საქართველოს საგუნდო საზოგადოები მეოთხე ეროვნულ კონკურსში ქართული ხალხური სიმღერისა და ქართული გალობის კატეგორიაში ლანჩხუთის კულტურის ცენტრთან არსებულმა ხუხუნაიშვილების სახელობის საეკლესიო გალობისა და ხალხური სიმღერის სკოლის გუნდმა პირველი ადგილი და ოქროს მედალი მოიპოვა.
„უკვე მესამედ მოვიპოვეთ პირველი ადგილი. ძალიან მიხარია და მინდა თითოეულ აღსაზრდელს მივულოცო ეს წარმატება. პირველ ივნისს კონსერვატორიის დიდ საკონცერტო დარბაზში ჩვენი სკოლაც მიიღებს მონაწილეობას, სადაც დაჯილდოების ცერემონიაც გაიმართება“, _ ამბობს ხუხუნაიშვილების სახელობის სიმღერა-გალობის სკოლის ლოტბარი ავთანდილ თურქია.
აღსანიშნავია, რომ ხუხუნაიშვილების სახელობის სკოლა 2010 წელს ჩამოყალიბდა ლანჩხუთელთათვის საამაყო თანაქალაქელის დავით ცინცაძის თაოსნობით. თუმცა, გარკვეული ტრადიციები ამ კუთხით ჩვენს რაიონს მანამდეც ქონდა. ნანული ჩავლეიშვილის ხელმძღვანელობით წლების განმავლობაში არსებობდა ბავშვთა ანსამბლი „იმედი“, რომელმაც არსებობა ქალბატონი ნანულის გარდაცვალების შეწყვიტა. სწორედ ამ ანსამბლის ნიადაგზე აღორძინდა ხუხუნაიშვილების სახელობის სკოლა, რომელიც საკმაოდ დიდ საქმეს ემსახურება ლანჩხუთის რეალობაში.
ლანჩხუთის სალოტბარო სკოლის პირველი ხელმძღვანელი გახლდათ ჩოხატაურის მკვიდრი ავთანდილ მახარაძე, რომლის სკოლისადმი ღვაწლი ფასდაუდებელია. ბატონი ავთო შემდგომ მშობლიურ რაიონს დაუბრუნდა და აქ ბერძენიშვილების სახელობის სალოტბარო სკოლა ჩაუდგა სათავეში, მისი ადგილი უმცროს კოლეგას მერაბ თურქიას დაუთმო. ამჟამად კი ხუხუნაიშვილების სახელობის სკოლას გიორგი მთაწმინდელის სახელობის გალობის უმაღლესი სკოლის აღზრდილი, ანზორ ერქომაიშვილის ერთ-ერთი საუკეთესო მოსწავლე ავთანდილ თურქია ხელმძღვანელობს.
