გასულ უქმეებზე, ლანჩხუთის „ევგრაფ შევარდნაძის“ სახელობის მთავარ არენაზე ფაქტობრივად, გადაწყდა ქალთა საფეხბურთო ჩემპიონატის გამარჯვებულის ბედი.
ჩემპიონატის ბოლოსწინა ტურში „ლანჩხუთი“გადამწყვეტ შეხვედრას მართავდა უშუალო კონკურენტ თბილისის „ნიკესთან“. პირველ წრეში 0:1 მარცხის გადასაფარად მინიმუმ ორ გოიანი სხვაობით უპირებო მოგება მართებდათ ლანჩუთელ გოგონებს.
ორი ათასზე მეტმა გულშემატკივარმა მოიყარა თავი სტადიონზე და ასეთი ქომაგობის არდაფასების უფლება გოგონებს, უბრალოდ, არ ჰქონდათ, მათაც ყველაფერი გაიღეს სასურველი შედეგის მისაღწევად.
შეხვედრა თავიდანვე დაძაბულად დაიწყო და ინტრიგაც ბოლომდე შენარჩუნდა. საწყის წუთებში ორჯერ გადარჩა ჩვენებურთა კარი. ჯერ პენალტი გააცუდეს სტუმრებმა, შემდეგ კი ახლო მანძილიდან ძელმა გვიხსნა. ამასობაში მასპინძლებსაც დაეტყოთ გამოცოცხლება და მალე თამაშის უპირატესობაც ხელთ იგდეს.
პირველი გოლი 27-ე წუთზე გავიდა სტუმართა კარში, რაც მასპინძელთა გუნდის შემტევთა დუეტის უდაო დამსახურება იყო. თამრიკო სალუქვაძემ ეფექტურად შეაყოლა ბურთი საჯარიმოში შერბენილ ხატია ჭყონიას და მანაც კარის ბადეში მიუჩინა ადგილი. ხატიამ ამ გოლს პირველი ტაიმის მიწურულს მეორეც მიაყოლა, რაშიც დიდი დამსახურება ნინო ჩხარტიშვილს მიუძღვის. ამ უკანასკნელმა იდეალური გადაცემა გაუკეთა მარცხენა ფლანზე ირინა ხაბურძანიას, რომელმაც საჯარიმოში შესვლისთანავე ძლიერად დაარტყა კარისაკენ, ბურთი ხარიხამ კი მოიგერია, მაგრამ ჭყონიამ დამატებაზე ივარგა.
ორბურთიანი სხვაობა მიღწეული იყო, თუმცა ამის გასამტკიცებლად კიდევ ერთი გოლი რომ იყო საჭირო, ეს ნათლად გამოჩნდა. მეორე ტაიმის დასაწყისში კუთხურიდან ჩაწოდებულ ბურთს, ლანჩხუთელთა გუნდის დაცვის ბურჯმა, მარიამ კალანდაძემ მძლავრი თავური შეაგება და კიდევ ერთხელ გაახარა ქომაგობა.
თუმცა, გოგონების ფეხბურთს ახასიათებს გარკვეული ემოციური ფონი და სწორედ ამის შედეგი იყო თამაშის 61-ე წუთზე არაფრისგან მიღებული საპასუხო გოლი, რითაც მწყერაშვილმა შეხვედრას დაძაბულობა აღუდგინა.
მოკლედ „ლანჩხუთმა“ სასურველი შედეგი შეინარჩუნა, რითაც ფაქტობრივად, გაინაღდა ქვეყნის ჩემპიონობა. დარჩენილ ტურში ჩვენებურებს ახალციხეში იქაურ „ზარზმასთან“ უწევთ გაჯიბრება და ნებისმიერი ანგარიშით უბრალოდ მოგება მართებთ. ეს კი ძნელი არ უნდა იყოს, რადგან ახალციხელი გოგონები ჩემპიონატის აუტსაიდერები არიან და წაგების გარდა, მათი სხვა შედეგი, უბრალოდ ფანტასტიკის სფეროს წარმოადგენს.
აღსანიშნავია, რომ ქვეყნის ჩემპიონი გაისად ევროპის ჩემპიონთა თასის საკვალიფიკაციო ეტაპზე გავა, სადაც ჯგუფური ეტაპზე მინიმუმ რამდენიმე შეხვედრის შესაძლებლობა ექნება, რაც გამოცდილების გარდა, საკმაოდ დიდი ფინანსური შესაძლებლობის მიღებას ითვალისწინებს.
აღსანიშნავია, რომ ლანჩხუთში ქალთა ფეხბურთის ხიბლი პირველად ავთო ორმოცაძემ შემოიტანა, რომელიც სამწუხაროდ ნაადრევად წავიდა ამ ქვეყნიდან. მერე კი მისი წამოწყება დურმიშხან ჩხაიძემ გადაიბარა და მანაც ჩვეული ჟინითა და მიზანსწრაფულობით შედეგიც დადო. დღეს რომ ლანჩხუთს ფეხბურთელი გოგონების გუნდი ჰყავს, ეს მთლიანად დურმიშხან ჩხაიძის დამსახურებაა.
