„რამდენ სააღმზრდელო ცენტრშია შეჩერებული საგანმანათლებლო პროცესი და რა იგეგმება სამომავლოდ პრობლემის მოსაგვარებლად“, – ამ კითხვით მიმართა ლანჩხუთის საკრებულოში ენმ-ის ფრაქციის თავმჯდომარემ კახა ასკურავამ ფრაქციის სხდომაზე ა(ა)იპ „სკოლამდელი საგანმანათლებლო-სააღმზრდელო ცენტრის“ხელმძღვანელის მოვალეობის შემსრულებელს მარინა კეიდიას.
კეიდიას განამარტებით, შრომისუბნისა და გულიანის საბავშვო ბაღების მშენებლობა თითქმის დასრულებულია და ახალი სასწავლო წლისთვის გაიხსენება.
„ჩიბათის სააღმზრდელო ცენტრის ჯგუფები დროებით ლესაშია განთავსებული, ხოლო ნიგვზიანის ჯგუფი – ხაჯალიის ბაღშია გადაყვანილი.
პრობლემაა შრომისუბნის, ეწრის და ნინოშვილის ბაღები. ეს სოფლები ერთმანეთთან შორი მანძილით არიან დაშორებული და ვერ ხერხდება მათი ერთ საერთო შენობაში განთავსება. ასევე მშობლებთან კომუნიკაცია ვერ მოხერხდა, უარი განაცხადეს ტრანსპორტირებაზე.
ღრმაღელის საბავშვო ბაღი თითქმის დასრულებულია, მიმდინარე წელს შესაძლებელი იქნება სამუშაო პროცესის დაწყება, კონტინგენტის მიღებაც გამოცხადებულია. ამდენად შრომისუბანის აღსაზრდელები შეუერთდება მათ. ტრანსპორტირებაც შესაბამისად მოგვარებული იქნება.
ნიგვზიანის ბაღიც თითქმის დასრულებულია, ის განთავსებული იყო ხაჯალიაზე. უკვე ხაჯალიაზე მის ნაცვლად შევა ჯურუყვეთი. ნინოშვილიც თითქმის დასრულებულია, ავეჯიც კი მოტანილია და შეუერთდება ეწერის სააღმზდელო ჯგუფი“, -განმარტა კეიდიამ.
ფრაქციის კიდევ ერთი წევრი, ირმა მგელაძე დაინტერესდა, „ გასულ წლებში როდესაც საუბრობდნენ ტრანსპორტირების მოგვარებას, აწყდებოდნენ წინააღმდეგობას უსაფრთხოების გამო, რა შეიცვალა ამ კუთხით“.
მარინა კეიდიამ განმარტა, რომ ბავშვთა გადაყვანისთვის უსაფრთხოების ნორმები დაცული იქნება, ტრანსპორტზე გამოცხადეება ტენდერი, რომელიც მოწესრიგებული იქნება, ბავშვებს ეყოლებათ გამყოლი პედაგოგის და მშობლის სახით.
კახაბერ ასკურავა დაინტერესდა 2024-25 სასწავლო წლის პროცესის დაწყებისას იყვნენ თუ არა ინფორმირებულები რომ ეწრის, ჯურუყვეთის, ჩიბათის და შრომისუბნის საბავშვო ბაღების დემონტაჟი განხორციელდებოდა.
მარინა კეიდიას თქმით, ცნობილი იყო ბაღების რეაბილიტაცია და ექსპერტიზის დასკვნის საფუძველზე მოხდა მათი დემონტაჟი.
„ათობით ბავშვი და მშობელი დადგა პრობლემის წინაშე, მათი სასწავლო პროცესი გაჩერდა. რატომ ვერ მოგვარდა პრობლემა, რომ სასწავლო პროცესი არ შეჩერებულიყო“, -დაინტერესდა ასკურავა, რაზეც სააღმზრდელო ცენტრის ხელმძღვანელისგან პასუხად მოისმინა, რომ სააღმზრდელო ცენტრმა იმსჯელა მშობლებთან, მენეჯერებთან და ტერიტორიული სიშორის გამო უარი განაცხადეს ტრანსპორტირებაზე და არჩიეს სააღმზრდელო პროცესი შეჩერებულიყო.
ფრაქციის სხდომის დასასრულს კი კახა ასკურავამ ლანჩხუთის მერს ბრალი სამართალდარჩვევაში დადო და დაანონსა, რომ ამასთან დაკავშირებით სასამართლოსთვის მიმართვასაც გეგმავენ.
„ ფრაქცია „ერთიანი ნაციონალური მოძრაობის“ წევრებმა ლანჩხუთის მუნიციპალიტეტის მერს უამრავჯერ მიმართეს წერილობით, სხვადასხვა პრობლემურ საკითხებზე. რაზეც რეაგირება არ მოუხდენიათ და პასუხი არ დაბრუნებულა. ფრაქცია მიზანშეწონილად მიიჩნევს, რომ ეს არის სამართალდარღვევა და აუცილებლად მიმართავენ სასამართლოს“, – განმარტა ასკურავამ.
ავტორი
