გუშინ იტალიურ მედიაში ქართველი გულშემატკივრებისათვის არასახარბიელო ინფორმაცია გავრცელდა, – „ნაპოლი“ იტალიის „სერია A“-ს მომდევნო ტურში სტუმრად „ბოლონიას“ დაუპირისპირდება, ხვიჩა კვარაცხელია კი შეიძლება ძირითად შემადგენლობაში არ იყოს.
ცნობა გამოცემამ „Il Mattino“ გაავრცელა. მისი მტკიცებით, ნეაპოლური კლუბის მთავარი მწვრთნელი რუდი გარსია „ბრაგასთან“ მატჩის შემდეგ სასტარტო შემადგენლობაში ცვლილებებზე ფიქრობს, როტაცია კი შეიძლება ხვიჩა კვარაცხელიას შეეხოს. ფრანგი ფეხბურთის სპეციალისტი მის ნაცვლად ძირითადში ჯაკომო რასპადორის გამწესებას აპირებს.
„ბოლონიასა“ და „ნაპოლის“ მატჩი 24 სექტემბერს, თბილისის დროით 20:00 საათზე გაიმართება.
ხვიჩა კვარაცხელია და „ნაპოლი“ კი იტალიაში კვლავ აქტუალური თემაა. გუშინ, ახლო წარსულში ცნობილმა მოთამაშე ანტონიო კასანომ „ნაპოლი“ – რუდი გარსია – დე ლაურენტისი – ხვიჩა კვარაცხელიას შესახებ ბოლო დღეებში რიგით მესამე განცხადება გაავრცელა:
„ნაპოლი“ ანარქიული გახდა. ყველაზე სკანდალური კი დე ლაურენტისის პასუხი იყო, როდესაც კონტრაქტის განახლებაზე მოლაპარაკებებს სისულელე უწოდა. კვარაცხელიას ადგილას მე გასახდელს თავდაყირა დავაყენებდი, როგორც ეს მადრიდში გავაკეთე. მან ეს არ გააკეთა, იმიტომ, რომ კარგი ბიჭია“.
კვარაზე კომენტარი გააკეთა კიდევ ერთმა ვეტერანმა ფეხბურთელმა დანიელე ადანიმ, რომლის თქმით, ხვიჩას არ აქვს „ოქროს ბურთის“ ნომინანტი ფეხბურთელისთვის შესაფერისი ხელფასი:
„ნაპოლიში“ ურთიერთობები ტოქსიკური ხდება. კვარაცხელია „ოქროს ბურთის“ 30 ნომინანტშია, მაგრამ ამის ადეკვატური კონტრაქტი არ აქვს. გარდა ამისა, შეხედეთ „ჯენოასთან“ და „ბრაგასთან“ შეცვლის შემდეგ მის ჟესტს…“
ყოფილმა სპორტულმა დირექტორმა და საფეხბურთო აგენტმა ენრიკო ფედელემ “ბრაგასთან” მატჩის შემდეგ, “ნაპოლის” მწვრთნელი რუდი გარსია ხვიჩა კვარაცხელიას მიმართ დამოკიდებულების გამო „Marte“-ს ეთერში გააკრიტიკა:
„როდესაც გუნდი ცუდად თამაშობს და იგებს, მაშინვე უნდა შეიცვალო, რათა უკეთესი გახდე, წინააღმდეგ შემთხვევაში ჯიუტი ხარ. როდესაც საქმეები ცუდად მიდის, ფეხბურთელებს ცვლის. წარმატებული გასული სეზონის შემდეგ, რაც ახლა ხდება, რაღაც ნეგატიური კი არა, ინტელექტის დეფიციტის აქტია.
გარსია პატივმოყვარეა, თავისი უპირატესობის დამტკიცება სურს და მისი მხრიდან ქართველის მიმართ აგრეთვე აშკარა იდიოსინკრაზიას ვხედავ. “კვარას” განტევების ვაცად იყენებს. როდესაც ნიჭიერი მოთამაშე გყავს, კი არ უნდა შეცვალო, არამედ მხარი უნდა დაუჭირო. ასეთ ვითარებაში ქართველი ფსიქოლოგიურად როგორ მდგომარეობაში იქნება?
რა უნდა მოიმოქმედონ, რომ “ნაპოლიმ” თამაში გამოასწოროს? მე არ ვარ ის ადამიანი, რომელიც ნახევარ სიმართლეს ამბობს და ზომების ნაწილობრივ მიღებას მოითხოვს. არავითარი სურვილი არ მაქვს, ვინმესგან მადლიერება დავიმსახურო. “ბრაგასთან” შეხვედრა განგაშის მაუწყებელია და მწვრთნელის შეცვლაა შესაძლებელი, მაგრამ საქმე იმაშია, ვის დანიშნავენ გარსიას ნაცვლად. აურელიო ანდრეაცოლი? ურიგო იდეა არაა – სპალეტის შემდგომ პერიოდში კარგი ვარიანტია. ის “რომაში” სპალეტის მთავარი თანაშემწე იყო და ნეაპოლურ კლუბში თავისი ხედვა ექნება“.
იტალიელმა ჟურნალისტმა პაოლო ბარჯიჯამ განაცხადა, რომ ხვიჩა კვარაცხელია რაფაელ ლეაუზე კარგი ფეხბურთელია.
„კვარაცხელია დიდებული ფეხბურთელია. „ნაპოლის“ ტალანტსა და ლეაუს შორის, ჩემი დაკვირვებით, შედარებაც არ არსებობს: ყოველთვის კვარაცხელიას ავირჩევდი და წარმოიდგინეთ, რომ ქართველი „მილანის“ ფეხბურთელზე მკვეთრად ნაკლებ ხელფასს იღებს“, – თქვა ბარჯიჯამ.
„Sky Sport“-ის ჟურნალისტმა ლუკა მარკეტიმ კი რუდი გარსიას მხრიდან ხვიჩა კვარაცხელიას კიდევ ერთხელ შეცვლაზე კომენტარი გააკეთა.
„გარსიამ კვარაცხელია ისევ შეცვალა? ეს მწვრთნელის მხრიდან მესიჯი იყო: თუ გენუაში შეცვლის შემდეგ თავს უცნაურად გრძნობდი, კიდევ ერთხელ შეგცვლი, რათა გაიგო ის, რომ რაც გააკეთე არასწორია და პატივისცემა საჭიროა, შენგან მეტს ვითხოვ.
მართალია, კვარა დიდი ფეხბურთელია, მაგრამ მიმდინარე სეზონში არ გვინახავს მისგან ისეთი წვლილი, როგორც გასულ გასულ სეზონში. ფეხბურთელებს და მწვრთნელებს შორის ურთიერთობებში ესეც ხდება, ხანდახან ეს აუცილებელიცაა – მძიმე შეტაკება. ურთიერთობები იცვლება. ამიტომ, ჩემი აზრით ეს სიტუაცია დაკავშირებული არ არის კონტრაქტის საკითხთან“, – განაცხადა მარკეტიმ.
ავტორი
