უკანონო ფორმირების შექმნის, ხელმძღვანელობის და მასში გაწევრიანების ფაქტებზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 223-ე მუხლის პირველი ნაწილით დაიწყო.
“საზოგადოებას შევახსენებთ, რომ დაუშვებელია, კანონიერი სახელმწიფო სტრუქტურების შემცვლელი ნებისმიერი წარმონაქმნის შექმნა, მისი ხელმძღვანელობა, მასში გაწევრიანება ან მისი შექმნისკენ მოწოდება.
ამასთან, ქვეყანაში საზოგადოებრივი წესრიგის უზრუნველყოფა კანონით მხოლოდ შინაგან საქმეთა სამინისტროს ფუნქციაა. შესაბამისად, როგორც პოლიციის, ისე სხვა სახელმწიფო უწყების ფუნქციის შესრულების ნებისმიერი მცდელობა
დაუყოვნებლივ იქნება აღკვეთილი. ძალადობის, პოლიციის მიმართ დაუმორჩილებლობის და კანონის დარღვევის თითოეულ ფაქტზე სამინისტროს ექნება შესაბამისი რეაგირება.
გამოძიების ფარგლებში ჩატარდება ყველა აუცილებელი საგამოძიებო მოქმედება და მოხდება შესაძლო დანაშაულის ჩამდენი თითოეული პირის ქმედების სამართლებრივი შეფასება“, _ აღნიშნულია უწყების მიერ გავრცელებულ განცხადებაში.
შეგახსენებთ, რომ გუშინ, ბიზნესმენმა ლევან ვასაძემ ვერის ბაღში შეკრებულ ხალხს ეროვნული ინტერესების დაცვის სახელით არეულობისკენ მოუწოდებს.
ბიზნესმენის თქმით, ხელისუფლება ვერ უზრუნველყოფს ქვეყანაში წესრიგს, ამიტომ ის დღეიდან რაზმების შექმნა იწყებს.
„ჩვენ მოვახდენთ დღეს თვით ორგანიზებას, სახალხო რაზმებად. გვეყოლება ათეულები, ათისთავებით, ეს ათეულები შეიკრიბება ათ-ათი, ასეულებადასისთავებით და ათი ასეული შეადგენს ათასეულს და იქნება ლეგიონი. ერთ კვირის განმავლობაში იმუშავებენ თბილისში, გაინაწილებენ ქალაქს და იქნება ქალაქის პატრულირება. იარაღი ჩვენ არ გვექნება, გარდა ერთისა – ჩვენ მათ შევუკრავთხელებს ქამრებით, რომლებიც გვექნება თან და მივაბრძანებთ იმ ადგილიდან.
ეს იქნება ათეულების დარტყმები ამ კორდონებზე. პირველი ათეული შევა ვერ გაანგრევს, მაგრამ მეორე დაარტყამს, დაასუსტებს და მესამე ხომ შევა, მეოთხე ხომ შევა, მეხუთე ხომ შევა. გარღვევისას ღმერთ არ გაგიწყრეთ და არ დაუწყოთ ცემა ჩვენებს, იმიტომ, რომ მაგ შემთხვევაში თქვენ მიიღებთ პასუხს. ეს კომბალი არ მოხვდეს არც ერთ გარყვნილ ადამიანს, არც ერთ ქათამს, არც ერთ თხას. ჩვენ თავს არ გაგალახინებთ ძმაო. ეს გამორიცხულია, თქვენ მიიღებთ მსოფლიოში პირველ, კომბლების რევოლუციას,“ _განაცხადა ლევან ვასაძემ.
მისი თქმით, სახელმწიფო ხალხის ნებას უნდა დაემორჩილოს და ლგბტ თემის წარმომადგენლებს ქუჩაში გამოსვლის უფლებას არ მისცეს.
პირები, რომელიც ვასაძის ორგანიზაციში დარეგისტრირდებიან მიმდინარე კვირის განმავლობაში ქალაქში პატრულირებას ქამრებითა და კომბლებით შეიარაღებული დაიწყებენ. ისინი წინააღმდეგობის გაწევას აპირებენ პოლიციისთვისაც, თუ ისინი მათ მოთხოვნებს არ გაითვალისწინებენ.
