გუშინდელი დღის იტალიური სპორტული მასმედიის ერთ-ერთი მთავარი გმირი „ნაპოლის“ მთავარი მწვრთნელი ლუჩანო სპალეტი აღმოჩნდა.
თავდაპირველად გავრცელდა ინფორმაცია, რომ „ნაპოლის“ მთავარმა მწვრთნელმა ლუჩანო სპალეტიმ კლუბის პრეზიდენტ აურელიო დე ლაურენტისს კლუბში დარჩენის სანაცვლოდ გარკვეული მოთხოვნები წაუყენა.
სპალეტის სურს, რომ მისმა გუნდმა კონკურენტუნარიანობა შეინარჩუნოს. 64 წლის სპეციალისტს ზაფხულში მარჯვენა მცველის შეძენა უნდა. გუნდის კაპიტანი ჯოვანი დი ლორენცო პრაქტიკულად შემცვლელის გარეშეა, ამიტომაც, სპალეტის სურს, რომ მისი შემცვლელიც ჰყავდეს, რომ დი ლორენცოს სეზონის განმავლობაში დასვენების საშუალება მისცეს. კიდევ ერთი სამიზნე მარჯვენა გარემარბის შეძენაა. ლუჩანო ირვინგ ლოსანოსა და მატეო პოლიტანოს თამაშით ბოლომდე კმაყოფილი არ არის, რაც არაა გასაკვირი, რადგან ორივემ ჯამში სეზონში მხოლოდ 8 გოლი გაიტანა.
მესამე პოზიცია კი საყრდენი ნახევარმცველია – მიმდინარე სეზონში სტანისლავ ლობოტკას შემცვლელი პრაქტიკულად არ ჰყავდა, ამიტომ, სპალეტის უნდა, რომ გუნდში სლოვაკის სრულფასოვანი შემცვლელიც იყოს.
ასევე, გუშინ, ვეტერანმა იტალიელმა ფეხბურთელმა რობერტო რამბაუდიმ განაცხადა, რომ ლუჩანო სპალეტიმ აურელიო დე ლაურენტისს გუნდში დარჩენის სანაცვლოდ პირველ რიგში ოთხი ფეხბურთელის შენარჩუნება მოსთხოვა.
საინტერესოა რომ სიაში არ არის ხვიჩა კვარაცხელია, რაც ცოტა არ იყოს უცნაურია.
„ლუჩანო სპალეტიმ დე ლაურენტისთან შეხვედრისას ოთხი ფეხბურთელის შენარჩუნება მოითხოვა: ესენი არიან, ოსიმენი, ლობოტკა, კიმი და დი ლორენცო. ძალიან ბევრია? არა, „ნაპოლი“ ძლიერია და ლოგიკურია, რომ გუნდში ბევრი მნიშვნელოვანი ფეხბურთელია“,_ განაცხადა რობერტო რამბაუდიმ.
გადის რამდენიმე საათი და გამოცემამ „Corriere Dello Sport“ გაავრცელა ცნობა, რომ ლუჩანო სპალეტის დარჩენის გადაწყვეტილება ჯერ არ მიუღია.
სპალეტის პოტენციურ შემცვლელთა შორის „Corriere Dello Sport“-მა ოთხი მწვრთნელი დაასახელა: ანტონიო კონტე, ჯან პიერო გაპსერინი, ვინჩენცო იტალია და კრისტოფ გალტიე.
იტალიური „Rai“-ის ინფორმაციით, „ნაპოლის“ პრეზიდენტ აურელიო დე ლაურენტისს ვიქტორ ოსიმენის შენარჩუნება სურს. ნიგერიელ ფეხბურთელს არაერთი მსურველი ჰყავს, რაც ნეაპოლელთა მიზანს ართულებს.
თუმცა დე ლაურენტისი ყველაფერს გააკეთებს მისი ერთი სეზონით მაინც შესანარჩუნებლად. „ნაპოლის“ პრეზიდენტი მზადაა, ვიქტორის კონტრაქტს გადახედოს და ხელფასი გაუზარდოს. ნეაპოლურ კლუბში სახელფასო ჭერი 3 მილიონი ევროა, ოსიმენი კი უკვე ამაზე მეტს, 4 მილიონს გამოიმუშავებს, მაგრამ ისინი მზად არიან გამონაკლისი ისევ დაუშვან და ხელფასი მოუმატონ.
გამოცემა „La Gazetta dello Sport“-ის მტკიცებით, ნეაპოლური კლუბის ხელმძღვანელებმა ახალ კონტრაქტებზე უარი სამ ფეხბურთელს – მარიო რუის, პიოტრ ზელინსკისა და მატეო პოლიტანოს უთხრეს, შესაბამისად „ნაპოლი“ ზაფხულის სატრანსფერო ფანჯრის პერიოდში მათ გასხვისებას შეეცდება.
მარიო რუი „ნაპოლის“ ღირსებას 2018 წლიდან იცავს, ზელინსკი კლუბს 2016 წელს შეუერთდა, პოლიტანო კი ნეაპოლურმა კლუბმა 2021 წელს დაიმატა.
გამოცემა „Il Mattino“-ს ცნობით, ლონდონის „ჩელსი“ „ნაპოლის“ ორი წამყვანი მოთამაშის ხვიჩა კვარაცხელიასა და სტანისლავ ლობოტკას შეძენას შეეცდება.
ინგლისური გუნდი ქართველისა და სლოვაკის თაობაზე „ნაპოლის“ უკვე დაუკავშირდა. ამ ეტაპზე „ნაპოლი“ კვარაცხელიასა და ლობოტკას გაყიდვის წინააღმდეგია, თუმცა „ჩელსი“ ზაფხულის სატრანსფერო ფანჯარაზე დიდი თანხის დახარჯვას აპირებს.
გუშინ, პორტუგალიურმა გამოცემამ „Bola na Red“ საინტერესო ცნობა გამოაქვეყნა. გიორგი მამარდაშვილს არაერთ კლუბს უკავშირებენ, ძირითადად პრემიერლიგის გუნდებზე იწერებოდა, ამჯერად კი, ინფორმაცია პორტუგალიური გრანდის, „პორტუს“ მხრიდან ინტერესზე გავრცელდა.
„პორტუ“ მამარდაშვილისთვის ბრძოლაში ჩაერთო, მაგრამ ამ ტრანსფერს რამდენიმე ფაქტორი უშლის ხელს – ქართველი მეკარის შეძენით სხვა კლუბებიც არიან დაინტერესებულები და მისი გამოსასყიდი თანხა საკმაოდ მაღალია, მაგრამ „ვალენსიას“ ლა ლიგა 2-ში დაქვეითების შემთხვევაში, შესაძლოა, მისმა ღირებულებამ დაიწიოს.
ავტორი
