გუშინ, იტალიურ მასმედიაში საინტერესო ინფორმაცია გავრცელდა. გამოცემა „Il Mattino“-ს მტკიცებით, ხვიჩა კვარაცხელიათი ინგლისური „ნიუკასლია“ დაინტერესებული. ბრიტანული კლუბი ამ ტრანსფერში დაახლოებით 90 მილიონ ევროს გადახდაზეა თანახმა.
ინგლისური კლუბის არაბ მფლობელებს, „მილანის“ მოთამაშე სანდრო ტონალის შემდეგ, იტალიაში თვალი კიდევ ერთ მოთამაშეზე უჭირავთ და ეს ხვიჩა კვარაცხელიაა. თუმცა, როგორც ირკვევა, კლუბის მფლობელ აურელიო დე ლაურენტისს ხვიჩას ტრანსფერზე სიტყვის გაგონება ჯერჯერობით არ სურს.
იტალიურ მედიაში გავრცელებულ ამ ინფორმაციას შესაბამისი გამოხმაურება უკვე მოყვა.
„შეთავაზებულია 90 მილიონ ევრო. ეს ცოტა არაა, მაგრამ არც ისე ბევრია იმასთან შედარებით, რასაც ინგლისში კვარაზე გაცილებით დაბალი დონის მოთამაშეებში იხდიან ხოლმე. ამ შემთხვევაში აურელიო დე ლაურენტისი მტკიცედ დგას და ამ ტრანსფერზე არც ფიქრობს, რადგან მას ჯერ ოსიმენის, კიმის შემცვლელის, ლოსანოსა და ზიელინსკის საკითხები აქვს მოსაგვარებელი“, – წერს ერთ-ერთი ადგილობრივი გამოცემა.
ფრანგული „ეკიპის“ ინფორმაციით, საქართველოს ეროვნული გუნდისა და „მეცის“ 22 წლის ფეხბურთელი გიორგი მიქაუტაძით დაინტერესებულ კლუბთა სიას იტალიური „რომაც“ შეუერთდა.
ჯერჯერობით ჟოზე მოურინიოს გუნდს „მეცისთვის“ ოფიციალური შეთავაზებით ჯერ არ მიუმართავს. „რომამდე“ ქართველი შემტევით დაინტერესება კიდევ ერთმა დედაქალაქურმა კლუბმა „ლაციომ“ გამოთქვა. უფრო ადრე გიორგის „მილანსა“ და „იუვენტუსსაც“ უკავშირებდნენ, თუმცა ამ შემთხვევაშიც მოლაპარაკებებამდე საქმე არ მისულა.
„მეცი“ ქართველი ფეხბურთელის სანაცვლოდ 20 მილიონ ევროს ითხოვს. წერდა, რომ ფრანგებმა ინგლისური „ბარნლის“ 15-მილიონიანი შეთავაზება უარყვეს, რადგან უფრო მაღალ ფასს ითხოვენ.
28 წლის ქართველი კალათბურთელი გიგა ჯანელიძე კი იტალიის „სერია ა“-ს ერთ-ერთ წამყვან კლუბ „ვენეციაში“ გადავიდა. ქართველ თავდამსხმელს აქამდე თამაში დაბალი რანგის იტალიურ გუნდებში უწევდა, ახლა კი, თამაში უმაღლეს დონეზე მოუწევს.
გიგა ჯანელიძე იტალიურ კალათბურთში ჯერ კიდევ 2012 წელს გამოჩნდა და „ტრიესტეს“, „კასალპუსტერლენგოს“, „ურანია მილანოს“, „როსეტო ბასკეტის“, „ავრორა ჯესი ბასკეტის“, „დინამო კალიარის“, „ნაპოლის“, „აველინოს“, „ვერონას“, „ორზინუოვისა“ და „მანტოვას“ მაისურითაც უთამაშია.
ქართველი კალათბურთელისათვის „ვენეცია“ მის კარიერაში ყველაზე დიდი გამოწვევაა. ეს კლუბი გასულ სეზონში 17 მოგებითა და 13 მარცხით მე-4 ადგილზე გავიდა და მხოლოდ „მილანს“, თორნიკე შენგელიას „ბოლონიასა” და „ტორტონას“ ჩამორჩა.
აღსანიშნავია, რომ ცოტა ხნის წინ ჯანელიძე საქართველოს ეროვნული ნაკრების შეკრებაზე იმყოფებოდა და შანსი ჰქონდა, მსოფლიოს ჩემპიონატზე ეთამაშა, თუმცა, ილიას ზუროსის მიერ შერჩეულ 18 კალათბურთელს შორის ვერ მოხვდა. ამ უარის შემდეგ კი… იტალიის ერთ-ერთ უძლიერეს კლუბში მიიწვიეს.
ცნობილი გახდა, რომ მილანის „ინტერი“ მიუნხენის „ბაიერნის“ მეკარის იან ზომერის შეძენას უახლოვდება. მილანურმა კლუბმა შვეიცარიელ მეკარესთან პირად კონტრაქტზე შეთანხმებას მიაღწია.
ახლა „ინტერმა“ მოლაპარაკება უშუალოდ „ბაიერნთან“ უნდა აწარმოოს. თავის მხრივ, ზომერის „ბაიერნიდან“ წასვლა იმას ნიშნავს, რომ მიუნხენელებს ახალი მეკარე დასჭირდებათ. ცოტა ხნის წინ აქტიურად წერდნენ გიორგი მამარდაშვილის შესახებ, თუმცა, ბოლო დღეებია ამ თემაზე ინფორმაცია არ ვრცელდება. ასევე დაიწერა იასინ ბონოს ვარიანტზეც.
ავტორი
