ოკუპირებული აფხაზეთის დე ფაქტო პრეზიდენტმა ასლან ბჟანიამ „იზვესტიასთან“ ინტერვიუში განაცხადა, რომ ოჩამჩირეში რუსეთის საზღვაო ძალების ახალი, მუმდივი ბაზა განთავსდება და მისი თქმითვე, ამის შესახებ შეთანხმება რუსეთსა და აფხაზეთს შორის უკვე მიღწეულია.
“ჩვენ ხელი მოვაწერეთ შეთანხმებას და უახლოეს მომავალში რუსეთის საზღვაო ძალების მუდმივი ბაზა იქნება ოჩამჩირის რეგიონში.
ეს ყველაფერი მიზნად ისახავს როგორც რუსეთის, ისე აფხაზეთის თავდაცვისუნარიანობის დონის ამაღლებას და ასეთი ურთიერთქმედება გაგრძელდება, რადგან ის უზრუნველყოფს როგორც აფხაზეთის, ისე რუსეთის ფუნდამენტურ ინტერესებს და უსაფრთხოება პირველ ადგილზეა. ასევე არის რაღაცეები, რაზეც ვერ ვისაუბრებ“,_ განაცხადა ბჟანიამ.
მან ასევე ისაუბრა საქართველოსთან ურთიერთობის საკითხზე.
ჟურნალისტის კითხვაზე, საქართველო კვლავ ადანაშაულებს რუსეთს აფხაზეთის სავარაუდო ოკუპაციაში. როგორ შენდება დღეს ურთიერთობები სოხუმსა და თბილისს შორის, კვლავ შენარჩუნებულია თუ არა ურთიერთქმედების სფეროები – ეკონომიკური, სოციალური?
ბჟანია პასუხობს:
_ ურთიერთქმედება ხდება ერთი მიმართულებით – ეკონომიკის თვალსაზრისით, ენგურჰესი. ჩვენ ერთობლივად ვმუშაობთ ამ სადგურზე, კაშხალი მდებარეობს საქართველოს ტერიტორიაზე, თავად სადგური კი აფხაზეთის ტერიტორიაზეა. რაც შეეხება სხვა ასპექტებს, გარდა ჟენევის დისკუსიებისა (მოლაპარაკებების სერია რუსეთს, საქართველოს, აფხაზეთსა და სამხრეთ ოსეთს შორის, რომელიც გაიმართა 2008-2010 წლებში ჟენევაში სამხრეთ ოსეთში სამხედრო კონფლიქტის შემდეგ წარმოქმნილი პრობლემების გადაწყვეტის საკითხზე. 2008 წ. – „იზვესტია“), კონტაქტები პრაქტიკულად არ არის.
ჩვენ ვერ დავეთანხმებით თეზისს, რომ აფხაზეთი რუსეთის მიერ არის ოკუპირებული, ეს, რა თქმა უნდა, არანაირად არ შეესაბამება რეალობას. მაგრამ, როგორც ჩანს, მნიშვნელოვანია ვინმემ ამაზე ისაუბროს, რადგან ამ თეზისს მხარს უჭერენ საქართველოს მოკავშირეები – შეერთებული შტატები და დიდი ბრიტანეთი. ძალიან მოკლედ გითხარით, რა ცვლილებები მოხდა ჩვენს ეკონომიკაში და სოციალურ სფეროში რუსეთის ფედერაციის მიერ აფხაზეთის აღიარების შედეგად. ეს გარკვეულწილად ჯდება ტერმინ„ოკუპაციასთან“? ასე რომ, სასაცილო კი არ არის, მაგრამ დაე, ასე იფიქრონ.
ინფორმაციისთვის, ბჟანიამ გამოცემასთან საუბრისას აღნიშნა, რომ აფხაზეთის, როგორც დამოუკიდებელი სახელმწიფოს შენების პროცესი მარტივი არ იყო და ახლაც გრძელდება. მისივე თქმით, 1992 წელს საქართველოს სახელმწიფო საბჭომ ჩაიდინა აგრესიული აქტი აფხაზეთის წინააღმდეგ, დაიწყო აფხაზეთის მოსახლეობის სამამულო ომი, რომლის დროსაც საქართველოსთან ყველა სახელმწიფო და სამართლებრივი ურთიერთობა შეწყდა.
ბჟანიამ ასევე აღნიშნა ისიც, რომ აფხაზეთის, როგორც დამოუკიდებელი სახელმწიფოს საგარეო პოლიტიკური კურსი კოორდინირებულია რუსეთის საგარეო პოლიტიკასთან.
“დღეს საქართველოსთან მთელ სახმელეთო საზღვრის გასწვრივ აფხაზი მესაზღვრეები რუსებთან ერთად მსახურობენ, იქ არის რუსული სასაზღვრო პუნქტები და აფხაზეთში ასეთი ჯგუფის არსებობის წყალობით, მშვიდობის მდგრადი უზრუნველყოფის საკითხი მოგვარებულია და ეს არის უმაღლესი ღირებულება”,_ ამბობს ბჟანია.
_ რა არის სავარაუდო ზარალი აფხაზეთის ტერიტორიაზე სამხედრო ოპერაციების შედეგად?
_ დამოუკიდებელმა ექსპერტებმა შეაფასეს თუ რა ზარალი მიაყენა ომმა აფხაზეთის ეკონომიკას. 1995 წლის ფასებში ეს არის 11 მილიარდი დოლარი, რა თქმა უნდა, ჩვენ ჯერ ვერ მოვახერხეთ ამ ყველაფრის აღდგენა, მაგრამ მიუხედავად ამისა, რუსეთის მხარდაჭერა იყო კოლოსალური და ასე რჩება. ჩვენც, თავის მხრივ, ბოლო წლებში ვეძებთ შესაძლებლობას და ვასრულებთ, ვთქვათ, სახელმწიფო ბიუჯეტის ფორმირების მიზნებს უკვე რამდენიმე წელია, გვაქვს საკუთარი ფული, ცოტა, მაგრამ გვაქვს. გამოჩნდა ის, რისი დახმარებითაც ვავითარებთ ეკონომიკას.
ჩვენ ვავითარებთ ალტერნატიულ სატრანსპორტო მომსახურებას – ეს არის ის, რაც უკავშირდება აეროპორტს, ხელი მოეწერა მთავრობათაშორის ხელშეკრულებას და ცოტა ხნის წინ დასრულდა პროცედურა, კონკურსის შედეგად შეირჩა ინვესტორი და უახლოეს მომავალში დაიწყებს განხორციელებას. ეს არის ქალაქ სოხუმში ვლადისლავ გრიგორიევიჩ არძინბას სახელობის აეროპორტის აღდგენის პროექტი.
