ლანჩხუთის მუნიციპალიტეტის საკუთრებაში არსებული წილის (ლანჩხუთის მუნიციპალიტეტის საკუთრებად რეგისტრირებული შპს „ფეხბურთის კლუბი – ლანჩხუთის გურია“- ს (ს/ნ 433651461) 100%-იანი წილი) პირობიანი ელექტრონული აუქციონის ფორმით პრივატიზებაზე მერისათვის თანხმობის მიცემის შესახებ“ იმსჯელეს ლანჩხუთის მუნიციპალიტეტის საკრებულოს რიგგარეშე სხდომაზე.
ირკვევა, რომ ლანჩხუთის „გურიას“ კახი ჟორდანიას კომპანია ყიდულობს.
რაც შეეხება კახი ჟორდანიას იგი „გურიას“ ვეტერანი ფეხბურთელისა და შემდგომში სფფ-ის, თბილისის „დინამოსა“ და ჰოლანდიური „ვიტესის“ პრეზიდენტის, მერაბ ჟორდანიას შვილია. იგი წლების წინ ჰოლანდიის კლუბ „დელ ბოსხის“ ფლობდა.
ირკვევა ისიც, რომ კახი ჟორდანიას კომპანია ფინანსურ კრიზისში მყოფ ლანჩხუთურ კლუბს ფინანსურად უკვე ეხმარება კიდეც . „გურიას“, რომელიც ახლა მეოთხე ლიგაშია და ზედა ლიგაში დასაწინაურებლად იბრძვის, 600 ათას ლარამდე ძველი დავალიანება აქვს და მიმდინარე ვალდებულებების შესრულებას ვერ ახერხებს.
საგულისხმოა, რომ “გურიაში” კახი ჟორდანიას მამის, მერაბ ჟორდანიას შესაძლო მოსვლაზე საუბრები ამ წლების განმავლობაში არაერთხელ იყო.
ბოლოს ეს ინფორმაცია 2024 წელს გაჟღერდა. როგორც მაშინ ითქვა, მუნიციპალიტეტის მერსა და მერაბ ჟორდანიას შორის შეხვედრა შემდგარა და თანხმობაც მიუღია მისგან, რომ ჩაიბაროს კლუბი.
2020 წლის ნოემბერშიც ითქვა, რომ კლუბს მერაბ ჟორდანია ჩაიბარებდა. ამ ფაქტს მაშინ თავად ჟორდანიაც ადასტურებდა:
“ბოდიში უნდა მოვუხადო ჩემს ლანჩხუთელ გულშემატკივარს, რომ აქამდე კლუბს ყურადღება ვერ მივაქციე. წინა ხელისუფლების დროს, როგორც იცით, არანაირი შანსი არ იყო, კლუბის მიხედვა კი არა, დამიჭირეს. იცით, რამდენიმე წლის წინ მქონდა ინტერესი, მაგრამ მაშინ ეს ამბავი არ გამოვიდა, მიზეზებზე საუბარი არ მსურს”, _ ამბობდა მაშინ მერაბ ჟორდანია, რომლის გარემოცვასაც კლუბები ჰყავთ ავსტრიასა და ჰოლანდიაში. წლების წინ, იგი ჰოლანდიური კლუბის პრეზიდენტიც იყო.
როგორც მაშინ ითქვა, “გურიაში” მოსვლის თაობაზე მერაბ ჟორდანიას კომუნიკაცია ვასილ ჩიგოგიძესთანაც ჰქონდა და მისგან მხარდაჭერის პირობაც მიიღო. ჟორდანიასთან კლუბთან დაკავშირებით კომუნიკაციის არსებობას თავად ჩიგოგიძეც ადასტურებდა:
“ჩემგან რა მხარდაჭერის პირობა შეეძლო მიეღო, მიიღო. ჯერჯერობით, ყველაფერი საუბრის დონეზეა. მესაუბრა ამ საკითხზე მერაბი, რომელიც დაინტერესებულია “გურიას” თემით. ის ჩამოსვლას და ადგილზე გეგმავს ყველაფერში გარკვევას. მე შეხვდი კლუბის ამჟამინდელ მმართველობას, რომელთაც გარკვეული პრობლემები აქვთ და რაც, მათი ახსნით, პანდემიის გამო წარმოიშვა. მოკლედ, ჯერჯერობით, ყველაფერი საუბრის დონეზეა და ვნახოთ”, _ გვითხრა მაშინ სატელეფონო საუბრისას გურიის მაჟორიტარმა ვასილ ჩიგოგიძემ.
“გურიაში” მერაბ ჟორდანიას მოსვლაზე ინფორმაცია მანამდეც არაერთხელ გაჟღერდა, თუმცა, ყოველ ჯერზე გარკვეული ხელშეშლა მოხდა. თავად ჟორდანია არასდროს არაფერს ამბობდა, თუ ვინ და რა უშლიდა ხელს ამ ამბავს, თუმცა, მთავარ ეჭვმიტანილად ამ საქმეში მაშინდელი მაჟორიტარი დეპუტატი, ნინო წილოსანი სახელდებოდა.
ამ ფაქტს იმით ხსნიდნენ, რომ წილოსანის ოჯახს დავა ჰქონდა ბიზნესმენ ქეთევან ცინცაბაძესთან, რომელიც ჟორდანიას ახლობელია. მაშინ ნინო წილოსანმა ასეთი ალბათობა კატეგორიულად უარყო და აღნიშნა, რომ რაიმე პირადი ინტერესი კლუბთან დაკავშირებით არ ჰქონდა. მან ისიც თქვა, რომ ჟორდანია იქნება თუ სხვა, კლუბში რამდენიმე მილიონი უნდა მოიტანოს.
დარწმუნებული ვარ, ვალდებულებების გარეშე გუნდის გაცემა პარაზიტული საქციელი იქნება გუნდის მისამართით და ვინც ამას გვთავაზობს, მას მხოლოდ საკუთარი ინტერესები ამოძრავებს.
მე, როგორც ბიზნესმენი დავინტერესებულვარ დავალიანების მქონე ბიზნესით თუკი მისი განვითარების პერსპექტივა დამინახავს. ლანჩხუთის „გურიას“ შესაძლო ინვესტორი გუნდის განვითარების პოტენციალს თუ ვერ ხედავს და გამოჯანმრთელების გეგმა არ აქვს, ვფიქრობ ის გუნდს პირიქით მძიმე ტვირთად დააწვება.
მართალია, ფეხბურთში ღრმად არ ვარ ჩახედული, თუმცა, კარგად ვაანალიზებ, რომ ლანჩხუთის „გურია“ ბრენდია, რომლითაც ყველა ვამაყობთ . „გურიას“ მაქსიმალურად ყველგან გავუწევ რეკომენდაციას, ვიქნები მისი პოპულარიზაციის ელჩი, ვფიქრობ, ამ რთული მდგომარეობიდან გუნდის გამოსვლის რეცეპტი უფრო მიზანმიმართული და სწორი ინვესტორის მოძიებაა.
გუნდის განვითარების გეგმისა და საინვესტიციო ვალდებულებების გარეშე ამ ცნობილ ბრენდს, ზღვის განაპირას არსებული საკმაოდ დიდი მიწის აქტივით, ასე მარტივად ვერავინ ვერ გადაიბარებს“,-ამბობდა წლების წინ წილოსანი.
მაშინ დეპუტატის ეს პოზიცია ბევრმა მის პირად ინტერესად აღიქვა.
2017 წლის ზაფხულში ლანჩხუთის მუნიციპალიტეტის საკრებულოს მაშინდელმა სამანდატო, საპროცედურო, იურიდიულ საკითხთა და ეთიკის კომისიამ ერთ-ერთ სხდომაზე განიხილა კიდეც “გურიაში” მერაბ ჟორდანიას შესაძლო მოსვლის საკითხი და მაშინ კომისიის თავმჯდომარემ, რომან ბიწაძემ თქვა, რომ ჟორდანიას კლუბში მოსვლას ადგილზე ხელს უშლიან:
“ჟორდანიასა და მის კომპანიას “გურიაში” მოსვლის საკითხი ფეხბურთის ფედერაციასა და ხელისუფლების ზედა ეშელონებშიც გარკვეულია და მათი მხრიდან, ამ მხრივ, არანაირ წინააღმდეგობას ადგილი არ აქვს, ერთადერთი ლანჩხუთის ხელმძღვანელობისგან არ აქვთ კონკრეტული პასუხი მიღებული”, – ამბობდა მაშინ რომან ბიწაძე.
