“თოვლის სტიქიით დაზარალებულ ხალხს რა გვეშველება იქნებ ვინმემ გვიპასუხოთ“, _ ბოლო თვეებია, მსგავსი შინაარსის კითხვები ხშირად ისმოდა თებერვალში, დიდთოვლობის შედეგად დაზარალებული მოსახლეობის მხრიდან. თებერვლის დიდთოვლობის შედეგად დაზარალებულ მოსახლეობას სახელმწიფო რომ დაეხმარებოდა, ამაზე დაპირება ხელისუფლების მხრიდან, მომხდარი ფაქტიდან მალევე გაიცა _ “დაზიანებულ სახლებს სახელმწიფო აღადგენს, ხოლო მოქალაქეებს, რომელთა სახლებიც შეკეთებას არ ექვემდებარება, ალტერნატიული საცხოვრებლით უზრუნველყოფენ“, _ ითქვა მაშინ.
თუმცა, მოსახლეობისთვის სამწუხაროდ, პროცესი დროში საკმაოდ გაიწელა და დაზარალებულებს თვეები დაჭირდათ ლოდინი როდის და როგორ დაეხმარებოდა მათ სახელმწიფო.
ჰოდა, რამდენიმეთვიანი ლოდინის შემდეგ გაცხადდა, რომ ლანჩხუთში დაზარალებულთა დასახმარებლად სახელმწიფო შვიდ მილიონ ლარზე მეტს გაიღებს. კერძოდ, საქართველოს მთავრობის 2025 წლის 10 ივლისის #1106 განკარგულებით, 2025 წლის თებერვლის თვეში ლანჩხუთის მუნიციპალიტეტში დიდთოვლობის შედეგად დაზიანებული ინდივიდუალური და მრავალბინიანი საცხოვრებელი სახლების სარეაბილიტაციო სამუშაოების გახორციელების მიზნით შვიდი მილიონ 365 ათასი ლარი გამოიყო, რომლის ადგილობრივ ბიუჯეტში ასახვასაც ლანჩხუთის საკრებულომ დასტური მიცა.
გარდა ზემოთ ნახსენები თანხისა, მთავრობისვე განკარგულებით, ლანჩხუთის მუნიციპალიტეტს, სტიქიის შედეგების სალიკვიდაციო ღონისძიებების ჩატარების მიზნით, დამატებით მილიონ 600 ათასი ლარიც გამოეყო. მერიის განმარტებით, ამ თანხიდან 500 ათასი ლარი მიიმართება დამცავი კედლებისა და გაბიონების მოწყობაზე, დაზიანებული გზების რეაბილიტაციის სამუშაოებისთვის 600 ათასი ლარი გაიხარჯება, ხოლო დარჩენილი 500 ათასი ლარი სახიდე გადასასვლელის რეაბილიტაცია-მოწყობისთვისაა განკუთვნილი.
საკრებულოში წარდგენილი მერიის განმარტებითი ბარათის მიხედვით, მთავრობის განკარგულებით, მუნიციპალიტეტისთვის გამოყოფილია 220 ათასი ლარიც, რომელიც მიმდინარე წლის თებერვლის თვეში ლანჩხუთში დიდთოვლობის შედეგად დაზიანებული ინდივიდუალური და მრავალბინიანი საცხოვრებელი სახლების სახურავების სარეაბილიტაციო სამუშაოებთან დაკავშირებული საზედამხედველო მომსახურების დაფინანსებისთვისაა განკუთვნილი.
რეგიონებში გასახორციელებელი პროექტების ფონდიდან ჯურუყვეთის ცენტრალური გზისა და ლესის გზის (პროექტის ღირებულება 1973596 ლარი) რეაბილიტაციისთვის დამატებით გამოიყო 34595 ლარი, ადგილობრივი ბიუჯეტიდან უნდა მიიმართოს 1821 ლარი, სულ 36416 ლარი.
მერიის განმარტებით, ადგილობრივი ბიუჯეტიდან თანხის მიმართვა გახორციელდება არაფინანსური აქტივების კლებიდან (გაყიდვა) მისაღები შემოსავლის გეგმის 1821 ლარის ზრდის ხარჯზე.
ავტორი
