გუშინ ცნობილი გახდა რომ იტალიურმა კლუბებმა უკრაინიდან და რუსეთიდან ფეხბურთელების ტრანსფერებზე ოფიციალურად უარი განაცხადეს. მიუხედავად იმისა, რომ ფიფამ მწვანე შუქი აუნთო 7 აპრილამდე უკრაინული და რუსული კლუბებიდან ტრანსფერებს, იტალიაში გადაწყვიტეს, რომ ამ შესაძლებლობით არ ისარგებლონ.
„სერია A“-ს კლუბებმა ეს გადაწყვეტილება ერთხმად მიიღეს. შეთანხმება მიღწეული იქნა არაოფიციალურად, კლუბების ხელმძღვანელებს შორის ჯენტლმენური შეთანხმებით, რათა დახურულ სატრანსფერო პერიოდში კონკურენციის პირობები არ შეცვლილიყო.
ხვიჩა კვარაცხელიას ბოლო პერიოდში „ნაპოლის“ უკავშირებდნენ, მაგრამ 21 წლის ქართველი შემტევი მიმდინარე სეზონს ბათუმის „დინამოში“ დაასრულებს.
გუშინვე, იტალიურმა „Gazzetta Dello Sport“ გაავრცელა ინფორმაცია რომ ხვიჩა კვარაცხელიას მიმართ ინგლისური „ტოტენჰემი“ და „ლიდსი“ დაინტერესებას ისევ გამოხატავენ. შეთავაზებები სავარაუდოდ, ზაფხულის სატრანსფერო ფანჯრის გახსნისთანავე გაკეთდება და კვარაცხელიას ღირებულება 15 მილიონი ევრო იქნება.
„ლიდსი“ მალე რაფინიას გარეშე დარჩება. რაც შეეხება „ტოტენჰემს“, მისი მთავარი მწვრთნელი ანტონიო კონტე ყველაფერს აკეთებს, შეტევაში წარმატება მხოლოდ კეინისა და სონის თამაშზე დამოკიდებული რომ არ იყოს.
გუშინ ახლო წარსულში ცნობილმა ფეხბურთელმა ანზორ კავაზაშვილმა ხვიჩა კვარაცხელიას შესახებ კომენტარი გააკეთა.
„მუქარა ფეხბურთელის ოჯახზე? მე აღშფოთებული ვარ ამით, როგორ შეიძლება ამის გაკეთება? როგორ შეიძლება ქართველები რუსების წინააღმდეგ განაწყო ან პირიქით, ეს ხომ აბსურდია? ჩვენ ხომ ორივე მართლმადიდებლები ვართ და მუდამ ერთმანეთს მხარს ვუჭერდით? სადამდე მივიდა მსოფლიო? უნდა გესმოდეთ, რომ მას და მის ოჯახს ემუქრებიან და ის საქართველოში უნდა დარჩეს. სხვა შემთხვევაში მას და მის ოჯახს შესაძლოა, რამე დამართონ. რასაკვირველია, ეს „რუბინზე“ ცუდად აისახება, განსაკუთრებით, ახლა, როცა გუნდი არც ისე კარგად გამოიყურება. ხვიჩა კარგი ბიჭია. ვწუხვარ, რომ მას საქართველოში უწევს გაქცევა, სადაც წასვლა არ უნდა. საქართველოში ახლა ფეხბურთის დონე ძალიან დაბალია. ის რუსეთში ვითარდებოდა და „რუბინის“ შემდეგ მისთვის კარი ღია იყო კარგ მოსკოვურ გუნდში ან ევროპაში და ძალიან ვწუხვარ, რომ ეს ასე დამთავრდა“. – განაცხადა ანზორ კავაზაშვილმა.
გუშინ ცნობილი გახდა რომ ხელბურთელ ვაჟთა ევროპის 2024 წლის ჩემპიონატის ფინალურ ეტაპზე, რომელსაც 10-28 იანვარს გერმანია უმასპინძლებს, მედლებისთვის 24 ნაკრები იასპარეზებს. ოთხი მათგანის ვინაობა ცნობილია: მასპინძელი გერმანია, მოქმედი ჩემპიონი შვედეთი, პრიზიორები – ესპანეთი და დანია. დანარჩენი 20 საგზურის მოსაპოვებლად წლეულს ოქტომბერში 32 გუნდი იბრძოლებს. ისინი წილისყრით 8 ჯგუფში გადანაწილდებიან. თითოეულიდან ორ-ორი უძლიერესი და მესამეადგილოსანთა შორის ოთხი საუკეთესო გერმანიაში გამგზავრების უფლებას მოიპოვებს. საგზურებისთვის იბრძოლებს საქართველოს ნაკრებიც. მას შემდეგ, რაც ჩემპიონატიდან რუსეთისა და ბელარუსის გუნდები მოკვეთეს, მათი ადგილი საქართველოსა და ლუქსემბურგის ხელბურთელებმა დაიკავეს.
საკვალიფიკაციო ტურნირის წილისყრა გერმანიაში წლეულს 31 მარტს გაიმართება და გაირკვევა, ჯგუფებში ვინ ვის დაუპირისპირდება.
გუშინ საბოლოოდ გაირკვა რომ საქართველოს წყალბურთელთა ნაკრები ისტორიაში პირველად მსოფლიოს ჩემპიონატზე იასპარეზებს! გუშინ საწყლოსნო სახეობების საერთაშორისო ორგანიზაციამ რუსეთი ოფიციალურად ჩამოაშორა ყველა საერთაშორისო ტურნირს, მათ შორის მსოფლიოს ჩემპიონატსაც.
გადაწყვეტილია, ვინ შეცვლის რუსეთის ნაკრებს მსოფლიოს ჩემპიონატზე – ქალთა შორის ეს იქნება იაპონიის ნაკრები, ვაჟებში კი – საქართველო!
მსოფლიოს ჩემპიონატი უნგრეთში მიმდინარე წლის 20 ივნისიდან 3 ივლისამდე გაიმართება. ვაჟთა შორის 16 გუნდი მიიღებს მონაწილეობას: უნგრეთი, მონტენეგრო, აშშ, სერბეთი, საბერძნეთი, ესპანეთი, ხორვატია, იტალია, გერმანია, კანადა, ბრაზილია, ყაზახეთი, იაპონია, სამხრეთ აფრიკა, ავსტრალია და საქართველო.
უკრაინა-რუსეთის საომარ დაპირისპირებას 11 წლის მარიუპოლელი ტანმოვარჯიშე კატერინა დიაჩენკო შეეწირა.
მარიუპოლში დიაჩენკოს სახლი დაბომბეს, რის შედეგადაც მამამისიც დაიღუპა, ხოლო დედა და მისი ძმა სიკვდილს გადაურჩნენ. კატერინა სახლის ნანგრევებში გარდაიცვალა, მის ძმას კი ფეხები აქვთ დაზიანებული და დედასთან ერთად ისევ დაბომბვის ადგილზე რჩება, რადგან მათი ევაკუაცია ჯერჯერობით შეუძლებელია.
„კატერინას ბევრი ოცნება და წინ ფანტასტიკური ცხოვრება ჰქონდა, მაგრამ ვეღარასოდეს შეძლებს ცეკვას. ის გარდაიცვალა. რუსებს სურთ, ქალაქი მარიუპოლი ფერფლად აქციონ. პირველივე დღიდან ჩემი მთავარი მიზანი იყო, რაც შეიძლება მეტი ბავშვი გადამერჩინა ამ საშინელებისგან. ვამაყობდი ჩემი თავით, რომ ბევრი მათგანის დახმარება შევძელი, მაგრამ ახლა ვტირი, რომ ამ პატარა გოგონას ვერ დავეხმარე. როდის დავუშვით ჩვენ, სამყარომ, რომ ეს მომხდარიყო? რუსეთში არსებობენ ორკები ან ზომბები, ისინი ადამიანები არ არიან, მაგრამ ჩვენ, ნორმალური ხალხი? პოლიტიკოსები? როგორც შეგვეძლო ეს დაგვეშვა? კატია მხოლოდ იმიტომ დაიღუპა, რომ ის ნატოს არაწევრ ქვეყანაში დაიბადა გიჟ მეზობელთან ერთად? რა იყო მისი ბრალი? ცოცხლად დამარხული ხალხია, ასობით და ათასობით, რომლებიც მიწისქვეშა თავშესაფრებიდან ვერ გადიან. უბრალოდ მინდა, რუსმა სპორტსმენებმა ნახონ ეს ფოტო და შეიგნონ, რომ რაც ხდება, რეალობაა“. – დაწერა ტანვარჯიშის მწვრთნელმა ლიდია ვინოგრადნამ.
