„გურია ნიუსს“ უფლებადამცველი, იურისტი ლია მუხაშავრია ესაუბრა.
_ ქალბატონო ლია, საქართველოს პარლამენტმა იუსტიციის უმაღლესი საბჭოს მიერ წარდგენილი მოსამართლეების უვადოდ განმწესების პროცესი გაზაფხულამდე შეაჩერა, თუმცა, საზოგადოების გარკვეულ ნაწილი თვლის, რომ საკანონმდებლო ორგანო მოსამართლეების უვადოდ განმწესებაზე საბოლოოდ უარს არ იტყვის. როგორ ფიქრობთ, სასამართლოსა და პარლამენტს შორის დაწყებული ურთიერთდაპირისპირება როგორი შედეგით დასრულდება?
_ სასამართლოსა და პარლამენტს შორის გარიგებები კულუარულად დაიწყება. თუ საქართველოს პარლამენტს გონიერება არ ეყოფა და საკანონმდებლო ორგანოში კორუფციული ელემენტი იმძლავრებს, მაშინ იუსტიციის უმაღლესი საბჭოს მიერ წარდგენილი მოსამართლეების სია დამტკიცდება. იუსტიციის უმაღლესი საბჭო იმიტომ გახდა ასეთი თავხედი, რომ საქართველოს პარლამენტმა ამის შესაძლებლობა მისცა. მიხეილ ჩინჩალაძე, რომელსაც სწორედ პარლამენტი უწყობს ხელს, რომ უვადოდ დანიშნული მოსამართლე გახდეს, სასამართლო სისტემის ორგანიზებულ ჯგუფს უდგას სათავეში. სასამართლო სისტემა დღეს კლანურ დანაშაულებრივ სისტემად ყალიბდება, რაც სახელმწიფოს ძალიან დიდ საფრთხეს უქმნის.
_ კონსტიტუციის მიხედვით, საკანონმდებლო ორგანომ იუსტიციის უმაღლეს საბჭოს, ფაქტობრივად, განუსაზღვრელი უფლებამოსილება მიანიჭა, რამაც სისტემაში არსებული პრობლემები კიდევ უფრო გამოაშკარავა. მოლოდინი იმისა, რომ მმართველი პარტია საკანონმდებლო ცვლილებების გახორციელებას დაიწყებს, რამდენად მაღალია ?
_ ვფიქრობ, რომ ამ საკითხთან დაკავშირებით, პარლამენტში საკმარისი გონიერება, ნება ან პოლიტიკური მზაობა არ არსებობს, ამიტომ პირდაპირ ბიძინა ივანიშვილს მივმართავ, დაინახოს და თვალი გაუსწოროს სისტემაში არსებულ რეალობას. დღეს სასამართლო სისტემა იმ ურჩხულად გადაიქცა, რომელიც თქვენც გადაყლაპავთ. ბიძინა ივანიშვილი უნდა მიხვდეს, რომ გადამჭრელი ზომების მიღება აუცილებელია.
_ დღეს იუსტიციის უმაღლესი საბჭო უვადოდ მოსამართლედ დანიშვნის შანსს ლევან მურუსიძესაც აძლევს, რასაც საბჭოს არამოსამართლე წევრები პარლამენტის მიერ გუშინ მიღებულ გადაწყვეტილებას უკავშირებენ. ისეთი მოსამართლის თანამდებობაზე შესაძლო განმწესებით, რომელიც საზოგადოების ნაწილში კარგი რეპუტაციით ვერ სარგებლობს, იუსტიციის უმაღლესი საბჭო საკუთარი ძალის დემონსტრირებას ახდენს?
_ იუსტიციის უმაღლესი საბჭოს მხრიდან გადადგმული ნაბიჯი ააშკარავებს იმას, საბჭო კლანურად კარგად ორგანიზებული, ძალიან მძლავრი და გავლენის მქონე ჯგუფია, რომელსაც შეუძლია ულტიმატუმი წაუყენოს თვით საქართველოს პარლამენტს. ახლა ეს ჯგუფი ისეთი გათავხედებული და გაძლიერებულია, რომ არ ერიდება ისეთი ოდიოზური და სახელგატეხილი მოსამართლე განამწესოს უვადოდ თანამდებობაზე, როგორიც ლევან მურუსიძეა.
_ არსებობს მოსაზრება, რომ სასამართლო სისტემის გავლენიან ჯგუფს პროცესების მართვის პრეტენზიები არა მარტო სასამართლო სისტემაში აქვს, არამედ მის ფარგლებს გარეთაც. ჩანს ასეთი ტენდენციები ?
_ ამ ადამიანებს ეს პროცესები უკვე დაწყებული აქვთ. მათ სასამართლო დავის პროცესში შეუძლიათ გააუქმონ ნებისმიერი ადამიანის დანიშვნა ნებისმიერ თანამდებობაზე. შეუძლიათ საარჩევნო პროცესში უზარმაზარი გავლენის მოხდენა იმით, რომ არჩევნებში გამარჯვებულს გაუბათილონ შედეგები, ან პირიქით. ბუნებრივია, მათ უჩნდებათ მეტი ამბიცია. საუბარი მაქვს იმ საშიშროებაზე, რომელიც რეალურად ყველა ადამიანს ემუქრება
_ “ქართული ოცნების“ დეპუტატთა ნაწილი არ მალავს, რომ სასამართლო სისტემა მანკიერი მმართველობითი სისტემისგან ვერ გათავისუფლდა. როგორ ფიქრობთ, ამჟამად მმართველ პარტიას სასამართლო სისტემის არასასურველი კადრებისგან გაწმენდის ძალა შესწევს? თუ ასეა, ყოველ ჯერზე, რატომ უშვებს ამ შანსს ხელიდან ?
_ ვფიქრობ, ხელისუფლება ჩაჰყვა მათ მოთხოვნებსა და გარიგებებს. დღეს თავს კომფორტულად გრძნობენ უდღეური და უგნური ის პოლიტიკოსები, რომლებსაც მოსამართლეებზე გავლენის მოხდენა შეუძლიათ. ასეთ ადამიანებს ვეტყვი, რომ მათ კონტროლის ყველა ბერკეტები გაუშვეს ხელიდან. ძალიან ცუდი პროგნოზის გაკეთება მიწევს, ამ ჯგუფის შეჩერება უკვე შეუძლებელია. ვფიქრობ, რომ ამ ხელისუფლებას სასამართლო სისტემის გაწმენდის ნება არ გააჩნია. მივესალმები თუ „ქართული ოცნება“ ამ პროცესს სამარეში ჩაჰყვება, რადგან მათ უნიათობას საზღვარი აღარ აქვს.
