გუშინ ცნობილი გახდა რომ ქართველი ძალოსანი ლაშა ტალახაძე უახლოეს მომავალში ახალ წონაში იასპარეზებს.
2024 წელს საფრანგეთის დედაქალაქ პარიზში დაგეგმილ ოლიმპიურ თამაშებზე ძალოსნები ჩვეული 14 წონითი კატეგორიის ნაცვლაც 10-ში გამოვლენ, მათ შორის, წონის შეცვლა ლაშა ტალახაძესაც მოუწევს.
აღნიშნული გადაწყვეტილება უზბეკეთის დედაქალაქ ტაშკენტში მსოფლიოს 2021 წლის ჩემპიონატის დასრულების შემდეგ, ძალოსნობის საერთაშორისო ფედერაციის კონგრესზე იქნა მიღებული, საბოლოო სიტყვა კი საერთაშორისო ოლიმპიურ კომიტეტზეა. ძალოსნები პასუხს თებერვლის ბოლოსკენ ელიან და უდიდესი ალბათობით, ის დადებითი იქნება.
ტოკიოს ოლიმპიურ თამაშებში ძალოსნებმა 14 მედალი გაითამაშეს: კაცებში – 61, 67, 73, 81, 96, 109 და +109 კგ-მდე წონით კატეგორიებში, ქალებში კი – 49, 55, 59, 64, 76, 87 და +87 კგ-ებში. ახალი რეგლამენტის თანახმად, საოლიმპიადე წონები ათამდე დადის. კაცები – 61, 73, 89, 102 და +102 კგ, ხოლო ქალები – 49, 59, 71, 81 და +81 კგ.
ძალოსანთა მიერ გადადგმული ნაბიჯები იქითკენაა მიმართული, რომ საერთაშორისო ასპარეზზე ამ სპორტის რეპუტაცია გადარჩეს.
ზაზა ფაჩულია კი შეიძლება მოედანს დროებით დაუბრუნდეს და ეროვნული საკალათბურთო ასოციაციის პირველობაზე „გოლდენ სტეიტის“ მაისური რამდენჯერმე მოირგოს.
კოვიდსიტუაციის გართულების გამო, ორიოდე დღის წინ NBA-მ კანონი მიიღო, რომელიც ძალაში დაახლოებით ერთი თვე იქნება. ამ კანონის თანახმად, კლუბებს კოვიდინფიცირებული თითოეული მოთამაშის ნაცვლად დროებით ახლის აყვანა შეეძლებათ. ამის წყალობით, ასოციაცია თავიდან აირიდებს თამაშების გადადებას ახალი კორონავირუსის გახშირებული შემთხვევების ფონზე.
გუშინ გამოცემამ „Golden State Of Mind“ შემდეგი ინფორმაცია გაავრცელა:
„ზაზა ფაჩულია უკვე 37 წლისაა და ის უკვე ორ წელიწადზე მეტია, რაც არ თამაშობს. თუმცა ის კლუბშია, სადაც საკალათბურთო ოპერაციების კონსულტანტად მუშაობს. ასე რომ, კლუბისთვის იოლია, მისი განაცხადში დროებით შეყვანა. შეიძლება, უკვე ასაკშია, მაგრამ ზაზა არც მაშინ იყო სწრაფი, როცა ორი საჩემპიონო წელი გაატარა „გოლდენ სტეიტში“, მას სხვა პლუსები ჰქონდა. უბრალოდ, წარმოიდგინეთ დიდი ქართველი შობის საღამოს „გოლდენ სტეიტის“ ფორმით, როგორ „სქრინებს“ დაუყენებდა სტეფ კარის! დევინ ბუკერს კი სამქულიანის სროლისას ფეხს „დაუტოვებდა“. ეს ფანტაზიის ნაყოფი ნამდვილად არ არის. ზაზა ფაჩულიამ რამდენიმე შეხვედრაში მართლა შეიძლება „გოლდენ სტეიტის“ მაისური მოირგოს!“.
თეორიულად არ არის გამორიცხული, რომ ზაზამ რომელიმე კოვიდინფიცირებული 1-2 თამაშით შეცვალოს, თუმცა პრაქტიკულად ძნელია, იმის წარმოდგენა, რომ „გოლდენ სტეიტი“ ამ ნაბიჯზე წავიდეს. კარიერის დასრულების მიუხედავად, ზაზა ხშირად ვარჯიშობს „გოლდენ სტეიტის“ დარბაზში. ფაჩულიამ ერთი მატჩიც რომ ითამაშოს, მას NBA-ის კარიერაში უკვე 17 სეზონი ექნება.
გუშინ ხვიჩა კვარაცხელია შესახებ ახალი ინფორმაციები გავრცელდა. ყაზანის „რუბინის“ გენერალურმა დირექტორმა რუსტემ საიმანოვმა ხვიჩა კვარაცხელიას შესახებ რუსულ მედიაში განაცხადა რომ ქართველი ფეხბურთელი იანვარში „რუბინში“ დარჩება.
„ხვიჩას მომავალი? ის რჩება. თუ 20 მილიონ ევროს გადაიხდიან? უარს ვერ ვიტყვი“, – ციტირებს რუსული პრესა საიმანოვის სიტყვებს.
გუშინვე, მოგვიანებით, ცნობილი გახდა რომ ინგლისური „ვესტ ჰემი“ ხვიჩა კვარაცხელიას შეძენას სერიოზულად აპირებს.
გამოცემა „Football Insider“-ის მტკიცებით, „ვესტ ჰემი“ ქართველი ფეხბურთელისთვის „ბრიტანულ“ ბრძოლაში ლიდერობს. წყაროს ინფორმაციით, ლონდონური კლუბი მზადაა „რუბინის“ მოთხოვნები დააკმაყოფილოს და ელოდება, რომ გარიგება იანვრის სატრანსფერო პერიოდში დასრულდება. „რუბინმა“ ხვიჩას სანაცვლოდ ინგლისელებს 13 მილიონი გირვანქა სტერლინგი (15 მილიონი ევრო) მოსთხოვა. „ვესტ ჰემი“ მზადაა 20 წლის ქართველ შემტევში ეს თანხა გადაიხადოს.
ჯერჯერობით, სხვა დეტალები არ ვრცელდება. ცნობილია რომ „ვესტ ჰემის“ გარდა, კვარაცხელიას „ევერტონსა“ და „საუთჰემპტონს“ უკავშირებენ.
საქართველოს ნაკრებისა და ოდესის „ჩერნომორეცის“ ფეხბურთელი გიორგი წიტაიშვილი უნგრულ „ფეჰერვარს“ დაუკავშირეს. გამოცემა „nso.hu“-ს ინფორმაციით, 21 წლის ნახევარმცველით უნგრული კლუბი დაინტერესებულია და ტრანსფერი შეიძლება იანვარში შედგეს.
„ფეჰერვარი“ არ არის ერთადერთი გუნდი, რომელსაც წიტაიშვილი ბოლო დროს დაუკავშირეს. მანამდე გავრცელდა ინფორმაცია ბრატისლავის „სლოვანის“ შესახებ, რომელსაც ვლადიმირ ვაისი წვრთნის. საქართველოს ნაკრების ყოფილი თავკაცი პირადადაა დაინტერესებული გიორგის გადაბირებით, ხოლო პოლონურ მასმედიაში რამდენიმე დღის წინ კრაკოვის „ვისლას“ ინტერესის შესახებაც დაიწერა.
