გუშინ, ახლო წარსულში „ნაპოლის“ ლეგენდარულმა მოთამაშემ, კარეკამ იტალიურ მასმედიას ინტერვიუ მისცა და როგორ იქნებოდა, ხვიჩა კვარაცხელიას შესახებაც არ ესაუბრა.
„კვარა დიდებული მოთამაშეა, თუმცა „ნაპოლის“ შეტევების უმეტესობა მხოლოდ მისი ფლანგიდან არ უნდა განხორციელდეს. ჩვენ ბალანსი გვჭირდება, მარჯვენა ფლანგი მეტად უნდა დაიტვირთოს, რაც ქართველს თავისუფლებას მისცემს. „ინტერთან“ მატჩში კვარაცხელიამ თავისი დიდებული თვისებები სწორედ ამიტომ ვერ გამოავლინა“, – განაცხადა კარეკამ.
გუშინ, ხვიჩა კვარაცხელიამ „ნაპოლის“ რიგებში გაციების შემდეგ პირველი სრულფასოვანი წვრთნა ჩაატარა. ნეაპოლური გუნდის ექიმების მტკიცებით, საქართველოს ნაკრების შემტევი, იტალიის პირველობის მორიგ ტურში, „რომას“ წინააღმდეგ აუცილებლად იასპარეზებს.
ასევე გამომჯობინების გზაზეა „კრემონეზეს“ მცველი ლუკა ლოჩოშვილიც. ბოლო მატჩებში ქართველი ამჟამინდელი გუნდის განაცხადშიც ვერ ხვდებოდა. გულშემატკივრები ფიქრობდნენ, რომ მან მწვრთნელის ნდობა დაკარგა.
აღმოჩნდა რომ საქართველოს ეროვნული გუნდის წევრს საზარდულის ტრავმა ჰქონდა და ვარჯიში გუშინ განაახლა.
თბილისის „დინამომ“ კი კონგოს ეროვნული ნაკრების ცენტრალური მცველი ფრანსის ნზაბა დაიმატა. აფრიკელი მოთამაშე ქართულ გუნდს სტამბოლის „ბაშაკშეჰირიდან“ ერთწლიანი იჯარით შეუერთდა.
თურქეთის პირველობამდე ნზაბა სამშობლოში ასპარეზობდა, „ბაშაკშეჰირს“ გასული წლის ზაფხულში შეუერთდა. ამ პერიოდის განმავლობაში 20 წლის ცენტრალური მცველი სტამბოლური კლუბის ასაკობრივ გუნდებში ასპარეზობდა, მიმდინარე სეზონში კი, მთავარი გუნდის წევრი გახდა და სამ შეხვედრაში მიიღო მონაწილეობა.
გუშინ ცნობილი გახდა, რომ დიდი ალბათობით, ლეო მესი „პარი სენ ჟერმენთან“ ხელშეკრულებას არ გაახანგრძლივებს.
ფრანგული გუნდი არგენტინელთან მოლაპარაკებებს დიდი ხანია აწარმოებს და „პსჟ“-ს ხელმძღვანელები ოპტიმისტურად იყვნენ განწყობილი, მაგრამ სიტუაცია შეიცვალა. ლეოს პარიზულ კლუბთან კონტრაქტი მიმდინარე სეზონის ბოლოს ეწურება.
ლეო მესი „პსჟ“-ში 2021 წლიდან თამაშობს და 55 მატჩში 24 გოლი გაიტანა.
„რომა“-ს ნახევარმცველი ნიკოლო ძანიოლო კი „მილანში“ გადასვლასთან ახლოსაა. 23 წლის ფეხბურთელმა მილანელებთან პირადი კონტრაქტის დეტალები უკვე შეათანხმა.
„მილანი“ იტალიის ნაკრების ნახევარმცველს ხელშეკრულებას 2027 წლის ივნისამდე პირდება, რომელშიც ხელფასის სახით წლიური 3,5 მილიონი ევრო იქნება გათვალისწინებული და ამას ბონუსებიც დაემატება.
ნიკოლო ძანიოლომ, რომელსაც წინა წლებში ზედიზედ ორი სერიოზული ტრავმის გადატანა მოუხდა, მიმდინარე სეზონში ყველა ტურნირის 17 მატჩში ითამაშა, გაიტანა 2 გოლი და მიითვალა 3 საგოლე გადაცემა.
გუშინ, ცნობილი გახდა რომ „ტოტენჰემის“ თავდამსხმელმა, ჰარი კეინმა, შესაძლოა ლონდონურ კლუბთან ხელშეკრულება გაახანგრძლივოს. ამ გუნდთან მისი მოქმედი კონტრაქტი 2024 წლის ივნისამდეა ძალაში.
კეინი „ტოტენჰემში“ 2004 წლიდანაა და საფეხბურთო კარიერა უმცროსი ასაკობრივი კატეგორიიდან დაიწყო. საინტერესოა, რომ კარიერის განმავლობაში მას არც ერთი ტიტული მოუგია.
პოლონეთის ნაკრების მთავარი მწვრთნელი ფერნანდუ სანტუში გახდა, რომელიც პოლონეთის ნაკრებში 2026-წლამდე იმუშავებს.
ფერნანდუ სანტუში 2014-2022 წლებში პორტუგალიის ნაკრებს ავარჯიშებდა, რომელსაც 2016 წელს – ევროპის ჩემპიონატი, ხოლო 2019 წელს ერთა ლიგა მოაგებინა, მაგრამ მსოფლიოს ჩემპიონატზე მეოთხედფინალში მაროკოსთან მარცხის შემდეგ თანამდებობა დაატოვებინეს.
გუშინ, ინგლისურმა „ევერტონმა“ მთავარი მწვრთნელი ფრენკ ლამპარდი თანამდებობიდან გაათავისუფლა. ახლა ევერტონელთა სიაში პირველი კანდიდატი არგენტინელი მარსელო ბიელსაა.
ლონდონური „ჩელსის“ ყოფილმა ფეხბურთელმა ლივერპულური კლუბი გასული წლის იანვარში ჩაიბარა და კონტრაქტის თანახმად, 2024 წლის ზაფხულამდე უნდა ემუშავა, თუმცა, არ დასცალდა.
მიმდინარე სეზონში „ევერტონს“ 20 მატჩში მხოლოდ 15 ქულა აქვს და ინგლისურ პრემიერლიგაში ბოლოსწინა მე-19 პოზიცია უკავია.
ლამპარდი 2019 წლის ზაფხულიდან 2021 წლის იანვრამდე „ჩელსის“ ავარჯიშებდა, რომელთან ერთადაც 2019-20 წლების ინგლისის თასის ფინალამდე მივიდა, შემდეგ კი, ის თომას ტუხელმა შეცვალა.
ავტორი
