ჩემპიონთა ლიგის პირველ მეოთხედფინალურ შეხვედრაში, ხვიჩა კვარაცხელიას “ნაპოლი“ სტუმრად „მილანთან“ დამარცხდა – 0:1. 18 აპრილს ნეაპოლში განმეორებითი მატჩი გაიმართება, სადაც ლუჩანო სპალეტის კრებულს ნიგერიელი ვიქტორ ოსიმენი დაუბრუნდება. ამ წყვილში გადამწყვეტი ბრძოლა ჯერ წინაა და იმედს გამოვთქვამთ რომ ხვიჩა კვარაცხელია ჩემპიონთა ლიგის ნახევარფინალში იასპარეზებს.
მილანში დასრულებული შეხვედრის შემდეგ „ნაპოლის“ მთავარმა მწვრთნელმა ლუჩანო სპალეტიმ შემდეგი კომენტარი გააკეთა.
„სწორი დამოკიდებულება დავინახე, ბიჭები უნდა შევაქო. ძლიერი გუნდი მყავს, რომელსაც დიდი მომავალი აქვს. ამ საღამოს ვაჩვენეთ, რომ გვაქვს ხარისხი და შეგიძლია თამაშში დარჩენა, რიცხობრივ უმცირესობაში „მილანთან“ თანაბრად თამაში.
ანგისას გაძევება გაზვიადებული, უსამართლო იყო და არ მესმის ბარათების მართვა. კიმის ჟესტი? რატომ არ ვსაუბრობთ ლეაუზე, როდესაც დროშა გატეხა? რას ვეუბნებით ბავშვებს, რომ რაც მოედნის ირგვლივაა, ყველაფრის დამტვრევა შეგვიძლია? ეს აშკარა ყვითელი ბარათი იყო. ჟელინსკის თუ ყვითელი ბარათი ეკუთვნოდა, კრუნიჩს რატომ არ უჩვენა? მაგრამ მსაჯებზე საუბარი არ მინდა, ყველამ ყველაფერი დაინახა.
რა თქმა უნდა, ანგისას და კიმის არყოფნა იწონის მეორე მატჩში, მაგრამ ვიმეორებ, ძალიან ძლიერი გუნდი მყავს, კარგი ბიჭები არიან, ხანდახან ცოტა გულუბრყვილოები, მაგრამ უზარმაზარო ტექნიკური შესაძლებლობები აქვთ.
ექვს დღეში ჩვენს სტადიონზე ვითამაშებთ და იმედია, არ იქნება ისეთი სიურრეალისტური ატმოსფერო, როგორც ჩემპიონატის ბოლო მატჩში. გუნდი, რომელიც 33-წლიანი პაუზის შემდეგ სკუდეტოს იგებს და უბრალოდ არ მესმის, ასეთ დროს გუნდის მძევლად აყვანა, ეს აუხსნელია. ხედავ, რომ ყველა ყველას წინააღმდეგაა, თუ “მარადონა” საპასუხო თამაშზე ჩუმად იქნება, როგორც “მილანთან” ბოლო საშინაო მატჩში იყო, სათადარიგო სკამს დავტოვებ და სახლში წავალ. დღეს დავინახეთ, „სან სირომ“ „მილანს“ რამხელა ბიძგი მისცა.
ეს მატჩი წარსულია და აღარ დაბრუნდება, წინ უნდა ვიყუროთ და მომავალ მატჩზე ვიფიქროთ. კვალიფიკაცია ღია იყო და ღია რჩება, შანსი თანაბარია, მაგრამ არ ვიცი, არის თუ არა, 50-50%-ზე, რადგან მეტოქემ უპირატესობა მოიპოვა და შეუძლია ის გააკეთოს, რაც უნდა, მაგრამ ჩვენთვის არაფერი იცვლება, ისე ვითამაშებთ, როგორც დღეს, რადგან ბევრი კარგი რამ დავინახე.
ფორვარდი რომ გვყოლოდა, ალბათ უფრო მეტი შანსი გვექნებოდა, მიუხედავად იმისა, რომ ელმასმა დიდი სამუშაო გასწია. ოსიმენი მომდევნო მატჩში 100%-ით იქნება. ყოველ შემთხვევაში, იმ გეგმის მიხედვით, რასაც მივყვებით, ასე უნდა იყოს“, – განაცხადა ლუჩანო სპალეტიმ.
„მილანის“ მთავარ მთავარ მწვრთნელ სტეფანო პიოლის შემდეგი მოსაზრება გააჩნდა:
„უკვე მომდევნო მატჩზე ვფიქრობ, დიდებული თამაში იქნება, მაღალი დონის, როგორც დღეს. ორივე გუნდის მხრიდან ბევრი ტექნიკური შეცდომა იყო. „ნაპოლიმ“ უკეთ დაიწყო, ბურთს ცუდად ვფლობდით, ისინი აგრესიულები იყვნენ, მაგრამ შემდეგ კარგად ვითამაშეთ.
ვწუხვართ, რომ რიცხობრივი უპირატესობა ვერ გამოვიყენეთ, უფრო სწრაფად უნდა გვეთამაშა. ბენასერი დაღლილი იყო და ამიტომ შევცვალე. ყველამ კარგად ითამაშა, ჩემპიონთა ლიგის თამაში ჩავატარეთ. ახლა ნეაპოლში თავდაჯერებული და კონცენტრირებული წავალთ“.
რაც შეეხება ხვიჩა კვარაცხელიას. მისი გარჯა მინდორზე იტალიურ მასმედიაში შემდეგნაირად შეფასდა:
Calcionapoli1926 – 6 ქულა: “გუნდის დამუხტვას ცდილობს, მაგრამ მარტო იბრძვის”.
Eurosport – 6 ქულა: “წარმოუდგენელი მომენტი ჰქონდა პირველივე წუთზე, რომელიც კრუნიჩმა დაბლოკა. როდესაც სივრცეს პოულობს, ამტკიცებს, რომ შეიძლება დამანგრეველი იყოს, მაგრამ ხშირად ორმაგი მეურვეობის წინაშე ხვდება და ყველაფერი რთულდება”.
Calciomercato – 6 ქულა: “დიდებული შანსი პირველ წუთზე, მაგრამ მილანის დაცვა კარში კედლად აღიმართა. ნაპოლის ნაპერწკლები მის მოქმედებებში ჩანდა”.
Tuttomercatoweb – 5.5 ქულა: “თამაშის დაწყებიდან ერთ წუთში საგოლე მომენტი გაანიავა. ამას შეეძლო თამაშის სცენარის შეცვლა. სულ ცდილობდა, მაგრამ მის განეიტრალებას ახერხებდნენ”.
Tuttonapoli – 6 ქულა: “ის შეტევაში ყველაზე სახიფათო კაცია, ალბათ, ერთადერთი ტრიოში, რომელიც სტადიონს აკანკალებს, მაგრამ დასაწყისშივე კარიდან ორ ნაბიჯში მზა მომენტი ვერ გამოიყენა და ვერ შეცვალა მთლიანი მატჩი. მილანი მის წინააღმდეგ ორმაგი დაცვით თამაშობდა, მაგრამ მაინც იპოვა გზა, რათა თანაგუნდელები დასარტყმელ პოზიციაზე დაეტოვებინა ან შეტევისთვის სახიფათო განვითარება მიეცა. მეორე ტაიმში უფრო პროგნოზირებადი გახდა”.
Mediaset – 5 ქულა: “თამაშის სტარტზე საოცარი მომენტი ვერ გამოიყენა და მერე თამაშში ბოლომდე ვეღარც შევიდა. კრუნიჩის დახმარებით კალაბრია ძალიან კარგად აკავებდა”.
გუშინ, ესპანურმა გამოცემამ „Fichajes“ საინტერესო ინფორმაცია გაავრცელა. აღმოჩნდა რომ ინგლისურმა „ლივერპულმა“, მიმდინარე წლის ზაფხულში, ხვიჩა კვარაცხელიას გადასაბირებლად 130 მილიონი ევრო გაამზადა.
„ხვიჩა კვარაცხელია ევროპულ ფეხბურთში ბოლო თვეების მთავარ სენსაციად იქცა. ახალგაზრდა ქართველი ფეხბურთელი უკვე უმაღლეს დონეზე თამაშობს და „ნაპოლის“ საჩემპიონო ტიტულისკენ მიუძღვება. გასაკვირი არაა, რომ ამ ფონზე კვარაცხელიას არაერთი ევროპული გრანდი უტრიალებს, მათ შორის კი, იურგენ კლოპის „ლივერპულიც“ იმყოფება, რომელსაც მისი ტრანსფერი უმთავრეს მიზნად აქვს დასახული.
ხვიჩას მიმართ ლივერპულელთა დაინტერესება იმდენად დიდია, რომ ისინი მზად არიან, ქართველ შემტევში ძალიან სოლიდური თანხა გაიღონ და მომავალი სეზონისთვის „ენფილდის“ ერთ-ერთ უმთავრეს ვარსკვლავად აქციონ. სწორედ კვარაცხელიამ უნდა გააძლიეროს მერსისაიდელთა შეტევა, რომელიც საკმაოდ გაღარიბდა სადიო მანეს წასვლის შემდეგ და კიდევ უფრო დასუსტდება ზაფხულში, როდესაც კლუბს რობერტო ფირმინოც დატოვებს.
კვარაცხელიას „ნაპოლისთან“ მოქმედი კონტრაქტი 2027 წლის 30 ივნისამდე აკავშირებს, მისი თამაშიდან გამომდინარე კი, სატრანსფერო ფასმაც საგრძნობლად მოიმატა. მადას არც ნეაპოლელთა პრეზიდენტი აურელიო დე ლაურენტისი უჩივის, ასე რომ, ხვიჩას მსურველებს, მათ შორის კი, „ლივერპულსაც“ სერიოზული თანხის გაღება მოუწევს. ეს მერსისაიდელებსაც კარგად ესმით და მზად არიან, კვარაცხელიას სანაცვლოდ 130 მილიონი ევრო გადაიხადონ, რა შემთხვევაშიც ის „სერია A“-დან ყველაზე ძვირადღირებული შენაძენი გახდება“.
ავტორი
