კატარის მუნდიალის მორიგი სათამაშო დღე შვეიცარიისა და კამერუნის დაპირისპირებით გაიხსნა. როჟე მილას თანამემამულეები ძალიან ეცადნენ, მაგრამ მინდორი მაინც თავჩაღუნულებმა დატოვეს – 0:1.
ურუგვაისა და სამხრეთ კორეის გუნდები ნამდვილად ცდილობდნენ, მაგრამ ერთი კინკილა ბურთის გატანაც კი ვერ მოახერხეს – 0:0.
პორტუგალიის ნაკრებმა ერთ–ერთი ფავორიტის წოდება გაამართლა და განა დაამარცხა – 3:2. საინტერესოა რომ ერთი გოლი კრიშტიანუ რონალდუს ანგარიშზეა. აღსანიშნავია რომ „ვარსკვლავთბიჭუნამ“ ზედიზედ მეხუთე მსოფლიოს პირველობაზე მოახერხა მეტოქის კარის დალაშქვრა.
ბრაზილიის ნაკრებმა ალბათ პირველ ტურში ყველაზე ძლიერი გუნდის შთაბეჭდილება მოახდინა და სერბეთის ეროვნული გუნდი პრობლემების გარეშე დაამარცხა – 2:0.
გუშინ, მსოფლიო ჩემპიონატის შესახებ ნეაპოლელმა ჟურნალისტმა კარლო ალვინომ ისაუბრა და განაცხადა, რომ ხვიჩა კვარაცხელია მუნდიალს ძალიან აკლია.
„ჩემი აზრით, ეს მსოფლიოს ჩემპიონატი ნამდვილად კარგი პლაცდარმი იქნებოდა ისეთი ტალანტებისთვის, როგორებიც ხვიჩა კვარაცხელია, ვიქტორ ოსიმენი და ჯოვანი დი ლორენცო არიან. სამი ძლიერი მოთამაშე, რომლებსაც დიდი ხნით უწევთ უთამაშებლად ყოფნა. კვარაცხელია მსოფლიოს ჩემპიონატისთვის ნამდვილი ნაპერწკალი იქნებოდა. ამ დროისთვის მუნდიალზე დიდი მატჩები არ ყოფილა“.
გერმანია – იაპონიის შეხვედრა და დაფიქსირებული მოულოდნელობა კვლავ დიდი სჯა–ბაასის საგანია. იაპონიის ნაკრების მთავარმა მწვრთნელმა ჰაჯიმე მორიასუმ გერმანიის ნაკრებთან გამარჯვებას ისტორიული უწოდა.
„ჩვენი ბევრი ფეხბურთელი სათამაშოდ გერმანიაში წავიდა, რათა უნარები იქ განევითარებინათ და მათ ეს უნარები დღეს აჩვენეს. ეს არის დიდი სიურპრიზი და ისტორიული მომენტი იაპონიისთვის. გერმანიაში ბევრი დიდი მოთამაშეა, რომლებმაც წვლილი შეიტანეს იაპონური ფეხბურთის განვითარებაში. ჩვენ გვინდა გავაგრძელოთ გერმანიიდან სწავლა, ეს ჩვენი ფეხბურთის მომავალი იქნება. მოთამაშეები ნამდვილად ერთ გუნდად შეიკრნენ, კარგად მოვემზადეთ, გამართულად ვითამაშეთ და სწორედ ამან განაპირობა გამარჯვება. ჩვენი ბევრი გულშემატკივარი იყო დოჰაში, მათ გვიბიძგეს გამარჯვებისკენ, ახლა კი მინდა, რომ ამ წარმატების შემდეგ სიმშვიდე შევინარჩუნოთ. უნდა ვიმუშაოთ იმაზე, რისი გაკეთებაც უკეთესად შეგვეძლო და მომდევნო მატჩის მოგება უნდა ვცადოთ“, – თქვა მორიასუმ.
მატჩის შემდეგ ბუნდესგუნდის მთავარმა მწვრთნელმა ჰანსი ფლიკმა გერმანულ მედიასთან ისაუბრა და განაცხადა, რომ მარცხი ინდივიდუალური შეცდომებით იყო გამოწვეული.
„ძალიან დიდი იმედგაცრუებაა არა მხოლოდ ჩემთვის, არამედ მთელი სამწვრთნელო შტაბისა და ფეხბურთელებისთვის. დამსახურებულად დავწინაურდით, მეორე ტაიმშიც გოლის გატანის უამრავი შანსი გვქონდა. იაპონიამ დღეს აშკარად ეფექტიანობით გვაჯობა და ამიტომაც გაიტანეს ჩვენზე მეტი გოლი. ინდივიდუალური შეცდომები გვქონდა, რის გამოც საფასურის გადახდა მოგვიწია.
არის რაღაცები, რაც უკეთ უნდა გავაკეთოთ, მაგრამ გვაქვს საჭირო ხარისხი, რომ ესპანეთის დამარცხება შევძლოთ. ახლა აქცენტი ამაზე გვაქვს გაკეთებული. მიულერის შეცვლით თამაშში ახალი ენერგიის შეტანა გვინდოდა. ვფიქრობ, წაგება ინდივიდუალური შეცდომების შედეგია, რისი დაშვებაც არ შეიძლება. ეს აღარ უნდა მოხდეს. ესპანეთი იაპონიისგან განსხვავებული გუნდია. თამაშამდე ვთქვი, რომ იაპონია ჭკვიანი გუნდია და დღეს ეს დავინახეთ. ძალიან სწრაფად თამაშობენ და რამდენიმე სიტუაციაში ცხოვრება ძალიან გაგვირთულეს. ახლა წინ უნდა ვიყუროთ, კიდევ ორი თამაში რჩება და 6 ქულა უნდა გათამაშდეს“, – თქვა ფლიკმა.
საინტერესოა, რომ გერმანიის ნაკრებმა ბოლო სამი დიდი ტურნირი მარცხით დაიწყო (მუნდიალი 2018 მექსიკასთან, ევრო 2020-ზე საფრანგეთთან და ახლა იაპონიასთან), ხოლო 2018 წლის მსოფლიოს ჩემპიონატიდან დიდ ტურნირებზე 8 მატჩიდან 5 წააგო.
მიუნხენის „ბაიერნის“ საპატიო პრეზიდენტი და წარსულში კლუბის ლეგენდარული თავდამსხმელი ული ჰიონესი მიმდინარე მსოფლიოს ჩემპიონატს გამოეხმაურა და აღნიშნა, რომ ის ფეხბურთისთვის მხოლოდ ზიანის მომტანი იქნება.
„ეს მსოფლიოს პირველობა წარმატებული ვერაფრით გახდება. ამ სახით მიმდინარე ტურნირი ფეხბურთს, საერთო ჯამში, მხოლოდ ზიანს მოუტანს. დაკვირდით რეიტინგებს და იმ განელებულ ენთუზიაზმს, რომელსაც ხალხი ჩემპიონატის მიმართ იჩენს. უკვე ცხადია, რომ კარგს არაფერს უნდა ველოდოთ. სხვა საქმეა, რომ ახლა ბოიკოტი უკვე წარმოუდგენელია. ქვეყნებს საკმარისი დრო ჰქონდათ, რათა სიტუაციაში კარგად გარკვეულიყვნენ და შესაბამისად ემოქმედათ. როგორც სჩანს, ევროპულ ფედერაციებს ჯერაც ვერ გაუგიათ, რეალურად რა ძალას წარმოადგენენ“.
აღსანიშნავია, რომ გერმანია – იაპონიის შეხვედრას გერმანიის შსს მინისტრი ნენსი ფეიზერი დაესწრო, რომელიც ფიფას პრეზიდენტის, ჯანი ინფანტინოს გვერდით „OneLove“ სამკლავურით იჯდა.
რამდენიმე ევროპული ნაკრებების კაპიტნები მუნდიალის მატჩებში ამ სამკლავურით გამოსვლას აპირებდნენ, თუმცა ფიფა სპორტული სანქციებით დაიმუქრა.
მატჩის შემდეგ აზიელ ფეხბურთელებს არც მათი გულშემატკივრები ჩამორჩნენ.
იაპონელ ფანებს შეხვედრამდე სპეციალურად ჰქონდათ მიტანილი ლურჯი პარკები, რაშიც მათი დაგროვილი ნაგავი ჩაყარეს და სტადიონის ტრიბუნები დაასუფთავეს.
აღსანიშნავია, რომ მსგავსი საქციელით იაპონელებმა თავი 2018 წელს, რუსეთში გამართული მუნდიალის დროსაც გამოიჩინეს.
მსოფლიო ჩემპიონატის ჯგუფური ეტაპის მატჩში, სადაც ბელგიამ კანადას 1:0 სძლია, რეკორდი დამყარდა.
კანადელთა რიგებში ძირითად შემადგენლობაში გახლდათ თურქული „ბეშიქთაშის“ ნახევარმცველი ატიბა ჰატჩინსონი. ის 39 წლისა და 288 დღის ასაკში გახდა ყველაზე ხანდაზმული მოთამაშე, რომელმაც მუნდიალის მატჩი სასტარტოში დაიწყო.
ესპანეთის ნაკრებმა კი მსოფლიო ჩემპიონატებზე ბურთის ფლობის რეკორდი დაამყარა. კატარის მუნდიალის ჯგუფური ეტაპის პირველ მატჩში ესპანელებმა კოსტა–რიკას 7:0 მოუგეს. ამ შეხვედრაში მათ ბურთი 81,7 % ხანგრძლივობით ეპყრათ და ამ მაჩვენებლით არგენტინის ნაკრების რეკორდი გააუმჯობესეს, რომელიც სამხრეთამერიკელებმა 2010 წლის მსოფლიო ჩემპიონატზე დაამყარეს ბერძნების წინააღმდეგ – 80,3 %.
სიტყვამ ესპანეთის ნაკრები მოიტანა და ეროვნული გუნდისა და „ბარსელონას“ თავდამსხმელმა, 22 წლის ფერან ტორესმა კოსტა რიკის წინააღმდეგ დუბლი შეასრულა, თუმცა ამ მსოფლიო ჩემპიონატზე სხვა მხრივაც მიიქცია ყურადღება.
მოთამაშის შეყვარებული ესპანელთა თავკაცის, ლუის ენრიკეს ქალიშვილი სირა მარტინესია, რომელიც თავისი შეყვარებულის მსგავსად, 22 წლის გახლავთ. მათ ერთმანეთი 2020 წელს გაიცნეს. იწერებოდა იმის შესახებაც, რომ ტორესს „მანჩესტერ სიტიდან“ „ბარსელონაში“ გადასვლა იმიტომ სურდა, შეყვარებულთან ახლოს რომ ყოფილიყო. გოგონა, რა თქმა უნდა, ბარსელონას „კამპ ნოუს“ ხშირი სტუმარია. რასაკვირველია ამჟამად კატარში იმყოფება და თავის გულისწორს თავდაუზოგავად ქომაგობს.
კატარის მუნდიალს ერთი არაოფიციალური გამარჯვებული უკვე ჰყავს, – 34 წლის ნიდერლანდელი გულშემატკივარი, რომელიც ამსტერდამიდან დოჰაში ველოსიპედით ჩავიდა,6381 კილომეტრი გაიარა და …თამაშზე არ დაუშვეს.
„წარმოუდგენელ თავგადასავალს ველოდი. მინდოდა, ეს რაღაც სპორტულისთვის დამეკავშირებინა. დოჰა დიდებული ადგილია. სურვილი მქონდა, რომ ნიდერლანდების პირველი შეხვედრა მენახა“, – განაცხადა 34 წლის ნიდერლანდელმა ფანმა.
როდესაც მამაკაცი სტადიონთან მივიდა, დაცვამ შიგნით შესვლის უფლება არ მისცა, რადგან „One Love“–ის სამკლავური და მაისური ეცვა.
გუშინ, ლეგენდარულმა იტალიელმა ფეხბურთელმა რობერტო ბაჯომ მსოფლიოს 1994 წლის ჩემპიონატის ფინალი გაიხსენა და განაცხადა, რომ მატჩს, რომელზეც მთელი ბავშვობა ოცნებობდა, ყველაზე აბსურდული დასასრული ჰქონდა.
„არასდროს დამავიწყდება. ფინალში ბრაზილიასთან თამაში იყო ოცნება, რომელიც ბავშვობაში მქონდა, ყოველთვის ეს მიზანი მქონდა. ათასჯერ მაქვს ნათქვამი, რომ ყოველ ღამე ბრაზილიასთან ფინალზე ვოცნებობდი. ეს მომენტიც დადგა და ყველაზე აბსურდულად დამთავრდა. პენალტი ჩვეული სიმშვიდით დავარტყი, მეკარის გადაადგილებას დაველოდე და მოხდა ის, რაც ყველამ ვიცით“, – აღნიშნა რობერტო ბაჯომ „Sky“–სთან ინტერვიუში.
შეგახსენებთ, რომ რობერტო ბაჯომ ბრაზილიასთან ფინალში პენალტების სერიაში თავისი დარტყმა გააცუდა და ჩემპიონი სამხრეთამერიკული გუნდი გახდა.
ავტორი
