საქალაქთაშორისო ტრანსპორტზე შეზღუდვა მოიხსნა სამტრედიაშიც. თუმცა, მეორე დღეა, სამარშრუტო ტაქსები თითქმის მგზავრების გარეშე გადაადგილდებიან.
,,სამთვიანი პაუზის შემდეგ, მართალია, გამოვედით სამუშაოდ, მაგრამ რად გინდა, მარტვილიდან რომ ცარიელი წამოხვალ და საღამოს მარტვილში ცარიელი დაბრუნდები, ამას მუშაობა ჰქვია? ავტოსადგურის ადმინისტრაცია გვეუბნება, ხალხი არ არის კარგად ინფორმირებულიო და ჩვენც ამის იმედი გვაქვს, რომ გაიგებენ, საზოგადოებრივი ტრანსპორტი გაეშვა, მგზავრებიც მოგვემატება”,_ განაცხადა დღეს ,,გურია ნიუსთან” საუბრისას სამარშრუტო ტაქსის მძღოლმა, თამაზ ძნელაძემ.
საქალაქთაშორისო ტრანსპორტის მძღოლებს მგზავრები ძველი საფასურით გადაჰყავთ, თუმცა შპს ,, მოგზაურის” დირექტორი, ჯონი სტურუა, სიტუაციიდან გამომდინარე, დღეისთვის არსებული ფასების შენარჩუნების გარანტიას ვერ იძლევა:
,,დღესდღეობით ძველი ტარიფია შენარჩუნებული, მაგრამ, არ მგონია, ასე დიდხანს გაგრძელდეს. მძღოლები უკმაყოფილონი არიან, გაიზარდა საწვავის ფასი, შემცირდა მგზავრთა რაოდენობა. აღარ უღირთ მუშაობა. ქუთაისის ხაზი ორ ლარ ნახევარზე დადის, მაგრამ, არის საუბარი, 15 მარტიდან სამი ლარი გახდეს.“
მგზავრები ჩვენთან საუბრისას საქალაქთაშორისო ტრანსპორტის მუშაობის გამო კმაყოფილებას გამოთქვამენ.
ადამიანები, რომლებიც უტრანსპორტობის გამო სამი თვე, ქალაქგარეთ გასვლას ვერ ახერხებდნენ ან მგზავრობა ძვირი უჯდებოდათ, ამბობენ, რომ მგზავრობის საფასურის გაზრდის შემთხვევაში სხვა გზა არ ექნებათ, უნდა გადაიხადონ.
,,აუცილებელი იყო ქუთაისში მემგზავრა. ვინაიდან საკუთარი ავტომობილი არ მაქვს, დაქირავებული ტაქსით მივდიოდი, რაც სოლიდურ ხარჯებთან იყო დაკავშირებული. მიხარია, საზოგადოებრივი ტრანსპორტი რომ აღდგა. ამბობენ, 15 მარტიდან, ქუთაისი- სამტრედიის ხაზზე სამი ლარი გახდება მგზავრობაო. რა ვქნა, იძულებული ვიქნები, გადავიხადო” , _ გვითხრა მგზავრმა ნინო მიქაძემ.
