ჩემპიონთა ლიგის ჯგუფური სტადიის ბოლო შეხვედრაში მარცხის მიუხედავად ხვიჩა კვარაცხელიას „ნაპოლიმ“ ჯგუფში პირველი ადგილი არავის დაუთმო. „ნაპოლიმ“ იურგენ კლოპის გუნდთან, სტუმრად კარგად ითამაშა, ქართველის უშუალო დახმარებით ანგარიშიც გახსნა, რომელიც მსაჯმა რატომღაც გააუქმა. შეხვედრის უკანასკნელ ხუთ წუთში „ლივერპულმა“ იტალიელებს ორი უპასუხო გოლი გაუტანა.
მატჩის დასრულების შემდეგ გამოცემამ „Liverpool Echo“ საინტერესო წერილი გამოაქვეყნა, რომელიც ხვიჩა კვარაცხელიას თემას ეხებოდა.
“ლივერპულის” ფანებმა კლუბს ხვიჩა კვარაცხელიას შეძენა მას შემდეგ მოუწოდეს, რაც ცხადად დაინახეს, როგორი ზიანის მიყენება შეუძლია მოწინააღმდეგისათვის. მათ სოციალურ ქსელებში კვარაცხელიასთან კონტრაქტის გაფორმების სურვილი გამოთქვეს.
ქართველმა თავდამსხმელმა ამ სეზონში იტალიურ გუნდში უდიდესი შთაბეჭდილება მოახდინა და “ენფილდზე” “ლივერპულის” ფანებს აჩვენა, მარცხენა ფლანგზე რისი გაკეთება ძალუძს.
ერთი გულშემატკივარი “ტვიტერზე” “ნაპოლის” ვარსკვლავზე შემდეგ პოსტს აქვეყნებს: “კვარაცხელია შესანიშნავია. ვხედავ, ევროპაში “ნაპოლიმ” წინ როგორ წაიწია. მათი ახალგაზრდა, შთამბეჭდავი ფეხბურთელები მე კლოპის “ლივერპულის” ეპოქის დასაწყისს მაგონებენ“.
ხოლო მეორე წერს, რომ ამ შეხვედრას მხოლოდ კვარაცხელიას გამო უყურა: “ვიცი, “ლივერპული” უკვე დასრულებულია, შეხვედრას მხოლოდ კვარაცხელიას თამაშის სანახავად ვუცქირე“.
ყოფილმა იტალიელმა მსაჯმა გრაციანო ჩეზარიმ, კი რომელიც ამჟამად საფეხბურთო ექსპერტად მუშაობს, „Mediaset Infinity“–ს ეთერში განაცხადა, რომ ჩემპიონთა ლიგაზე “ლივერპულთან” მატჩისას “ნაპოლის” ნახევარმცველი ხვიჩა კვარაცხელია საჯარიმოში წესების დარღვევით შეაჩერეს და გერმანელ არბიტრ ტობიას შტილერს პენალტი უნდა დაენიშნა.
“ეს არ იყო კონტაქტი მხრით მხარზე, კონატე მას ზურგზე შეეხო და თერთმეტმეტრიანის დანიშვნა მართებდა. “კვარა” სწრაფად მიიწევდა წინ და ასე მისი შეჩერება არ შეიძლებოდა. ეს ეპიზოდი მეტ ყურადღებას იმსახურებდა და VAR-ი უნდა ჩარეულიყო“.
ხვიჩა კვარაცხელია და მისი „ნაპოლი“ ახალ–ახალ რთულ საფეხბურთო სიმაღლეებს იპყრობენ. აი, რუსეთის ეროვნული საფეხბურთო ნაკრები კი… ტაჯიკეთის ეროვნულ გუნდთან სათამაშოდ ემზადება.
ამის მიზეზი ის გახლავთ რომ ბოსნია–ჰერცეგოვინის საფეხბურთო კავშირმა ოფიციალურად გამოაცხადა, რომ ქვეყნის ნაკრები უარს აცხადებს რუსეთის ეროვნულ გუნდთან ამხანაგურ მატჩზე, რომელიც 19 ნოემბერს სანკტ–პეტერბურგში იყო დანიშნული.
რუსებთან მატჩის დანიშვნას ბოსნიაში დიდი პროტესტი მოჰყვა და ეროვნული ნაკრების წამყვანმა ფეხბურთელებმა მირალემ პიანიჩმა და ედინ ჯეკომ მინდორზე გასვლაზე უარი განაცხადეს. ამ ზეწოლამ შედეგი გამოიღო და თამაში ჩაშლილად გამოცხადდა.
“ამ ამხანაგური მატჩის ჩატარება სამომავლოდ გადაიდო,” – განაცხადა ბოსნია–ჰერცეგოვინის საფეხბურთო კავშირის პრეზიდენტმა ვიკო ჟელკოვიჩმა.
რუსეთის ნაკრებმა სექტემბერში ბიშკეკში ყირგიზეთს 2:1 სძლია, ნოემბერში კი ბოსნიასთანა და ირანთან თამაშის იმედი ჰქონდათ, თუმცა, გეგმები აერიათ. ახლა, რუსები 17 ნოემბერს ტაჯიკებს დუშანბეში დაუპირისპირდებიან.
ტაჯიკეთის ნაკრების მთავარი მწვრთნელი ხორვატი სპეციალისტი პეტარ სეგრტია, რომელიც კლაუს ტოპმიოლერის დროს საქართველოს ახალგაზრდულ ნაკრებს წვრთნიდა, მოგვიანებით კი, ორ მატჩში ეროვნულ გუნდსაც უხელმძღვანელა.
ცნობილი გახდა რომ უკრაინის ფეხბურთის ფედერაციის აღმასრულებელი კომიტეტი მსოფლიოს ჩემპიონატიდან ირანის ნაკრების მოკვეთას ითხოვს.
უკრაინელთა ინიციატივის ერთ–ერთი მთავარი მიზეზია: “ირანში ადამიანთა უფლებების სისტემატური დარღვევები, რაც ფიფას ნორმებს და კანონმდებლობას ეწინააღმდეგება.” უკრაინელები ახლა ფიფას შესაბამისი განაცხადით მიმართავენ და ირანის მოკვეთას მოითხოვენ.
ცოტა ხნის წინ, უკრაინული გრანდის, დონეცკის შახტარის გენერალურმა დირექტორმა სერგეი პალკინმაც ასეთი მოთხოვნა გააჟღერა და მიზეზად ის დაასახელა, რომ “ირანი რუსეთს საბრძოლო დრონებს აწვდის.”
ირანის ნაკრები მსოფლიოს ჩემპიონატზე B ჯგუფშია და აშშ–ის, უელსის და ინგლისის წინააღმდეგ უნდა ითამაშოს. მუნდიალი 20 ნოემბერს იწყება და 18 დეკემბრამდე გაგრძელდება.
31 წლის ქართველი კალათბურთელი თორნიკე შენგელია დიდი ალბათობით, ევროლიგის მომდევნო ტურში ითამაშებს. ეს ინფორმაცია გამოცემამ “Il resto del carlino“ გაავრცელა.
“ქართველი მოედანზე ბრუნდება. მარცხენა მხრის სერიოზული ტრავმის შემდეგ, რომელიც მან აგვისტოს ბოლოს საქართველოს ნაკრებში თამაშისას მიიღო, შენგელია მწყობრში ჩადგა და პარასკევს იმ 12 მოთამაშეს შორის იქნება, როლებიც შინაურ კედლებში ფრანგულ „ვილერბანს“ დაუხვდებიან.
თუკი თორნიკეს კალიბრის კალათბურთელი განაცხადში მოხვდა, ეს იმას ნიშნავს, რომ ორთვიანი პაუზის მიუხედავად, ის სათამაშო წუთებს მიიღებს. „ვირტუსს“ ფარქვეშ ძალიან სჭირდება 206 სმ. სიმაღლის ფორვარდი. სერჯო სკარიოლოს გუნდს შენგელიას გამოცდილების მქონე კალათბურთელი ევროლიგაში დიდ დახმარებას გაუწევს.
„ბოლონიამ“ ევროლიგის მატჩებში საშინაო მოედნის უპირატესობა მაქსიმალურად უნდა გამოიყენოს, რათა რეგულარული სეზონის ბოლოს პლეი ოფში გამსვლელ 8 გუნდს შორის მოხვდეს. პარასკევის მატჩით შენგელია ტურნირზე მე-10 სეზონს დაიწყებს და მართალია, მოსკოვის „ცსკა“–ში ძველებურად გამორჩეული არ ყოფილა, უდავოა, რომ „ვირტუსში“ უდიდესი როლი დაეკისრება”.
თორნიკე შენგელიას ტრავმის გამო ორ თვეზე მეტი გაუცდა.
ავტორი
