„ინტერნიუსი – საქართველო“, ევროკავშირისა და გაეროს განვითარების პროგრამის მიერ დაფინანსებული პროექტის – „2020 წლის საპარლამენტო არჩევნების მედიაში გაშუქების კვლევა“ – ფარგლებში, ბეჭდვურ მედიას აკვირდებოდა. წინამდებარე ანგარიში მოიცავს არჩევნების შემდგომი პერიოდის გაზეთების მონიტორინგის შედეგებს. მონიტორინგი 2021 წლის 1თებერვალი – 31 მარტის პერიოდში მიმდინარეობდა. დაკვირვება ხორციელდებოდა 8 გამოცემაზე: „რეზონანსი“, „ახალი თაობა“, „კვირის პალიტრა“, „ალია“, „ასავალ-დასავალი“, „ქრონიკა+“, „საქართველო და მსოფლიო“, „გურია news“.
არჩევნების შემდგომი პერიოდის ბეჭდვური მედიის მონიტორინგში აღნიშნულია, რომ „გურია ნიუსი“ მიუკერძოებლად და ჟურნალისტური სტანდარტების დაცვით მუშაობდა“.
გაზეთი „გურია News“ ყოველკვირეული გაზეთი „გურია ნიუსი“, ძირითადად, რეგიონის ახალ ამბებს აშუქებდა. გამოცემა დიდ ყურადღებას უთმობდა ადგილობრივი მცხოვრებლებისთვის მნიშვნელოვანი თემების, ეკონომიკური და სოციალური საკითხების გაშუქებას. გამოცემა დაბალანსებული იყო და სხვადასხვა მხარეთა პოზიციებს თანაბრად წარმოაჩენდა. „გურია ნიუსმა“ მონიტორინგის სუბიექტებიდან ყველაზე მეტად „ქართული ოცნება“ (59%) და „ერთიანი ნაციონალური მოძრაობა“ (25%) გააშუქა. მათ 9%-ით მოჰყვება „პატრიოტთა ალიანსი“. პოლიტიკური პარტიების წარმომადგენლებს ფართობი, უმეტესწილად, საკრებულოს სხდომების ჩანაწერების გამოქვეყნების შედეგად დაეთმოთ. სუბიექტები, საშუალოდ 85% ნეიტრალურ ტონში გაშუქდნენ. გაზეთში არ გვხვდებოდა სუბიექტური, გადაუმოწმებელი და დაუსაბუთებელი ინფორმაციები. „ქართული ოცნების“ მიმართ უარყოფითი დამოკიდებულება, ძირითადად, ოპონენტი პოლიტიკოსების განცხადებებში ვლინდებოდა, ხოლო „ერთიანი ნაციონალური მოძრაობის“ სხვებთან შედარებით მაღალი დადებითი ტონი, დიდწილად, პარტიის ლიდერის მიერ ახალი წევრების წარდგენას უკავშირდება. ჟურნალისტების მხრიდან რომელიმე პოლიტიკური ძალის მიმართ მიკერძოებული დამოკიდებულება არ დაფიქსირებულა.
გამოცემა აქცენტს უმეტესად ადგილობრივი ახალი ამბების, ინფრასტრუქტურული და სოციალური პრობლემების გაშუქებაზე აკეთებდა და თითქმის არ გაშუქებულა არჩევნების შემდგომ პერიოდში ქვეყანაში განვითარებული პროცესები. 22 მარტის ნომერში პარლამენტის ბოიკოტის თემაზე ვრცელი მასალა „ზოგი პლებისციტს ითხოვს, ზოგიც – არჩევნებს, ზოგიც რას ითხოვს ვერ გაიგებ!“ – გამოქვეყნდა, სადაც ადგილობრივი მოსახლეობის მოსაზრებები იყო ნაჩვენები და არა პოლიტიკური მხარეების.
„გურია ნიუსი“ მიუკერძოებლად და ჟურნალისტური სტანდარტების დაცვით მუშაობდა. გამოცემა ერიდებოდა დაუსაბუთებელ მსჯელობას და გადაუმოწმებელი ინფორმაციის გამოქვეყნებას.“
