ლანჩხუთში, სოფელ ნინოშვილის მოსახლეობა გეოლოგების დასკვნას უნდობლობას უცხადებს. საქმე ისაა, რომ რვა სექტემბერს გურიაში მომხდარი სტიქიის შემდეგ, გეოლოგების პირველადი დასკვნით, სოფლის საჯარო სკოლა მოსწავლეების მისაღებად საფრთხის შემცველად ჩაითვალა. თუმცა, განსხვავებულად ფიქრობენ ადგილობრივები და გეოლოგების დასკვნას ეჭვისთვალით უყურებენ. მათი თქმით, შენობა უსაფრთხოა.
“”ჯერ თქვეს, რომ უსაფრთხო იყო ეს შენობა, მერე კი საფრთხეს შეიცავდა. ჩვენ, მოსახლეობა, ვფიქრობთ, რომ არ წარმოადგენს საფრთხეს ჩვენი შვილებისთვის ამ შენობაში ყოფნა, არ გვინდა რომ ეს სკოლა გაუქმდეს. ეჭვს გეოლოგების დასკვნისადმი ის გვიჩვენა, რომ თავიდან გვითხრეს უსაფრთხოა ეს შენობაო. მერე რატომ შეიცვალა მათი ეს დასკვნა, არ ვიცით, ვერავინ ვერაფერს გვეუბნება. ვითხოვთ ხელახლა შემოწმდეს სხვა გეოლოგების მიერ.
წყლის სისტემის მოწესრიგება მიმდინარეობდა და15 სექტემბერს ამიტომაც ვერ დაიწყო აქ სწავლა, ახლა კი უცებ ფაქტის წინაშე დაგვაყენეს და გვითხრეს, რომ მეზობელი სოფლის სკოლის შენობაში გადაგიყვანთო. მხოლოდ სიტყვიერი დასკვნა არსებობს, გვაჩვენონ ოფიციალური საბუთი”, _ ამბობს სოფლის მოსახლეობა, რომელთა მოთხოვნასაც სკოლის პედაგოგებიც უერთდებიან.
მოსახლეობისგან განსხვავებულად ფიქრობს მუნიციპალიტეტის ხელმძღვანელობა, რომლებიც ადგილზე შეხვდნენ მათ და პირადად მოისმინეს მათი არგუმენტები. დაუშვებლად მიაჩნიათ გეოლოგების დასკვნის უგულვებელყოფა და მოსწავლეთა სიცოცხლის საფრთხის ქვეშ დაყენება.
,,გასულ კვირას იყვნენ ადგილზე გეოლოგები და ვიზუალური დათვალიერების შედეგად თქვეს, რომ აქ ბავშვების განთავსება არ იყო მიზანშეწონილი. ჩვენ გვქონდა კომუნიკაცია რესურსცენტრთან და ნინოშვილის სკოლას შევთავაზეთ უახლოესი სოფლის, ჯურუყვეთის #2 საჯარო სკოლის შენობა, დღის მეორე ცვლაში. თუმცა, სოფელი უკმაყოფილოა და გეოლოგების ოფიციალურ დასკვნას ითხოვენ. კვირის ბოლოს იქნება ეს დასკვნა, რომლის საფუძველზეც შესაბამისი გადაწყვეტილებაც იქნება მიღებული”, _ ამბობს ალექსანდრე სარიშვილი.
აღნიშნულ პროცესებთან დაკავშირებით ფეისბუქზე განცხადება გაავრცელა სკოლის ადმინისტრაციამაც.
,,გაცნობებთ, რომ ნინოშვილის საჯარო სკოლის მიმდებარე ტერიტორიის სრულყოფილი გეოლოგიური შესწავლის მიზნით ჩვენ თვითონ დავუკავშირდით სამხარაულის ეროვნული საექსპერტო ბიუროს ცხელ ხაზს; საიდანაც გვაცნობეს, რომ ამ მიზნით უნდა შევიდეს სკოლის განაცხადი (შეტანა შეიძლება ბათუმის ოფისიდანაც) და ერთი თვის ვადაში თბილისიდან მოვლენილი სპეციალისტები გამოკვლევების შედეგად დადებენ დასკვნას, რითაც გამოჩნდება სკოლის ტერიტორიის მდგრადობისა და მისი ექსპლოატაციაში გამოყენების ვარგისიანობა. ამ მიზნით ხვალ შევიტანთ განაცხადს. ყოველივე ზემოაღნიშნულის გამო გთხოვთ ჩვენი სკოლის ყველა გულშემატკივარს შევინარჩუნოთ სიმშვიდე და სკოლას მივცეთ ნორმალური ფუნქციონირების უნარი ალტერნატიულ ფართში საბოლოო დასკვნის დადებამდე”-წერია სკოლის ადმინისტრაციის მიერ გავრცელებულ განცხადებაში.
