მას შემდეგ, რაც ლანჩხუთის კულტურის დაწესებულებათა გაერთიანებაში ახალი ხელმძღვანელი დაინიშნა, როგორც მოსალოდნელი იყო, სისტემაში გარკვეული რეორგანიზაცია გახორციელდა, შედეგი კი საკმაოდ მოულოდნელი გამოდგა _ რამდენიმე წლის წინ საზეიმო ვითარებაში სახალხო ანსამბლის წოდების მინიჭებულ ანსამბლ “მხედრებს” ფუნქციონირება შეუწყვიტეს.
ამ გადაწყვეტილების მიზეზად კულუარებში რამდენიმე ვერსია სახელდება. ერთ-ერთი ვერსიით, ბიუჯეტში თანხის დაზოგვას სახელდება. ზოგი კი ამბობს, რომ მთავარი მიზეზი ანსამბლის ხელმძღვანელს მელის ნადირაძეს უკავშირდება. საქმე ისაა, რომ მელის ნადირაძე თავის დროზე კულტურის დაწესებულებათა გაერთიანებიდან სხვა რამდენიმე თანამშრომელთან ერთად გაათავისუფლეს. მაშინ ლანჩხუთის მერს, ალექსანდრე სარიშვილსა და კულტურის გაერთიანებათა მაშინდელ ხელმძღვანელს, დავით წერეთელს დისკრიმინაციასა და უსამართლო გადაწყვეტილებებში ადანაშაულებდნენ სამსახურიდან გაშვებულები. მოგვიანებით, ამ საკითხზე, მელის ნადირაძემ სასამართლო დავაც კი მოუგო ლანჩხუთის მუნიციპალიტეტს. ახლა ალექსანდრე სარიშვილს შურისძიებაში სდებენ ბრალს და ამბობენ, რომ ანსამბლის გარეშე დარჩენილი ქორეოგრაფი უფუნქციოდ დატოვა.
ინფორმაცია ანსამბლ “მხედრების” გაუქმების თაობაზე სოციალურ ქსელში ანსამბლის ერთ-ერთმა წევრმა ნატალი ტაკიძემ გააჟღერა და იქვე ფოტოც დაურთო:
“პირველ რიგში, გთხოვთ, კარგად დააკვირდეთ ფოტოს _ ეს ანსამბლი “მხედრებია”, რომელსაც სახალხო ანსამბლის წოდება მიანიჭეს. არ მოგესმათ _ ლანჩხუთში სახალხო ანსამბლი “გვყავდა” _ ანსამბლი, რომელიც 2007 წლიდან მოღვაწეობდა 2022 წლამდე, სამწუხაროდ, ჩვენი ერთადერთი ანსამბლი, რომელიც ბევრ ღონისძიებაში იღებდა მონაწილეობას. სადაც კი ჩვენი დახმარება სჭირდებოდათ, იქ მივდიოდით და ლანჩხუთს გვერდით ვედექით.
ხალხნო, კარგად წაიკითხეთ _ ეს ანსამბლი გაგვიუქმეს. გაგვაუქმეს ყველა თანამშრომელი, გარდა მასწავლებლისა. ანუ რა გამოდის _ მასწავლებელმა დარბაზში მარტო უნდა იცეკვოს?! უკაცრავად და როგორი განათლებულები და განვითარებულები ბრძანდებით, ჩვენო დამანგრეველებო!
იცით, რა არის სირცხვილი?! აი, ეს, რაც ჩვენთან ხდება! თეატრი, კულტურის სახლი სად არის, რა არის? ამიხსენით, მხოლოდ შენობა და უბრალოდ, შენობაში მოქმედი თანამშრომლები? სად არის ანსამბლი, სად არის ბენდი?! მიპასუხეთ!
ჩვენი ანსამბლი გააუქმეს უეცრად. აი, უპასუხოდ. პასუხს არავინ გვცემს, მაგრამ გაგონილი მაქვს, ბიუჯეტი არ გვაქვსო. ბოდიში და რომელ ბიუჯეტზე ლაპარაკობთ, როდესაც 10, 15 წლის მოცეკვავეებს 60 ლარი რომ გვქონდა ხელფასი და ჯამში 2 000 ლარიც რომ არ გამოდის?! გრცხვენოდეთ! აი, იცით, როგორი მომენტი მაქვს, რომ არ ვიცი, რა ვაკადრო და რა ვუწოდო ამ საქციელს.
აქ ძალიან ბევრნი ხართ და ვფიქრობ, ყველანი უნდა ფიქრობდეთ ჩვენს, ახალგაზრდების განვითარებაზე და წინსვლაზე. ლანჩხუთს ისევ სჭირდება ანსამბლი “მხედრები”. როცა მათ “აწყობდათ”, მაშინ გვიშვებდნენ ჩიბათის ვითომდა თეატრში კონცერტის გასაკეთებლად. აი, ამაზე მეტი სამარცხვინო რა უნდა იყოს? დაფინანსება როცა ვითხოვეთ, რომ გასტროლს გავაკეთებთო, ისევ ბიუჯეტზე დაიწყეს ლაპარაკი. კედელს ცერცვი შეაყარეო, ეგრე გვჭირს ჩვენ მათთან, მაგრამ ვიმედოვნებ ბევრნი ვიქნებით და ისევ აღვადგენთ წლების წინ დაარსებულ ანსამბლს და არ მივცემთ ამის უფლებას.
ჩვენ ბრძოლა შეგვიძლია… აი, მანდ სკამებზე რომ სხედხართ და ბრძანებებს იძლევით, რომ ჩვენ 60 ლარზე უნდა ვიცეკვოთ. დაგველოდეთ _ 60 ლარი სანატრელი გახდება. ანსამბლი “მხედრები” არ აპირებს დანებებას, არ აპირებს გაანადგურებინონ ის, რაც დიდი შრომით შეიქმნა. ჩვენ ისევ დავბრუნდებით! თქვენი იმედიც მაქვს, ჩემო მეგობრებო!
და ბოლოს, ძალიან დიდი მადლობა მინდა გადავუხადო ჩვენს ქორეოგრაფ ბატონ მელის ნადირაძეს, რომ 300 ლარად ოზურგეთიდან თავისივე ტრანსპორტით ჩამოდის და ჩვენზე, ჩვენს განვითარებაზე ზრუნავს”, _ დაწერა სოციალურ ქსელში ნატალი ტაკიძემ.
ნატალი ტაკიძის ამ პოსტს არაერთი გამოხმაურება მოჰყვა და ყველა ერთმნიშვნელოვნად თანხმდება, რომ ეს არასწორი გადაწყვეტილებაა.
თათია წილოსანი: “კულტურის სახლში ანსამბლის ფუნქციონირება შეაჩერეს ბიუჯეტის არ ქონის გამო.
ვაი, ჩვენო დღეო და მანდ აღორძინებულო, დიდი ხნის მკვდარო, კულტურავ!”
“სად გინახავთ? კულტურის სახლში რა უნდა სიმღერას და ცეკვას?!” _ ირონიას არ იშურებს ფაქტის შეფასებისას ლანჩხუთელი მერაბ ჩხაიძე.
გია იმნაიშვილი: “ვისაც ანსამბლის გაუქმება პირველად თავში გაუელვა და ვინც ამ გადაწყვეტილებას მხარი დაუჭირა, ყველანი ხელოვანი ხალხის მტრები ხართ. ანსამბლს კეთილდღეობას პირდებოდით და საერთოდ გააუქმეთ! ანსამბლი, რომელმაც არაერთხელ ასახელა ლანჩხუთი. მე ვუსვამ კითხვას ადგილობრივ ხელისუფლებას _ საზოგადოებას რომ პირდებით, ჩვენთვის პრიორიტეტი ახალგაზრდების დასაქმებააო, ეს არის ის დასაქმება, ღირსეულებს სახლში რომ უშვებთ? ლანჩხუთელი ხელოვანი ხალხი ერთად დადგება მოცეკვავეთა ღირსებისა და სიმართლის დასაცავად, მაგრამ ეს ვიღაცის შურისძიებაა ანსამბლის მიმართ. მალე გამოჩნდება ავტორიც, რომელსაც აზღვევინებს საზოგადოება”.
თაკო მგელაძე: “რა განუკითხაობა ხდება მაგ თეატრში? არაერთი თაობა აღიზარდა, ნანული ჩავლეიშვილმა ეპოქა შექმნა მანდ. შემდეგაც იყო კარგი რაღაცეები, მაგრამ ბოლო დროს მხოლოდ განადგურებაზე არიან გადასულები. რა კრიტერიუმებით ირჩევიან თანამშრომლები?! ფუნქცია მხოლოდ ხელფასია?! კულტურას რას უშვებიან! მარაზმი ის არის, ეს ანსამბლი სახე იყო ლანჩხუთის კულტურის და ვითომც არაფერი, ერთი ხელის მოსმით ანადგურებენ! სირცხვილის განმარტება და მნიშვნელობა იქნებ ამოიკითხონ სადმე!”
“ვერ ვხდები, ამაზე რა კომენტარი უნდა გააკეთო, ლოგიკა სად არის _ მოცეკვავეებს ათავისუფლებ და მთავარ ქორეოგრაფს ტოვებ. ასეთი აბსურდი მხოლოდ აქ შეიძლება მოხდეს. ამ ანსამბლში სისხლი და ოფლი მაქვს ჩაქცეული. მახსოვს, როგორ დაუღალავად და შემართებით ვშრომობდით, სამწუხაროდ, ისიც მახსოვს, როგორ გვმტრობდნენ და მიიყვანეს ანსამბლი სრულ დაშლამდე. ამაზე ვიღაცამ ხომ უნდა აგოს პასუხი?! მახსოვს, ჰპირდებოდნენ, სუხიშვილების მოცეკვავეებს ჩამოვიყვან და მასტერკლასებს ჩავატარებთო. სად არიან ის ხელმძღვანელები, ამას რომ ჰპირდებოდნენ და ჩემ წინააღმდეგ აქეზებდნენ მოცეკვავეებს?! მახსოვს, მაშინაც ასე დამიდგნენ მოცეკვავეები გვერდით, მაგრამ ძალა აღმართს ხნავსო, უფროსობამ გადაწყვიტა, მე წავსულიყავი და რატომ? მართლა გაგეცინება, მთავარი ქორეოგრაფი დატოვეს და მოცეკვავეები გაათავისუფლეს, ამაზე სამარცხვინო და სასაცილო რა უნდა მოხდეს კულტურის სახლში… რა აბსურდის თეატრში ვცხოვრობთ. ჰეეე…” _ საკუთარ პოზიციას აფიქსირებს ერთ-ერთი ლანჩხუთელი ქორეოგრაფი.
რატომ მიიღო მუნიციპალიტეტმა სახალხო ანსამბლის გაუქმების გადაწყვეტილება, “გურია ნიუსი” ამის გარკვევას უშუალოდ მუნიციპალიტეტის მერისგან შეეცადა, თუმცა, ალექსანდრე სარიშვილმა ტრადიციისამებრ, ჩვენი სატელეფონო ზარი უპასუხოდ დატოვა.
რაც შეეხება მერის პირველ მოადგილეს, ეკატერინე გუჯაბიძეს, იგი ყველანაირ პირად ინტერესს გამორიცხავს და ამბობს, რომ ანსამბლი რეორგანიზაციის შედეგად გაუქმდა:
“არანაირი პრობლემა ბატონ მელისსთან არ ყოფილა. ეს პრობლემა რომ ყოფილიყო, მაშინ ბატონი მელისიც მოყვებოდა რეორგანიზაციაში. იგი ჩვეულებრივად აგრძელებს ჩვენთან თანამშრომლობას, ხელშეკრულება ჩვეულებრივად უგრძელდება. მოხდა რეორგანიზაცია, მათ შორის, სხვა რაღაცეებიც გამოეყო კულტურას, აქედან გამომდინარე, გაუქმდა ანსამბლი. ანაზღაურებაც ეძლეოდათ, რომელიც, შესაძლოა, მინიმალურია და თუმცა, იყო ანაზღაურების თემაც. სადღაც სამი წელია, პანდემიიდან გამომდინარე, არ ფუნქციონირებდა ეს ანსამბლი. გადაწყვეტილება მივიღეთ და რეორგანიზაციის შედეგად, უბრალოდ, გაუქმდა ანსამბლი, არანაირი პირადი ინტერესები არ ყოფილა”, _ ამბობს ეკატერინე გუჯაბიძე.
ანსამბლ “მხედრების” ირგვლივ მიმდინარე პროცესებთან დაკავშირებით საკუთარი პოზიცია მელის ნადირაძემაც დააფიქსირა. იგი მომხდარში მუნიციპალიტეტის ხელმძღვანელობას დებს ბრალს.:
“მიუხედავად ანსამბლის დიდი წარმატებისა, რომელიც თითოეული მოცეკვავის, მუსიკოსის თუ ხელმძღვანელის თავდაუზოგავი შრომის ხარჯზე მოხდა, ადგილობრივი ხელმძღვანელობა მოსვლის დღიდან დაუჯერებელი მიზეზების გამო ებრძოდა ჩვენს საქმეს და წარმატებას. ელემენტარული საარსებო მინიმუმი არ გასცა მშრომელი ხალხისთვის, რომლებიც ხელოვნებას და რეგიონს დიდი წარმატებებით ემსახურებოდა (რომ არა ეს სამარცხვინო გადაწყვეტილება, დღემდე მოწოდების სიმაღლეზე იქნებოდა ჩვენი გუნდი). მეტიც, ანსამბლის მოცეკვავეთა საერთო ხელფასის რაოდენობაზე მეტი ფული დახარჯა ქალაქის ბიუჯეტიდან იმის მტკიცებაში, რომ 320 ლარზე მომუშავე ოზურგეთელი ქორეოგრაფი აუცილებლად დასათხოვია სამსახურიდან, რადგან ის ლანჩხუთელი არ არის (ორი სასამართლო დავა წააგო მათმა დაქირავებულმა კოსტუმიანმა ადვოკატმა). არა იმიტომ, რომ ანსამბლი წარმატებას ვერ აღწევს, ან მუშაობის ხარისხი არ მოსწონთ, არამედ საცხოვრებელი, გეოგრაფიული წუნია მთავარი ქორეოგრაფის ბიოგრაფიაში.
ყველაზე გულდასაწყვეტი ისაა, რომ სრულად გაანადგურეს ანსამბლის თავდაუზოგავი შრომით მიღწეული შედეგი და ასევე, მომავალზე ორიენტირებული კოლექტივი. ეს სამარცხვინო პროცესები, რომელიც ყოველ ჯერზე უფრო მეტად აჩენს, რა ჯოჯოხეთთან გვაქვს საქმე, თითქმის ორი წელია, მიმდინარეობს. ვერც ერთ ინსტანციაში და ვერც ერთი ლანჩხუთელი თუ ოზურგეთელი ადამიანის თავში ვერ მართლდება ამ სამარცხვინო აქტის მიზეზები, მაგრამ მაინც გრძელდება მტკიცება”, _ დაწერა სოციალურ ქსელში მელის ნადირაძემ.
ავტორი
