ეროვნული ჩემპიონატის მორიგ ტურში თბილისში გათამაშების ლიდერ ,,მერანთან’’ მარცხის შემდეგ ლანჩხუთის „გურიას“ ხელმძღვანელობამ მთავარი მწვრთნელი გელა სანაია და მთლიანად სამწვრთნელი შტაბი დაითხოვა.
კლუბის ხელმძღვანელობის ეს გადაწყვეტილება ბევრისთვის საკმაოდ მოულოდნელი იყო, მითუმეტეს, მას შემდეგ, რაც სანაიას სრული ნდობა გამოუცხადეს და გათამაშების შესვენებისას ახალი გუნდი დააკომპლექტებინეს. მართალია, შედეგები კლუბს დიდად გამორჩეული არ უჩვენებია, მაგრამ პირველად მოხდა, რომ ზედიზედ ორი მატჩი მოიგო და თითქოს კრიზისის დაძლევის კონტურებიც გამოიკვეთა. თუმცა, გათამაშების ლიდერთან სამარცხვინო მარცხის შემდეგ, კლუბის ხელმძღვანელობამ მიიღო მთავარი მწვრთნელის დათხოვნის გადაწყვეტილება.
სანაიას წასვლის შემდეგ, კლუბი ერთი ხანი უმწვრთნელოდ იყო და ბოლო შეხვედრა ქობულეთის „შუქურასთან“ ლანჩხუთელებმა უმთავარმწვრთნელოდ ჩაატარეს და ლოგიკური მარცხიც იწვნიეს. როგორც გაირკვა, ახალი მწვრთნელის ძიებამ უშედეგოდ ჩაიარა და აქცენტი საბოლოოდ თემურ ლორიაზე გაკეთდა, რომელიც თავიდან წინააღმდეგი იყო გუნდის გაწვრთნაზე, მაგრამ ბოლოს მაინც დათანხმდა კახა ებრალიძის ამ შეთავაზებას.
თემურ ლორია წლების წინაც იკავებდა ლანჩხუთის „გურიას“ მთავარი მწვრთნელის პოზიციას და მაშინ გუნდის უმაღლეს ლიგაში გადაყვანაც მოახერხა, თუმცა 2015 წლის აპრილში მუნიციპალიტეტის მაშინდელი პირველი პირის გადაწყვეტილებით, იგი კლუბიდან დაითხოვეს. ლორიამ სამწვრთნელო კარიერა 2017 წლის თებერვლიდან ჩოხატაურის საფეხბურთო კლუბ „ბახმაროში“ გააგრძელა, ერთი სეზონი მთლიანად ჩაამთავრა და ზედა ლიგაში კლუბის აღზევებამდე ერთი ნაბიჯი დააკლდა. ლორია ჩოხატაურში წელსაც მოღვაწეობდა, სადაც მიმდინარე სეზონის გათამაშების შესვენებამდე დაჰყო და შემდეგ „გურიაში“ სპორტული დირექტორის პოსტზე გადაინაცვლა. თუმცა აქ მას მცირე ხნით მოუწია მუშაობა და ისევ სამწვრთნელო საქმეს დაუბრუნდა.
სიმართლე ითქვას, ძალიან რთულ ვითარებაში მოუწევს მას მუშაობა. გუნდი ისევ ბოლო ადგილზეა და კონკურენტებთან ბრძოლა უშეღავათო იქნება. ფაქტობრივად ლიგა პრო 2-დან გავარდნის პრეტენდენტთა შორის სამი გუნდია გამოკვეთილი და დარჩენილ ტურებში „გურიამ“ სასწაული უნდა მოახდინოს პლეი-აუტს რომ ასცდეს. თუმცა აქამდე პროგრამა-მინიმუმის შესრულება მაინც მოუწევს, რომ პირდაპირ არ გავარდეს ამ ლიგიდან. ფაქტია, რომ ახალ მწვრთნელს უშუალოდ გუნდში შექმნილი არაჯანსაღი სიტუაცია აქვს დასალაგებელი, რაც საკმაოდ რთული საქმე იქნება უდაოდ.
