქართველოში სურსათის ფასები ევროპის ქვეყნებთან შედარებით მნიშვნელოვნად მაღალია, რაც სადისტრიბუციო კომპანიებისა და საცალო ქსელების მაღალი ფასნამატით არის გამოწვეული. ირაკლი კობახიძემ სადისტრიბუციო კომპანიებთან და მარკეტებთან აქტიური მუშაობა დააანონსა; სამართალდამცავ უწყებებს ბაზრის მოთამაშეების მხრიდან სისხლის სამართლის დანაშაულის ნიშნების აღმოფხვრის მიზნით, საკითხის სიღრმისეული შესწავლა დაავალა. მანვე აღნიშნა, რომ საჭიროების შემთხვევაში, ანტიმონოპოლიურ მექანიზმებსაც გამოიყენებენ. პარლამენტს კი საკითხის შესაფასებლად შესაბამისი საპარლამენტო ბერკეტების გამოყენების მიზნით საპარლამენტო კომისიის შექმნის თხოვნით მიმართა.
ავტორი
