ჩოხატაურის მუნიციპალიტეტში უკვე რამდენიმე დღეა დიდთოვლობას ებრძვიან. მცხოვრებლები სოციალურ ქსელებში წერენ, რომ გზები იწმინდება სოფლის ცენტრში, მაგრამ შიდა ჩიხები გაუწმენდავია და თოვლის მაღალი საფარის გამო გადაადგილება გართულებულია.
რა მდგომარეობაა ჩოხატაურში – ამის შესახებ “გურია ნიუსი” მერს, დავით შარაშიძეს ესაუბრა.
როგორც შარაშიძე ამბობს, თოვლის საფარი მაღალმთიან სოფლებში, მაგალითად ზოტში – 2 მეტრს აღწევს, ხოლო შედარებით დაბლობზე 1 მეტრია. შესაბამისად, პრიორიტეტად რჩება სოფლის ცენტრამდე მისასვლელი გზების გაწმენდა.
“თოვლის საფარი მაღალ მთიან სოფლებში უკვე 2 მეტრს აღწევს. ისე თოვლის საფარი 1 მეტრია. ასეთ მდგომარეობაში ჩვენთვის პრიორიტეტული რჩება, რომ ყოველ სოფლის ცენტრამდე გზა გვქონდეს. ცენტრალური გზა აბსოლუტურად ყველა სოფელში იწმინდება.
რაც შეეხება ბახმაროს გზას, ეს არის შიდა სახელმწიფო გზა. გზის დეპარტამენტი ახორციელებს გზის წმენდას მაგ მიმართულებაზე, ვან ზომლეთზე და ჩოხატაურის მთავარ ქუჩაზე. მაგ მიმართულებით ჩვენ პრობლემა არ შეგვქმნია. ქვაბღა, ჩხაკაურა, ხევი, ბუქსიეთი, ბჟოლიეთი – მთლიანად გაწმენდილია ცენტრალური გზა და იწმინდება უწყვეტად”,_ ამბობს შარაშიძე.
ჩოხატაურის მერის თქმით, ამ დროისთვის სურებს ელექტრო ენერგია არ მიეწოდება, თუმცა სპეციალური ჯგუფი მუშაობს და სავარაუდოდ, დღის ბოლომდე აღდგება მოსახლეობისთვის დენის მიწოდება.
“სურებში, დიდივანში, შუა სურებში და ზემო სურებში გვაქვს ელექტრო ენერგიაზე პრობლემა. კაბელებია დაზიანებული. ენერგო-პრო ჯორჯიას ჯგუფი მუშაობს და გვპირდებიან, რომ დღის ბოლომდე ელექტროენერგიას აღადგენენ. დანარჩენ სოფლებს არც გაზი და არც ელექტრო ენერგია არ შეწყვეტიათ”,_ ამბობს შარაშიძე.
ავტორი
