საქართველოს ეროვნულმა ნაკრებმა მიმდინარე წლის პირველი მატჩი მონღოლეთის ნაკრებთან ჩაატარა, რომელსაც ამხანაგური სტატუსი ჰქონდა. ქართველმა ფეხბურთელებმა მეტოქე დიდი ანგარიშით – 6:1 დაამარცხეს.
შეხვედრის შემდეგ საქართველოს ეროვნული გუნდის მთავარმა მწვრთნელმა ვილი სანიოლმა შემდეგი განცხადება გააკეთა.
„რთულია დასკვნების გაკეთება ახლა, რა იყო კარგი ან ცუდი. ბევრი ისეთი ფეხბურთელი გვყავდა ძირითად შემადგენლობაში, რომელთაც ერთად არ ჰქონდათ ნათამაშები და ასეთ დროს ბუნებრივია, რომ ხარისხი ეცემა. პირველი ტაიმით უკმაყოფილო ვიყავი, ბურთი ძალიან ნელა მოძრაობდა. მეორე ტაიმში კი გამოჩნდა, რა ხდება, როდესაც ბურთს სწრაფად ვამოძრავებთ. დადებითია ის ფაქტი, რომ ბევრი მომენტი შევქმენით და გოლები გავიტანეთ. ეს იყო წლის პირველი მატჩი, მაგრამ ნორვეგიასთან ბევრად უკეთესად თამაში იქნება საჭირო სასურველი შედეგის მისაღწევად.
გიორგი ჩაკვეტაძეს შესვენებაზე ვუთხარი, რომ უფრო ცენტრში შეწეულიყო, რადგან პირველ ტაიმში უმეტესად ფლანგზე მოქმედებდა. გიორგის მსგავსი ტექნიკური ფეხბურთელი უფრო ცენტრისკენ უნდა იწევდეს. სწორედ ეს მოხდა მეორე ტაიმში, მან ორი გოლი გაიტანა, ხოლო როდესაც შევცვალე მივულოცე და შევაქე“, – განაცხადა ვილი სანიოლმა.
მონღოლეთის ნაკრების იაპონელმა მთავარმა მწვრთნელმა,იჩირო ოცუკამ კი ასეთი კომენტარი გააკეთა:
„ერთი წელია, რაც მონღოლეთის ნაკრებს ვავარჯიშებ. შესარჩევ ჯგუფში იაპონიასთან 0:14 რომ წავაგეთ, მაშინ ვთხოვე ჩვენს ფედერაციას, რომ განვითარებისთვის ნაკრებს ასეთ ძლიერ მეტოქეებთან თამაშები სჭირდებოდა.
პირველი ტაიმის შემდეგ მონღოლეთიდან დაგვირეკეს, შეგვაქეს და მოგვილოცეს, რომ ანგარიში 1:1 იყო. საქართველოს პროფესიონალი ფეხბურთელები ჰყავს, ჩვენ კი პროფესიონალები არ გვყავს, კლიმატის გამო, ჩემპიონატში 6 თვე ვერ თამაშობენ და გამოცდილებაც გვაკლია გვაქვს. ამიტომ ჩვენთვის საქართველოსთან თამაში ძალიან მნიშვნელოვანი იყო“.
საქართველოს ნაკრები მომდევნო მატჩს 28 მარტს, ისევ ბათუმში ჩაატარებს, ამჯერად ევრო 2024-ის საკვალიფიკაციო ეტაპზე ნორვეგიის ნაკრების წინააღმდეგ.
გუშინ, გამოცემა „Daily Express“-ის ჟურნალისტმა რაიან ტეილორმა ხვიჩა კვარაცხელიასა და „მანჩესტერ სიტის“ მისით დაინტერესებაზე ისაუბრა:
„მე მას ჯეკ გრილიშის ვადარებ, თუმცა კვარაცხელიას ცოტა მეტი შესაძლებობები აქვს და გაცილებით უფრო დაგეშილია გოლებზე. ჩემი სურვილი იქნებოდა, გრილიშს სიტის მაისურით მეტი გოლი გაეტანა. ამავე დროს, კვარაცხელიას გადასვლა „მანჩესტერ სიტიში“ ძალიან კარგი ტრანსფერი იქნებოდა. ახლა როცა, პრემიერლიგის სხვა კლუბებზეც ვფიქრობ, ჩემი აზრით, ის ნებისმიერ გუნდს გამოადგებოდა და, ალბათ, ახლა ნებისმიერი გუნდისთვის სასურველი ფეხბურთელია“.
გუშინ ცნობილი გახდა, რომ მიუნხენის „ბაიერნიდან“ გაშვებულმა იულიან ნაგელსმანმა შესაძლოა, მადრიდის „რეალი“ ჩაიბაროს. ამ ინფორმაციას, პოპულარული გამოცემა „მარკა“ ადასტურებს.
„მარკას“ მტკიცებით, მას მერე, რაც ნაგელსმანი „ბაიერნმა“ გაათავისუფლა, ის „რეალის“ მწვრთნელობის კანდიდატთა შორის ფავორიტი გახდა. მადრიდული კლუბის პრეზიდენტი ფლორენტინო პერესი ახალგაზრდა სპეციალისტით ჯერ კიდევ 4 წლის წინათ დაინტერესდა. საინტერესოა, რომ „რეალში“ კანდიდატთა შორის ერთ-ერთი პირველი თომას ტუხელი მოიაზრებოდა, რომელიც ახლა უკვე „ბაიერნის“ მწვრთნელია.
კარლო ანჩელოტის ბედი სეზონის ბოლომდე არ გაირკვევა, ყველაფერი დამოკიდებულია იმაზე, თუ როგორ იასპარეზებს „რეალი“ ჩემპიონთა ლიგაზე, რადგან „ლა ლიგის“ ტიტულისთვის ბრძოლა მას თითქმის წაგებული აქვს, „ბარსელონას“ 12 ქულით ჩამორჩება. გარდა ამისა, იტალიელს მოუთმენლად ელიან ბრაზილიის ნაკრებში.
გამოცემა „მარკა“ „რეალს“ ზაფხულიდან ძალიან ნიჭიერ მოთამაშე გაბრი ვეიგას უკავშირებს, ასევე ხვიჩა კვარაცხელიას, ბერნარდო სილვას, დუშან ვლაჰოვიჩს ან ჰარი კეინს და ვიკტორ როკეს.
გუშინ ცნობილი გახდა, რომ იტალიელი ფეხბურთის სპეციალისტი ანტონიო კონტე მომავალი სეზონიდან მილანის „ინტერში“ დაბრუნდება. 53 წლის სპეციალისტი 3-წლიან კონტრაქტს მოაწერს ხელს.
კონტე ამჟამად „ტოტენჰემს“ უდგას სათავეში, „ინტერს“ კი სიმონე ინძაგი ავარჯიშებს. კონტე “ინტერის” მთავარი მწვრთნელი 2019/21-წლების სეზონში უკვე გახლდათ და გუნდს იტალიის ჩემპიონობა მოაგებინა.
ცნობილი გახდა, რომ უეფა ბელარუსის ნაკრების ევროპის ჩემპიონატის შესარჩევი ეტაპიდან მოკვეთის საკითხს კიდევ ერთხელ განიხილავს.
ინფორმაცია ამის შესახებ გერმანულმა ტელეკომპანიამ „ARD“ გაავრცელა. გერმანელ ჟურნალისტებს აქვთ წერილი, რომელიც უეფას პრეზიდენტმა ალექსანდერ ჩეფერინმა ევროპარლამენტის 100 წევრს გაუგზავნა.
„უეფას დიდი ხანია სურს აღმასრულებელი კომიტეტის მომავალ სხდომაზე ბელარუსის სიტუაციის განხილვა“. – აღნიშნულია ხსენებულ წერილში. აღსანიშნავია, რომ უეფას აღმასკომის მომდევნო სხდომა 4 აპრილსაა ჩანიშნული.
საქმე ეხება ბელარუსის მონაწილეობას რუსეთის უკრაინისადმი აგრესიაში და ადამიანთა უფლებების მძიმე სიტუაციას ავტოკრატიულ აღმოსავლეთევროპულ ქვეყანაში.
ავტორი
