ლამარა (ეკა) კობიძე 5 წელია ტაქსაობს. ღია წერილში, რომელიც მან თბილისის მერს, კახი კალაძეს მისწერა, მერიის ინიციატივაზე და არსებულ პრობლემებზე წერს:
“5 წელია ვტაქსაობ. არ ვიცი ტაქსისტების რა ჯგუფი შეხვდა მერს. პირადად მე ასე ვფიქრობ:
1) ავტომობილის შეცვლა გახდა საჭირო, მარჯვენა საჭიანი მარცხენათი, ტაქსისტების უმეტესობას კი ამის თანხა არ აქვთ. ამიტომ დაიწყო: ბანკი, ავტოლიზინგი, კერძო პირებისგან მანქანების ქირაობა, რაც ორმაგი ან მეტი თანხა ჯდება.
ინტერნეტში შებრძანდით და თავად ნახავთ კოსმოსურ ფასებს _ კაბალური პირობებია. თეთრი ფერის მანქანები კი გაცილებით ძვირი გახდა (კომპანიის მანქანით მუშაობა კატასტროფაა, ყოველდღიური გადასახადი შეადგენს 40-45-50 ლარს, იქ საწვავი და რაღა გამოდის).
მახსოვს შეპირება ტაქსისტებისთვის იაფიანი სესხის თაობაზე _ დავრჩით გაღიმებულნი.
2) თვენახევრის წინ გავიარე ტექდათვალიერება. ახლა ისევ უნდა გავიარო. ეტყობა, მუთაქებში ოხრად ფული მაქვს და…
ტექდათვალიერება კარგია მაგრამ წელიწადში ერთხელ, მანამდე სანამ თავად მერია არ მოაგვარებს თბილისის ქუჩების პრობლემებს!!! სავალალო მდგომარეობაა _ წამობრძანდით ქალაქში, 5-6 საათში მოგატარებთ თბილისს და თავად დარწმუნდებით.
გზებიააა, ოი დედა, სულ ხტუნვა-ხტუნვით (ან ტანცი-მანცით) დავდივართ არა მარცხენა ზოლში, სადაც თქვენ დაბრძანდებით, არამედ მარჯვენა ზოლში, სადაც ტაქსები დადიან მგზავრების ასაყვანად. დაკერებული ორმოები უფრო უარესია და მასზე გავლა არანაკლებ ზიანს მიაყენებს მანქანას…
ქალაქის გზების დახაზვა ხო საერთოდ საოცრებაა. ელემენტარულია, ზებრასაც კი ვერ ნახავთ მთელს, მკრთალია და თითქმის წაშლილია (პეკინისა და რამდენიმე ცენტრალური ქუჩის გარდა). სავალ ზოლებზე ხომ აღარც ვსაუბრობ. გული მიკვდება ამხელა ხარჯს წევს სახელმწიფო და რა? ერთი წვიმა და ფაფუ, აღარაა, მგონია რომ ცარცით იხაზება,იაფფასიან საღებავს ხმარობენ. მრცხვენია, ესაა ევროსტანდარტები _ გზებზე და მათ მოხაზვებზე ფულს ჭრიან და ასე სახემწიფოც იძარცვება.
განათება, ეს უკვე სხვა განზომილებაა … ხილვადობა კატასტროფულია, ალბათ ასევე დაბალი ხარისხის ნათურებს იყენებენ …. ვინ ამოწმებს? ვინ აკონტროლებს? იქნებ ლამპიონების ცოტა დაბლა დაწევა ან ფორმის შეცვლა მოხდეს ეტაპობრივად. ასეთი ათასი წვრილმანია, რომელსაც დიდი ზეგავლენა აქვს. მისახედია ჩვენი ლამაზი ქალაქი.
3) ტაქსებისთვის გამოყოფილი სადგომები _ სანაგვე ურნები დგას (მაგალითად პეკინის დასაწყისში), დაცვის მანქანები, ისე ავტომანქანები, ტაქსის ადგილი სადააა?
ასფალტით დაგებული ბარდიული, ოხოხოო, არ ჩანს, ზოგიერთის სიმაღლეა _ მტრისას.
პირველ ოქტომბრამდე ავიღე ლიცენზია, მყავდა მარჯვენა საჭიანი მანქანა, რომელიც გავყიდე 600$-ად (ჩემი ჭიჭიკო). იგი თებერვალში მარცხენა საჭიანი მანქანით შევცვალე და ჰოი საოცრება _ ამ ახალ მანქანაზე იმის ნაცვლად, რომ ჩემს მოქმედ ლიცენზიაში რაღაც სიმბოლური თანხა გადამეხადა (20-30 ლარი), ვინაიდან მანქანა შევცვალე ,როგორც უკვე ლიცენზირებულმა ტაქსისტმა 1 წელიწადზე უფრო ნაკლებ ვადაში, მომიწია ტაქსის ლიცენზიის სრულად ახლიდან შეძენა. თუმცა, მძღოლი იგივე ვარ, შეიცვალა მხოლოდ მანქანა. ერთდროულად ორ მანქანას ვმართავდი?
ამას არ მოველოდი. თეთრი ფერის მანქანა არ შევიძინე, რადგან გაცილებით ძვირი ჯდებოდა.
4) მივესალმები ფერთან დაკავშირებული პრობლემის გადაკვრით მოგვარებასა და მის დაფინანსებას.
5) და ასე შემდეგ… ეს მხოლოდ ისაა, რაც ახლა გამახსენდა, თუმცა კიდევ ბევრია.
ვარ დამოუკიდებელი ტაქსისტი. შალიკოს დაკრულზე არ დავდივარ.
1-2 ჭკვიანური რამ შეიძლება ვთქვა და რჩევაც მოგცეთ. მაგალითად:
ნაძალადევზე, პატარა ბაზართან, ახალი შუქნიშნის დადგმის შემდეგ, გამტარიანობა შეიზღუდა. ამიტომ, შუქნიშნიდან მეტროს მიმართულებით, დაახლოებით 60-80 მეტრი პარკინგი მოისპოს. ამით განიტვირთება ეგ მონაკვეთი;
ღრმაღელის მეტროსთან, ავტობუსის გაჩერებიდან შუქნიშნამდე მოიხსნას ავტოსადგომი და სანაგვე ურნები გადაიწიოს სადმე სხვაგან, რათა მანქანებმა 4 მწკრივში იმოძრაონ, გლდანის მიმართულებით;
და მრავალი სხვა დაკვირვება შეგვიძლია გაგიზიაროთ მძღოლებმა. სხვა ამ წუთას არ მახსენდება.
პ.ს. ტაქსისტების ყოველდღიური ხარჯი ფრიად გაიზარდა. ჩვენს უკან დგანან ოჯახები. იძულებულნი ვართ ყოველ დღე, ავია თუ დარია, გვცივა თუ გვშია, გვილხინს თუ გვიჭირს, ავად ვართ თუ კარგად, გამოვიდეთ და ვიშოვოთ პური ჩვენი არსობისა.
უმრავლესობა ტაქსისტებისა არავის არ ვაწუხებთ. ჩვენი უმუშევრობა ფაქტობრივად სიკვდილის ტოლფასია”, _ აღნიშნულია ლამარა (ეკა) კობიძის მიერ გამოქვეყნებულ წერილში.
