გუშინ ფიბა-მ ევროპის 2022 წლის ჩემპიონატის ფინალური სტადიის კალენდარი დაამტკიცა _ 1 სექტემბერს, თბილისის დროით, 15:30 საათიდან ერთმანეთს მსოფლიოს მოქმედი ჩემპიონი ესპანეთი და ბულგარეთი დაუპირისპირდებიან.
ტურნირის პირველ დღეს ევროპის ჩემპიონატში A და B ჯგუფების წევრები (თბილისსა და კიოლნში) ჩაებმებიან, C და D ჯგუფის (მილანსა და პრაღაში) თამაშები კი 2 სექტემბერს დაიწყება.
საქართველოს ნაკრები ყველა შეხვედრას თბილისის დროით 21:00 საათზე დაიწყებს: 1 სექტემბერს ბელგიასთან, 3-ში _ ესპანეთთან, 4-ში _ თურქეთთან, 6-ში _ ბულგარეთთან, ხოლო 7-ში _ რუსეთთან. ჩვენი ქვეყნის დედაქალაქში დაგეგმილი შეხვედრების ყოველდღიური განრიგი შემდეგია: მატჩები სტარტს 15:30, 18:15 და 21:00 საათზე აიღებს.
ტურნირის რეგლამენტის თანახმად, 4 ექვსგუნდიანი ჯგუფიდან 4-4 საუკეთესო პლეი ოფში გავა და თამაშს მერვედფინალიდან გააგრძელებს. ე
ვრობასკეტი 2022 წლის 1-18 სექტემბერს ჩატარდება, ჯგუფური ეტაპის მატჩებს კიოლნი (გერმანია), მილანი (იტალია), პრაღა (ჩეხეთი) და თბილისი უმასპინძლებს, პლეი ოფი კი ბერლინშია (გერმანია) დაგეგმილი.
რუსეთში კი ხვიჩა კვარაცხელია კიდევ ერთხელ მწარედ გააკრიტიკეს. სამწუხაროა, რომ საქართველოს ნაკრების მოთამაშის მიმართ აგორებულმა “ანტიკომპანიამ” ტრადიციული სახე მიიღო. თუ ამ სახის ქმედებებს წერტილი არ დაესმება, ალბათ, უპრიანი იქნება ხვიჩა კვარაცხელია ყაზანის “რუბინს” მაქსიმალურად სწრაფად გაშორდეს. წინააღმდეგ შემთხვევაში, პროფესიული კარიერის აწყობა ძალიან გაუჭირდება.
მიმდინარე კვირას, რუსეთის პირველობის მორიგ შეხვედრაში “რუბინი” სტუმრად “ნიჟნი ნოვგოროდს” დაუპირისპირდა და მორიგი მარცხი იწვნია _ 1:2. ყაზანური კლუბის მთავარმა მწვრთნელმა ლეონიდ სლუცკიმ ქართველი მოედნიდან 52-ე წუთზე გაიყვანა. კვარაცხელია მოედნიდან ძალიან უკმაყოფილო გავიდა _ ხელთათმანები მოისროლა და სათადარიგო სკამზე არ გაჩერებულა, პირდაპირ გასახდელში გაიქცა.
მატჩის შემდეგ სლუცკიმ ამ ცვლილებასთან დაკავშირებით შემდეგი განცხადება გააკეთა: “მოედანზე მისი მოქმედებებიდან გამომდინარე, შეცვლას ჯერ კიდევ შესვენებაზე ვფიქრობდი”.
ამ კომენტარს გამოცემა “sports.ru”-ზე რუსი გულშემატკივრები ირონიულად გამოეხმაურნენ:
“ხვიჩა ტოპ-კლუბში გადასვლამდე ენერგიას ზოგავს”.
“რაღაცნაირად ჩამოვრჩი სიტუაციას _ კვარაცხელია “მილანში” გადადის თუ “იუვენტუსში”, უფრო მეტს რომელი იხდის?”
“ხვიჩას ეწყინა, რომ ევროპულმა კლუბებმა ვერ შეამჩნიეს და თამაში შეწყვიტა”.
“სლუცკი ძალიან რბილია. ამის გამო გუნდში წესრიგი არაა. ფეხბურთელები ვერ იგებენ, რომ თუ ისინი ბევრს არ იმუშავებენ, ისეთი მაღალი კლასის მოთამაშეეები, როგორებიც მესი და რონალდო არიან, ვერ გახდებიან. თუმცა, მათ ხომ საბჭოთა ლოგიკა აქვთ”.
გუშინ ფრანგულ მასმედიაში საინტერესო ინფორმაცია გამოქვეყნდა _ მას შემდეგ, რაც ლეო მესიმ “ოქროს ბურთი” მეშვიდედ მოიგო, გადაწყვიტა ნათესავებისთვის, მეგობრებისა და თანაგუნდელებისთვის დიდი წვეულება მოეწყო და მასზე თითქმის ყველა მიიწვია, ვისაც კი ლეოსთან ბურთი უგორებია.
მიუხედავად იმისა, რომ დაგეგმილ წვეულებაზე თითქმის მთელი არგენტინის ნაკრები ცოლებითურთ იყო მიწვეული, მასზე არ მოუხმეს მაურო იკარდისა და მის უკვე მერამდენედ შემორიგებულ ცოლს ვანდა ნარას. მედიის ვარაუდით, ლეო მესიმ გაითვალისწინა ნაკრებში თანაგუნდელების ცუდი განწყობა მაურო იკარდის მიმართ, რომელმაც თავის დროზე ფეხბურთელ მაქსი ლოპესს ცოლი, სწორედ ხსენებული ვანდა ნარა წაართვა და ამ ამბავს მაშინ დიდი სკანდალი მოჰყვა.
ლეო პარიზში დიდ წვეულებას გეგმავს. აი, ბარსელონაში კი მის ოფიციალურ წარმომადგენლებს სასამართლოში სიარული მოუწევთ.
ესპანური გამოცემა “AS”-ის მტკიცებით ბარსელონას ხელისუფლებამ ქალაქში არსებული სასტუმროს დანგრევის ბრძანება მიიღო, რომელიც 34 წლის არგენტინელს ეკუთვნის. 77-ნომრიანი შენობის დემონტაჟის მიზეზი საქალაქო სტანდარტებთან მისი შეუსაბამობაა.
სასტუმრო მესიმ წლების წინ შეიძინა და “კამპ ნოუს” სტადიონის სიახლოვეს მდებარეობს. საინტერესოა რომ არგენტინელი სასტუმროებს, ასევე, ფლობს იბიცასა და მაიორკაზე, რომლებიც გაერთიანებულია “Majestic Hotel Group”-ში. 2017 წელს, ბარსელონაში ობიექტის შეძენა მესის 30 მილიონი ევრო დაუჯდა.
ცნობილი ხდება რომ სასტუმროს შეძენისას ლეო მესის არ ჰქონდა ინფორმაცია იმის შესახებ, რომ ქალაქის ხელისუფლებას უკვე ჰქონდა შენობის დანგრევის განზრახვა, მისი სამშენებლო ნორმებთან შეუსაბამოობის გამო. ნაგებობის აივნები მეტისმეტად დიდია, კონსტრუქციაში ცვლილებების შეტანის შემთხვევაში კი არსებობს საფრთხე, რომ შენობა სულაც ჩამოინგრეს. სტანდარტებს არც სასტუმროს სახანძრო უსაფრთხოების გეგმა აკმაყოფილებს.
[sexy_author_bio]
