5 თებერვლის ლანჩხუთის საკრებულოს რიგგარეშე სხდომაზე დეპუტატებმა ა(ა)იპ ,,სკოლამდელი საგანმანათლებლო სააღმზრდელო ცენტრის“ შრომის ანაზღაურების ფონდის გაზრდას „მწვანე შუქი აუნთეს“, თუმცა, ეს ზრდა არ აისახება აქ დასაქმებულთა ყოველთვიურ სარგოზე.
როგორც გაირკვა, ა(ა)იპ-ის წერილის საფუძველზე, ლანჩხუთის საკრებულომ მიზანშეწონილად ჩათვალა, სხვა ხარჯის (23 600 ლარი) და საქონელი და მომსახურების მუხლის (54320 ლარის) შემცირების ხარჯზე გაეზარდა ამ უწყების შრომის ანაზღაურების ფონდი საპენსიო ფონდის შენატანისათვის.
არადა, ჯერ კიდევ გასულ წელს, ლანჩხუთის საკრებულოში, სხვადასხვა კომისიებსა თუ ფრაქციებში, მერიის საფინანსო სამსახურის უფროსთან ერთად, ბიუჯეტის პროექტის მუხლობრივი განხილვისას გაჟღერდა, რომ 2019 წლის მუნიციპალიტეტის ბიუჯეტიდან სკოლამდელი აღზრდისთვის გამოყოფილ თანხაში გათვალისწინებული უნდა ყოფილიყო აღმზრდელ-პედაგოგების შრომის ანაზღაურების ფინანსურად მოწესრიგება. როგორც მაშინ საკრებულოს წევრები ამბობდნენ, მუნიციპალიტეტის შემოსავლებიდან გამომდინარე, უნდა შემუშავებულიყო გრძელვადიანი გეგმა და 2019 წლიდან განხორციელებულიყო სკოლამდელი აღზრდის პედაგოგთა სარგოების ზრდა.
თუმცა, მიუხედავად საბავშვო ბაღებში დასაქმებულების დიდი მოლოდინისა, რომ მიმდინარე წლის იანვრის თვიდან უკვე გაზრდილ ანაზღაურებას მიიღებდნენ, ასე არ მოხდა.
„თითქმის ბოლომდე ვიყავით დარწმუნებულები, რომ დაბალი რანგის თანამშრომლებს ხელფასი გაგვეზრდებოდა, ძალიან ბევრი დაპირება იყო. თავად ადგილობრივი ხელისუფლების წარმომადგენლები საუბრობდნენ, რომ 2019 წლიდან აღმზრდელ-პედაგოგების შრომის ანაზღაურება უნდა მოწესრიგებულიყო და ჩვენი ანაზღაურება გაზრდილიყო. სამწუხაროდ, ამ საუბრების მიუხედავად, არაფერი შეცვლილა“, _ ამბობს სკოლამდელი აღზრდის პედაგოგთა ნაწილი, რომელთაც საკუთარი ვინაობის გამხელა საჯაროდ არ ისურვეს.
„გურია ნიუსი“ დაინტერესდა, იმ ფონზე, როცა ჯერ კიდევ 2019 წლის ბიუჯეტის პროექტის განხილვისას ლანჩხუთის საკრებულოში უმრავლესობის წევრი დეპუტატების მხრიდან, ლამის მთავარ საკითხად იყო წარმოდგენილი სკოლამდელი აღზრდის პედაგოგთა სარგოების ზრდა, რატომ ვერ მოხერხდა ამ საკითხის დადებითად გადაწყვეტა.
სკოლამდელი აღზრდის ცენტრის ხელმძღვანელი ნატა კობალავა გვპასუხობს, რომ ეს საკითხი დღის წესრიგიდან ჯერ კიდევ არაა მოხსნილი: „ბაღებში ახალი საშტატო ნუსხა ჯერ კიდევ არ დამტკიცებულა. უახლოეს პერიოდში მერიის საფინანსო სამსახურის უფროსთან ერთად ამასთან დაკავშირებით უნდა გაიმართოს მუშა შეხვედრა და საკითხთან დაკავშირებით მსჯელობა“.
კონკრეტული პასუხი, თუ როდიდან იგეგმება ლანჩხუთში ბაღების აღმზრდელ-პედაგოგების შრომის ანაზღაურების ფინანსური მოწესრიგება, ვერც მერიაში მივიღეთ, სადაც ერთ-ერთ მთავარ პრიორიტეტად სკოლამდელი აღზრდა სახელდება.
„საბავშვო ბაღებში დასაქმებულთა ხელფასების მოწესრიგებასთან დაკავშირებით მიმდინარეობს მუშაობა. ადგილობრივი ხელისუფლება დაინტერესებული ეს საკითხი დროულად დარეგულირდეს. აქვე დავძენთ, რომ ჩვენთვის პრიორიტეტია სკოლამდელი აღზრდა და ყველა ის საკითხი, რაც მომავალ თაობასთანაა დაკავშირებული“, _ გვპასუხობენ ლანჩხუთის მერიაში.
ამავე საკრებულოს სხდომაზე უმრავლესობის წევრ მაღალჩინოსან დეპუტატთა მხრიდან საჯარო მოხელეებისთვის ხელფასის ზრდის იდეაც გაჟღერდა, რაზეც მერიის საფინანსო სამსახურის უფროსისგან უარი მიიღეს. დეპუტატთა არგუმენტით, ამ კუთხით საჯარო მოხელეთა წახალისება და მათთვის სტიმულის მიცემა დანაშაული არ უნდა იყოს.
