დღეს სტარტი აიღო საქართველოს ქალთა საფეხბურთო ჩემპიონატმა და პირველი გამარჯვება მოიპოვა ქალთა საფეხბურთო კლუბმა „ლანჩხუთმა“, რომელმაც შინაურ კედლებში თბილისის „ნორჩ დინამოელს“ უმასპინძლა და 2:0 იმარჯვა.
გურული გოგონებისადმი ინტერესი ისედაც დიდი იყო, მაგრამ ჩემპიონთა ლიგაში მოხვედრის შემდეგ, ეს ინტერესი გაორმაგდა. „ლანჩხუთმა“ გარკვეული სიახლეებით დაიწყო ახალი სეზონი. უპირველესად აღსანიშნავია, რომ კლუბს ახალი გენერალური სპონსორი ჰყავს, „ლიბერთი ბანკის“ სახით, შესაბამისად გოგონების ამუნიციას სპონსორის ლოგო ამშვენებდა, ხოლო ტრიბუნებზე „ლიბერთი ბანკის“ ფან-კლუბის აქტივობა საგრძნობი იყო.
ამას გარდა, გუნდი ორი ახალი, გამოცდილი ფეხბურთელით გაძლიერდა. თეონა ბაქრაძე საქართველოს ქალთა ნაკრების წევრია, ხოლო მეორე ახალწვეული _ ქრისტინე ბაკარანძე, აზერბაიჯანში თამაშობდა და იქაური ეროვნული გუნდის ღირსებას იცავდა. „ლანჩხუთისა“ და ამიერიდან ეროვნული ნაკრების მწვრთნელმა, გიორგი ჩხაიძემ, ორივე სასტარტო შემადგენლობაში დააყენა და ამპლუით შუახაზელებმა საკმაოდ კარგადაც ითამაშეს.
რაც შეეხება უშუალოდ შეხვედრას, თავიდანვე ჩანდა სეზონის სტარტის დამახასიათებელი შეუთამაშებლობა და ეს უპირველესად მასპინძელთა თამაშის ხარისხზე აისახა. გარკვეული უპირატესობა მათ თავიდანვე კი მოიპოვეს, მაგრამ გამოკვეთილად ეს არ იგრძნობოდა. და მაინც, გოლი სწრაფი გავიდა… მე 12 წუთი იყო, ლანჩხუთელთა მთავარმეგოლემ, ხატია ჭყონიამ მეტოქის მცველთა დაუდევრობით რომ ისარგებლა და სეზონის საგოლე ანგარიშიც გახსნა ზუსტი დარტყმით.
სტუმარი გოგონები მონდომების ხარჯზე ცდილობდნენ თამაშის შემობრუნებას, მაგრამ მცდელობის მიუხედავად, საგოლე შანსი ვერ შეიქმნეს. მწვავე შეტევებით არც მასპინძლები გვანებივრებდნენ და მხოლოდ სტანდარტულების შედეგად შეეძლოთ გატანა. ორჯერ თავით კარგად ითამაშა დაცვის ბურჯმა მარიამ კალანდაძემ, რომლის მეტოქის საჯარიმოში საჰაერო დომინირება, საგრძნობი იყო. პირველ ეპიზოდში სტუმრები ხარიხამ იხსნა, მეორეში კი ოდნავ სიზუსტე დააკლდა კალანდაძეს.
ამასობაში მეორე გოლმაც არ დაახანა, 34-ე წუთი იყო, როცა საკუთარ საჯარიმოში თბილისელმა მცველმა ხელით ითამაშა და პენალტიც აშკარა იყო. ბურთთან თეონა თოდაძე მივიდა და აუღელვებლად აიღო მეტოქის კარი _ 2:0.
მეორე ტაიმში თამაშის ხასიათი დიდად არ შეცვლილა, ერთი იყო მხოლოდ, რომ სტუმარი გოგონები უფრო აგრესიულად ათამაშდნენ და მალე კინაღამ ერთი გოლიც გაქვითეს. არ გაუმართლა ეკატერინე ხარაიშვილს, რომელსაც ახლო მანძილიდან შეეძლო გატანა, მაგრამ ბურთი ძელს დაუმიზნა.
საკუთარი შეგირდებით უკმაყოფილი ჩანდა ჩხაიძე და რამდენიმე ცვლილებაც განახორციელა. მათ შორის მოედანზე ირინა ხაბურძანიასაც უხმო, რომელიც გასულ სეზიონში ერთერთი გამორჩეული მოთამაშე იყო გუნდში, მაგრამ ჯერ ისიც აშკარად ვერაა სასურველ ფორმაში.
თამაშის ბოლო წუთებში ვერც მასპინძლებმა შეძლეს კიდევ ერთხელ გატანა და ვერც სტუმრებმა, თუნდაც პრესტიჟის გოლით გახარება. ჰოდა, მსაჯის საფინალო სასტვენმა გვაუწყა საბოლოო შედეგიც _ 2:0.
გუნდებმა შეხვედრა ასეთი შემადგენლობებით ჩაატარეს.
ლანჩხუთი: თათია გაბუნია, ნინო გუჯაბიძე, ნინო ჩხარტიშვილი, მარიამ კალანდაძე, ია ალელიშვილი(კაპ) (ირინა ხაბურძანია), თეონა თოდაძე, მარიამ დანელია ( სოფო ნარსია), სალომე დიმოპულუ (ნათელა წოწერია), თეონა ბაქრაძე (მარიამ კაპანაძე), ქრისტინე ბაკარანძე, ხატია ჭყონია.
სათადარიგოები: ლანა მჟავია, ანა გობრონიძე.
ნორჩი დინამოელი: მარინა გასუმოვი, სალომე ანთაძე, ელენე კახნიაშვილი (ანი კვიცარიძე, ანა პავლიაშვილი), ნადეჟდა ნაკვეთაური(კაპ), მარიამ მოდრეკილიძე, გვანცა პაპასკირი, ნინო ჯგუშია, ლიკა მანუჩარაშვილი, ეკატერინე ხარაიშვილი, მარიამ ჯანიკაშვილი, ჟუჟუნა ხმელიძე.
სათადარიგოები: მარი ბეგიაშვილი, კესო შოშიტაშვილი, სოფიო ორაშვილი.
მსაჯი: ბექა ქევანიშვილი(ქუთაისი).
