იტალიის „სერია A“-ს მეცხრე ტურში, „ნაპოლიმ“ სტუმრად „ვერონას“ 3:1 აჯობა, ხვიჩა კვარაცხელიამ კი ბრწყინვალედ ითამაშა და დუბლი შეასრულა.
ანგარიში 27-ე წუთზე მატეო პოლიტანოს გოლით გახსნა, ხოლო 43-ე წუთზე კვარამ სხვაობა გააორმაგა. მან მცველი მოატყუა და მარცხენა ფეხით მეკარეს ახლო კუთხეში გაუტანა. ხვიჩამ გოლი მშვილდოსნის სტილში აღნიშნა, რამაც „ვერონას“ ფეხბურთელების გაღიზიანება გამოიწვია და ფეხბურთელებმა იჩხუბეს კიდეც.
55-ე წუთზე ქართველმა ფეხბურთელმა მეორეც გაიტანა. ტექნიკურად ითამაშა, მცველს გვერდი აუარა და მეკარეს იოლად აჯობა. ეს ხვიჩას იტალიურ კარიერაში მეორე დუბლია.
მე-60 წუთზე ვერონელებმა ერთი ბურთი გაქვითეს. რუდი გარსიამ ქართველი შემტევი 76-ე წუთზე შეცვალა.
მატჩის შემდეგ, „ნაპოლის“ ფეხბურთელმა ჯაკომო რასპადორიმ განაცხადა, რომ ხვიჩა კვარაცხელიას მსგავსი თანაგუნდელის ყოლა მათ ძალიან ეხმარებათ.
„კვარაცხელია? ასეთი თანაგუნდელის ყოლა ძალიან გვეხმარება. დღეს ყველა ერთმანეთისთვის ვიბრძოდით, რაც თამაშმა მოითხოვა. ჩემი პოზიცია? ცენტრიდან თამაში მიყვარს, მაგრამ ჩემი თვისებებიდან გამომდინარე, მოედნის სხვა ნაწილშიც შემიძლია თამაში“, – თქვა რასპადორიმ.
ხვიჩა კვარაცხელიას მიერ გოლის აღნიშვნის ახალ სტილს იტალიაში დიდი გამოხმაურება მოჰყვა. უფრო მეტიც, „ვერონას“ ფეხბურთელებმა თავიდან ეს ჟესტი არასწორად გაიგეს და ფეხბურთელებს შორის კამათიც მოხდა.
ტელეკომპანია DAZN ამტკიცებს, რომ კვარას ეს ჟესტი MMA-ს ცნობილ მებრძოლ ისრაელ ადესანიას უკავშირდება, რომელიც გამარჯვებას ასე აღნიშნავს.
„სწორედ აქედან მოდის კვარას ახალი აღნიშვნა. საქართველოში MMA ძალიან პოპულარული სპორტია, რომელიც კვარაცხელიასაც მოსწონს. თქვენი აზრით, კვარა დღეს საღამოს UFC294-ს უყურებს?“ – წერს DAZN.
„ნაპოლის“ მთავარმა მწვრთნელმა რუდი გარსიამ „ვერონასთან“ მატჩის შემდეგ ხვიჩა კვარაცხელიაზე ისაუბრა.
„ბოლოს და ბოლოს, ჩემს ხელში საუკეთესო კვარაა? ის უკვე დაბრუნდა „უდინეზესთან“ მატჩში. ახლა თავისუფლად უტევს და როცა ასეა, მეტოქის დაცვას ამძიმებს, რითაც განსხვავებას ქმნის. დღეს გადამწყვეტი იყო და ძალიან მიხარია მის გამო. გოლის აღნიშვნა? არ ვარ წინააღმდეგი, სანამ ეს ისრები მე არ მხვდება, არ ვიცი, ვკითხავ მიზეზს, თუ რატომ აღნიშნავს ასე.
ხარისხი ვაჩვენეთ და ბევრი საგოლე მომენტი შევქმენით. ეს მნიშვნელოვანი გამარჯვებაა, მაგრამ ვცდილობთ, ყველა თამაში მოვიგოთ და დღეს მოვახერხეთ საკუთარი თავის გამოხატვა. გუნდმა კარგად ითამაშა, მეტი გოლის გატანა შეგვეძლო, მაგრამ რომ არა მერეტი, შეიძლებოდა მეტიც გაგვეშვა, ამიტომ, მინდა ალექსი შევაქო. დანარჩენი, კმაყოფილი ვარ იმ ინტენსივობით, რაც ბიჭებმა აჩვენეს. ახლა, ჩემპიონთა ლიგის მატჩისთვის მოვემზადებით და ვეცდებით, ენერგიის აღდგენას“, – განაცხადა რუდი გარსიამ.
იტალიურმა მედიამ ხვიჩა კვარაცხელია მატჩის საუკეთესო ფეხბურთელად მიიჩნია და მისი გარჯა ასე შეფასდა:
Eurosport 8 ქულა: „ნამდვილი კვარა დაბრუნდა, რომელიც უმიზნებს მეტოქეს, როგორც კი ეს შეუძლია და რომელიც, პირველ რიგში, მომაკვდინებელია, როცა კარში დარტყმა შეუძლია. სეზონის პირველი დუბლი და გოლების გარდა, ბევრი კარგი რაღაც“.
Tuttomercatoweb 7.5 ქულა: „მეორე გოლის შემდეგ ისრები გაისროლა „ნაპოლის“ ფანებისკენ, რომლებსაც უკვე დიდი ხანია ის უყვარდათ, მაგრამ კიდევ ერთხელ აიძულებს მათ შეიყვარონ ეს გუნდი, რომელსაც ბოლო დროს ბევრი კრიტიკა შეხვდა. დრიბლინგი მისი საფირმო ნიშანია, რომელიც ხალხში აღტაცებას იწვევს. თუ მას სივრცეს დაუტოვებ, მიუწვდომელი ხდება“.
Calcionapoli24 7.5 ქულა: „დაბრუნდა მინდორზე, სადაც პირველად წარმოაჩინა თავისი ნიჭი იტალიაში. უამრავი ჯარიმა გამოიმუშავა, მეტოქე გააყვითლა, ანგარიში ორამდე ცივსისხლიანი მოქმედებით გაზარდა. მეორე ტაიმის დასაწყისში დამამშვიდებელი გოლი გაიტანა. ყველაფერი გააკეთა და ასეთი ნიჭი გვიყვარს“.
Tuttonapoli 8 ქულა: „შეტევაში ყველგანაა, სარგებლობს რასპადორის მობილურობით და ქაოსს იწვევს. როგორც „მონცასთან“, ახლაც პირველი გოლი იგივე სტილში გაიტანა, მარჯვენა ფეხით მეტოქე მოატყუა და მარცხენათი გაიტანა. დუბლი ცივსისხლიანი დარტყმით გაიფორმა“.
Calciomercato.com 8 ქულა: „გუნდს თავისი მხრებით უზარმაზარი ხარისხით ატარებს. მან გადარია ვერონელთა დაცვის ხაზი და პირველი გოლი „კვარას“ სტილში გაიტანა. შემდეგ დუბლი გაიფორმა, როდესაც თავისუფალ სივრცეში გაფრინდა“.
Calciomercato.it 8.5 ქულა: „როცა ასე თამაშობს, აბსოლუტური სიამოვნება ხდება. ატყუებს, პასს აკეთებს, ურტყამს, გოლს იტანს და უამრავ სასიამოვნო რაღაცას აკეთებს“.
Calcionapoli1926 8 ქულა: “დუბლი და შესანიშნავი თამაში. მისი მატჩი სპექტაკლი იყო. შემოთავაზებული დონე შარშანდელია და ასეთი კვარას წინააღმდეგ მეტოქეებს მხოლოდ მტვრის ჭამა შეუძლიათ“.
ავტორი
