ლანჩხუთის კულტურის დაწესებულებათა გაერთიანების ირგვლივ ბოლო თვეების განმავლობაში საკმაოდ დიდი გაუგებრობა სუფევდა. აწ უკვე ყოფილმა დირექტორმა, დავით წერეთელმა თანამდებობა ცოტა ხნის წინ დატოვა, რომლის ამ გადაწყვეტილებას წინ უძღოდა შიდა აუდიტის სამსახურის მიერ დაწერილი უარყოფითი დასკვნა. პოსტიდან წასვლამდე წერეთელი ჯერ შვებულებაში გავიდა და ამ ხნის განმავლობაში გაურკვეველი იყო დარჩებოდა თუ ამ სამსახურს ვინმე სხვა უხელმძღვანელებდა. საბოლოოდ კი მან პოსტი დატოვა და ცენტრის ხელმძღვანელობა ოთარ ცანავას დაევალა. თუმცა, გაირკვა რომ ეს დროებითი იყო და დირექტორის თანამდებობაზე მერაბ ქარჩავა დაინიშნა.
როგორც ლანჩხუთის მერიის პრესსამსახურში დაგვიდასტურეს, ქარჩავა ორშაბათიდან, ოთხი აპრილიდან შეუდგა დირექტორის მოვალეობის შესრულებას.
მერაბ ქარჩავა კულტურის სფეროს წარმომადგენელს ვერ დავარქმევთ, თუ არ ჩავთვლით, იმას რომ ზაზა ურუშაძის გამგებლობის პერიოდში იგი კულტურის დაწესებულებათა გაერთიანებაში ერთ-ერთი განყოფილების ხელმძღვანელად დაინიშნა, მერე კი ა (ა) იპ ეკონომიკური განვითარების ცენტრში გადმოიყვანეს მოადგილის პოსტზე.
საგულისხმოა, რომ კულტურის სფეროში ქარჩავას მაშინდელ საქმიანობას მთლად სიამტკბილობაში არ ჩაუვლია, მას ვალოდია წულაძის სახელობის კინოსა და თეატრის მუზეუმის ხელმძღვანელი მაია ჩხაიძე უპირისპირდებოდა. მაგალითისთვის, ჩხაიძემ 2017 წლის ივნისის თვეში გამართულ საკრებულოს სხდომაზე, სადაც კულტურის დაწესებულებათა გაერთიანების მაშინდელი ხელმძღვანელი ადელინა კილაძეც იმყოფებოდა, საკმაოდ მწვავე განცხადებები გააკეთა ქარჩავას მისამართით- „კულტურის სახლის დირექტორად დანიშნეს კაცი, რომელიც არის პროფესიით ინჟინერი, მძიმე დანაშაულზე ნასამართლევი _ მერაბ ქარჩავა, რომელიც გამოირჩევა დისკრიმინაციული ქმედებებით. პირადად დამემუქრა, რომ კიტრივით წაგაცლი თავსო. როდესაც მე, ხელოვნების მაგისტრს მბლოკავენ, საინტერესოა, ასეთი კვალიფიკაციის და წარსულის მქონე ადამიანს რატომ აძლევენ ამხელა უფლებებს?! ხომ არ გგონიათ, მისი შს მინისტრის მოადგილე სიძის მეშინია!!! ვის მადარებთ _ კრიმინალსა და ნასამართლევ ქარჩავას? შს მინისტრის მოადგილის გავლენით ზის ქარჩავა სკამზე, ჩამოვიდეს მაშინ ეს კაცი და დააშოშმინოს თავისი სიმამრი.“
ცნობისთვის, მერაბ ქარჩავა 2012 წელს თბილისის მთავარი სამმართველოს დეტექტივების სამმართველოსა და ბორჯომის რაიონული პოლიციის მიერ, დაკავებული იქნა და მას ბრალად ედებოდა ხარაგაულის რაიონის სოფელ მაქათუბანში განსაკუთრებით დიდი ოდენობით ნარკოტიკული ნივთიერება მარიხუანას უკანონოდ გასაღება. ქარჩავა პატიმრობიდან „ქართული ოცნების“ ხელისუფლებაში მოსვლის შემდეგ გაათავისუფლეს და როგორც მოგვიანებითთავად განმარტავდა „არავითარ ნარკორეალიზატორობას არ ვეწეოდი, ეს იყო მიშა სააკაშვილის რეჟიმის მიერ შეთითხნილი ბრალდება. ერთი წელი დავყავი იმ ჯოჯოხეთში. ციხიდან გამოვედი სრული ამნისტირებული“.
მერაბ ქარჩავას 2011 წლის ბოლოს დატოვა თუ დაატოვებინეს “ქართული პარტიის” ლანჩხუთის ორგანიზაციის თავმჯდომარეობა, მანამდე კენჭს იყრიდა ხელისუფლების სატელიტი პარტიის სახელით ბოლო ადგილობრივ არჩევნებზე, უფრო ადრე “ნაციონალების” ხელისუფლებაშიც იყო, კიდევ უფრო ადრე, შევარდნაძის მმართველობისასაც ხელისუფლებაში მუშაობდა _ ორივე შემთხვევაში ქალაქ ლანჩხუთის გამგეობაში. იყო გამგებლის მოადგილეც, ხოლო ზვიად გამსახურდიას ხელისუფლებაში ქალაქ ლანჩხუთის მერი გახლდათ.
