გუშინ ცნობილი გახდა რომ ძიუდოში ოლიმპიურმა და ევროპის ჩემპიონმა ლაშა ბექაურმა ვარჯიში განაახლა.
ტოკიოს ოლიმპიური თამაშების შემდეგ სპორტსმენმა რამდენიმე ოპერაცია გაიკეთა, ამჟამად მომჯობინდა და დიდ სპორტში დაბრუნებისათვის პირველ ნაბიჯებს დგამს. ოლიმპიური ჩემპიონი ამჟამად ბაკურიანში იმყოფება და მომავალი შეჯიბრებებისათვის ემზადება.
ჯერჯერობით შეუძლებელია მის უახლოეს სპორტულ გეგმებზე საუბარი – სად იასპარეზებს, შეძლებს თუ ვერა მსოფლიოს ჩემპიონატში გამოსვლას. ეს ყველაფერი მზადების პროცესში დაკვირვების შემდეგ გახდება ცნობილი.
გუშინ კვიპროსულმა გამოცემამ „Goal.com.cy“ საინტერესო ინფორმაცია გაავრცელა. ფამაგუსტას „ანორთოსისთან“ განშორების შემდეგ, თემურ ქეცბაია სამწვრთნელო საქმიანობას შესაძლოა ახლო მომავალშივე დაუბრუნდეს. მისი სამსახურით კვიპროსის ეროვნულ ნაკრებში ინტერესდებიან.
„ბევრი საუბრობს, რომ თემურ ქეცბაიას ყველაზე მეტი შანსი აქვს ჩვენი ნაკრების მომდევნო მწვრთნელი გახდეს. საქმეში ჩახედული ხალხი ამბობს, რომ ფაქტობრივად, პირველი კონტაქტი მაშინვე შედგა, როდესაც სპეციალისტსა და „ანორთოსისს“ შორის თანამშრომლობა გაწყდა. ქეცბაიას პასუხი კი ასეთი იყო: „ცოტას დავისვენებ და შემდეგ განვიხილოთ“, – დაწერა კვიპროსულმა გამოცემამ.
კვიპროსის ნაკრებს, რომელსაც ამჟამად ბერძენი ნიკოლაოს კოსტენოგლუ წვრთნის, უეფას „ერთა ლიგაში“ არცთუ სახარბიელო მდგომაროება აქვს. გუნდმა C ლიგის მე-2 ჯგუფში 4 მატჩი ჩაატარა, საიდანაც 2 ფრედ დაასრულა, 2 კი დათმო და ბოლო ადგილზეა.
საქართველოს საკალათბურთო ნაკრებისა და „ინდიანას“ მოთამაშე გოგა ბითაძე შეიძლება ახალ კლუბში აღმოჩნდეს. „ვაშინგტონ ვიზარდსს“ გამთამაშებლის დამატება სურს და შესაძლოა „ინდიანას“ ორი კალათბურთელი, მალკომ ბროგდონი და გოგა ბითაძე, დედაქალაქურ გუნდში აღმოჩნდეს
„ინდიანა“ მიიღებს კენტავიუს კოლდუელ-პოუპს, იშ სმიტსა და 23 ივნისის დრაფტის ლატარიის მე-10 არჩევანის უფლებას. „ვაშინგტონს“ მალკომ ბროგდონი და გოგა ბითაძე შეუერთდებიან. ამასთან ერთად, დრაფტზე 31-ე არჩევანის უფლება ექნებათ.
„ბითაძე „ვაშინგტონს“ კარგად მოერგება. მათ ცენტრი სჭირდებათ, რადგან გუნდმა მონტრზელ ჰარელი გაუშვა,“ – დაწერა ამერიკულმა გამოცემამ „The Athletic“.
მილანის „ინტერის“ შემტევი ედინ ჯეკო გიორგი მამარდაშვილის „ვალენსიაში“ გადასვლასთან ძალიან ახლოსაა.
ცოტა ხნის წინ „ინტერმა“ რომელუ ლუკაკუ დაიბრუნა და სავარაუდოდ, პაულო დიბალას ტრანსფერსაც წარმატებით დაასრულებს. ამის გამო ბოსნიის ნაკრების თავდამსხმელს ამჟამინდელი გუნდიდან წასვლა სურს.
ედინ ჯეკო გასულ სეზონში „ინტერის“ ერთ-ერთი ლიდერი იყო და „სერია A“-ში ჩატარებულ 36 შეხვედრაში 13 გოლითა და 5 შედეგიანი გადაცემითაც გამოირჩა.
გუშინ ცნობილი გახდა, რომ ერთდროულად რვა არგენტინელი ექიმი წარსდგება სასამართლოს წინაშე დიეგო მარადონას მკვლელობის ბრალდებით, – ასეთია დადგენილება, რომელიც სპეციალური გამოძიების დასრულების შემდეგ გახდა ცნობილი.
236-გვერდიან დოკუმენტში ეჭვქვეშაა დაყენებული ლეგენდარული ფეხბურთელის მკურნალ ექიმთა მოქმედება და უმოქმედობა, რამაც ფატალური შედეგი დააყენა. დოკუმენტში აღნიშნულია, რომ რვა ადამიანს, რომელთა შორის არიან ექიმები, მედდები და ფსიქოლოგი, პირდაპირ ედებათ ბრალი ჩვეულებრივ მკვლელობაში.
ასეთი დანაშაულის გამო, არგენტინაში გათვალისწინებულია პატიმრობა 8-დან 25 წლამდე. ჯერჯერობით, ცნობილი არ არის როდის გაიმართება სასამართლო სხდომები, რომელმაც, შესაძლოა, ახალი დეტალები გამოავლინოს.
ავტორი
