ლანჩხუთში კოვიდინფიცირების შემთხვევებმა ბოლო ორი თვის განმავლობაში მოიმატა.
როგორც “გურია ნიუსს” ლანჩხუთის საზოგადოებრივი ჯანდაცვის ცენტრის ხელმძღვანელმა, ნატო მენაღარიშვილმა განუცხადა, აგვისტოსა და სექტემბერში კოვიდტესტებზე დიდი მიმართვიანობა იყო. ხოლო დღეს, 15 დადებითი შემთხვევა გამოვლინდა.
“ლანჩხუთში კოვიდინფიცირების საკმაო შემთხვევები გვაქვს. ზოგადად, აგვისტოსა და სექტემბერში ძალიან დიდი იყო მომართვიანობა. დღეს, მაგალითად, ჯანდაცვის ცენტრში კორონავირუსზე ტესტის გასაკეთებლად 17 ადამიანი მოვიდა და მათგან 15 დადებითი შემთხვევა დაფიქსირდა, რაც საკმაოდ მაღალი მაჩვენებელია”,_ ამბობს მენაღარიშვილი.
როგორც ლანჩხუთის საზოგადოებრივი ჯანდაცვის ცენტრის ხელმძღვანელი აღნიშნავს, ვირუსის სწრაფ გავრცელებას ხელს უწყობს პირბადის ტარებაზე უარის თქმა და დახურულ სივრცეში ბევრი ადამიანის თავმოყრა.
“სკოლებიც უკვე დაიწყო, დახურულ სივრცეში ბევრი ადამიანი იყრის თავს, მოსწავლეები, მასწავლებლები.. ნიღბების ტარებასაც გადავეჩვიეთ და ესეც ხელს უწყობს კოვიდინფექციის სწრაფ გავრცელებას. ზაფხული იყო და მოსახლეობის მიგრაცია იყო დიდი საკურორტო სეზონთან დაკავშირებით”,_ ამბობს მენაღარიშვილი.
ჩვენს კითხვაზე, თუ როგორ მიმდინარეობს დაავადება ინფიცირებულ პაციენტებში, მენაღარიშვილი გვპასუხობს:
_ საბედნიეროდ მსუბუქი შემთხვევებია და მძიმედ არ მიმდინარეობს. ზოგი გასატესტად ალბათ არც მოდის, იმდენად მსუბუქად გადააქვს კოვიდი, რომ ვერც ხვდება და ჩვეულებრივი გაციება ჰგონია.
რაც შეეხება კოვიდინფექციისთვის დამახასიათებელ სიმპტომებს, თითქმის უცვლელია. პაციენტს შეიძლება ჰქონდეს რამდენიმე ან ერთი კონკრეტული სიმპტომი, თუმცა იმ შემთხვევაშიც კი თუ თქვენ მხოლოდ თავის, ყელის ან სახსრების ტკივილმა შეგაწუხათ, აუცილებელია კორონავირუსზე ტესტის გაკეთება.
“ამ პერიოდისთვის კოვიდიფექციისთვის ძირითადი დამახასიათებელი ნიშანია: ტემპერატურა, ყელის ტკივილი, შემცივნება, სურდო, ხველა, ზოგჯერ დიარეა. მაგრამ შესაძლებელია, რომ ყველა ეს ნიშანი არ ჰქონდეს ადამიანს ან ჰქონდეს რამდენიმე ერთად. ზოგჯერ მხოლოდ სახსრების და კუნთების ტიკივილი აღენიშნებათ. ზოგს მარტო ეს აწუხებს და რაღაც უსიანომვნო შეგრძნება. ამას უფრო უკეთ ის ადამიანები ხვდებიან, ვინც ერთხელ მაინც გადაიტანა კოვიდინფექცია. მოდიან უკვე კოვიდგადატანილი ადამიანები და გვეუბნებიან, კოვიდის დროს რომ ვიყავი რაღაც ისე ვარ, მაგრამ სიცხე არ მაქვს. მოდიან მარტო ან თავის ტკივილით ან ყელის ტკივილით და უდასტურდებათ. ძალიან იშვიათია ყნოსვის და გემოს დაკარგვა. ადამიანს შეიძლება არ ჰქონდეს კოვიდი, მაგრამ ჰქონდეს სხვა ვირუსული ინფექცია. ამიტომ აუცილებელია, სანამ ადამიანი დიაგნოზს დაადგენს, როგორც კი შეუძლოდ იგრძნობს თავს, ოჯახის წევრებისგან, საზოგადოებისგან იზოლირებული იყოს და პირადი ჰიგიენა დაიცვას, ატაროს ნიღაბი. შემოდგომაა და სხვა ვირუსული ინფექციებიც მალე გააქტიურდება. ნებისმიერ შემთხვევაში თავდაცვის საშუალება არის ერთიდაიგივე”,_ ამბობს მენაღარიშვილი.
ავტორი
