“ჩვენ არაფერი გვჭირს საიმისო, რომ შეხვედრები გამოვიყენოთ ლეგიტიმაციისთვის, საქართველოს მთავრობას, საქართველოს პარლამენტს ლეგიტიმაცია მისცა ქართველმა ხალხმა, ქართველმა ამომრჩეველმა, შეხვედრით ლეგიტიმაციას ვერც მოვიპოვებთ და არც ვეძებთ”, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა განაცხადა _ იუწყება 1tv.ge
ბოჭორიშვილის თქმით, „ქართულ ოცნებას“ არ სჭირდება ლეგიტიმაციის მოპოვება.
„ქვეყნის შიგნით ხომ ვხედავთ, ვინც არიან და საერთაშორისო მასშტაბითაც ვიცით, რომ არიან ადამიანები, ძალები, რომლებიც ზოგადად ებრძვიან საქართველოს, როგორც სახელმწიფოს, საქართველოს სახელმწიფოს, რომელსაც ჰყავს მთავრობა, მთავრობას, რომელსაც ჰყავს წარმომადგენლები. ეს არის საქართველოს სახელმწიფოს წინააღმდეგ ქმედებები, რასაც ჩადიან, როგორც ქვეყნის შიგნით გარკვეული ძალები, ასევე მათ ზურგს უმაგრებს გარკვეული ძალები ქვეყნის გარეთ. ამ ქმედებების ნაწილია ისიც, რომ ჩემთან შეხვედრები იქნება ეს, საგარეო საქმეთა მინისტრების თუ ელჩების, ყოველთვის არის ასეთი აჟიოტაჟის საგანი, რაც თითქოს ძალიან ჩვეულებრივი სამუშაო პროცესი უნდა იყოს. თუ ჩვენ გვინდა, ვესაუბროთ ევროკავშირს, წარმოუდგენელია, ეს მოხდეს დიალოგის გარეშე, წარმოუდგენელია, რაიმე ურთიერთობები იყოს შეხვედრების გარეშე. ჩვენ არაფერი გვჭირს საიმისო, რომ შეხვედრები გამოვიყენოთ ლეგიტიმაციისთვის. საქართველოს მთავრობას, საქართველოს პარლამენტს ლეგიტიმაცია მისცა ქართველმა ხალხმა, ქართველმა ამომრჩეველმა“, – განაცხადა ბოჭორიშვილმა.
საქართველოს საგარეო უწყების ხელმძღვანელის განცხადებით, „ქართულ ოცნებას“ ლეგიტიმაცია საქართველოს მოქალაქეებმა 26 ოქტომბერს მიანიჭეს.
„შეხვედრით ლეგიტიმაციას ვერც მოვიპოვებთ და არც ვეძებთ, ეს არ არის მიზანი არავისთან შეხვედრის, რომ ლეგიტიმაცია მოვიპოვოთ, ეს ლეგიტიმაცია 26 ოქტომბერს ქართველმა ხალხმა „ქართულ ოცნებას“ მისცა. სწორედ ამის საფუძველზე ჩამოყალიბდა ის მთავრობა, რომელი მთავრობაც დღეს ჰყავს საქართველოს. ასე რომ, ვინმეს მოსწონს თუ არ მოსწონს, იძულებული იქნებიან, რომ შეეგუონ იმ რეალობას, რომელიც არის საქართველოში 26 ოქტომბროს შემდეგ. არის ზოგადად პრობლემა ჩვენი პოლიტიკური სივრცის, რომ ელჩებს პოლიტიკოსები იყენებენ საკუთარი პოლიტიკური მიზნებისთვის. ელჩებს, რომლებიც დიპლომატიური წარმომადგენლები უნდა იყვნენ, რომელთაც აქვთ ძალიან მკაცრად განსაზღვრული წესები და მოქმედების ჩარჩოები, მათ იყენებენ პოლიტიკის საკეთებლად საქართველოში, ეს არ არის წესი, ეს არ არის ნორმა, ასე არ ხდება სხვაგან და არ უნდა ხდებოდეს არც საქართველოში“, – განაცხადა ბოჭორიშვილმა.
ცნობისთვის, საქართველოს საგარეო საქმეთა მინისტრი მაკა ბოჭორიშვილი საქართველოში ევროკავშირის ელჩს, პაველ ჰერჩინსკის 9 დეკემბერს შეხვდა. შეხვედრის შემდეგ ელჩის მიმართ კრიტიკული განცხადებები გაკეთდა. პაველ ჰერჩინსკი გააკრიტიკა ლიეტუვის სეიმის საგარეო ურთიერთობათა კომიტეტის თავმჯდომარემ, ჟიგიმანტას პავილიონისმა, ასევე ლატვიელმა ევროპარლამენტარმა, რიჰარდს კოლსმა.
