მამაკაცი, რომელმაც ქალს სილა გააწნა, გაამართლეს. ის დაკავებული იყო სისხლის სამართლის კოდექსის 126-ე მუხლის პირველი ნაწილით, რაც ცემას გულისხმობს.
,,ცემად ვერ შეფასდება ერთი დარტყმა, თუნდაც მან ფიზიკური ტკივილი გამოიწვიოს. ერთჯერადი დარტყმა უნდა ჩაითვალოს სხვაგვარ ძალადობად, რაც მართალია არ ცვლის ქმედების კვალიფიკაციას – ცემას, თუმცა ცვლის ბრალდების ფორმულირებას,” – აღნიშნულია უზენაესი სასამართლოს გადაწყვეტილებაში, რომელიც 2024 წლის 1 ივლისს უზენაესი სასამართლოს მოსამართლეებმა ლალი ფაფიაშვილმა, შალვა თადუმაძემ და ვასაძემ მიიღეს.
ქალსა და მამაკაცს შორის კონფლიქტი ბათუმში მოხდა. აღნიშნულ საქმეზე პროკურორი იყო ბათუმის პროკურატურის პროკურორი აკაკი მოქერია, შემდეგ პროკურორის მოადგილე ალექსანდრე ძირკვაძე.
ბათუმის საქალაქო სასამართლოს 2023 წლის 6 ივლისის განაჩენით: ბრალდებული ხ. ზ–ი ცნობილ იქნა უდანაშაულოდ და გამართლდა საქართველოს სსკ-ის 126-ე მუხლის პირველი ნაწილით წარდგენილ ბრალდებაში; გამართლებულ ხ. ზ–ს განემარტა მიყენებული ზიანის ანაზღაურების უფლების შესახებ.
ბათუმის საქალაქო სასამართლოს 2023 წლის 6 ივლისის განაჩენი სააპელაციო წესით გაასაჩივრა ბათუმის რაიონული პროკურატურის პროკურორმა აკაკი მოქერიამ და მოითხოვა ხ. ზ–ს დამნაშავედ ცნობა საქართველოს სსკ-ის 126-ე მუხლის პირველი ნაწილით გათვალისწინებული დანაშაულის ჩადენისათვის და მისთვის მკაცრი სასჯელის დანიშვნა.
გამართლებულ ხ. ზ–ს ინტერესების დამცველმა ადვოკატმა ე. მ–მ მოითხოვა ბათუმის საქალაქო სასამართლოს 2022 წლის 6 ივლისის განაჩენის უცვლელად დატოვება.
ქუთაისის სააპელაციო სასამართლოს 2023 წლის 10 ნოემბრის განაჩენით სააპელაციო საჩივარი არ დაკმაყოფილდა და ბათუმის საქალაქო სასამართლოს 2023 წლის 6 ივლისის განაჩენი დარჩა უცვლელად.
ქუთაისის სააპელაციო სასამართლოს 2023 წლის 10 ნოემბრის განაჩენი საკასაციო წესით გაასაჩივრა ბრალდების მხარემ. ბათუმის რაიონული პროკურორის მოადგილე ალექსანდრე ძირკვაძე ითხოვდა ხ. ზ–ს დამნაშავედ ცნობას.
სასამართლოს აზრით, ცემა გულისხმობს სხვა პირის სხეულზე ერთდროულად რამდენიმე დარტყმას, რომელიც დაზარალებულის ფიზიკურ ტკივილს იწვევს.
როგორც ვხედავთ, ჯერ ბათუმის სასამართლომ, შემდეგ ქუთაისის სააპელაციო სასამართლომ სილის გარტყმა არ შეაფასა ისეთ ქმედებად, რამაც შეიძლება ფიზიკური ტკივილი გამოიწვიოს. მამაკაცის მხრიდან თავდასხმა კი საერთოდ გამორიცხა.
მაშინ, როცა 2024 წლის 11 დეკემბერს, საპროტესტო სტიკერის გაკვრის გამო ადმინისტრაციულად დაკავების, რამდენიმე საათის შემდეგ გათავისუფლების და გათავისუფლებიდან რამდენიმე წუთში, სამმართველოს ჭიშკართან პოლიციის უფროსის მხრიდან შეურაცხყოფისა და ღირსების შემლახავი მოპყრობის საპასუხოდ სილის გაწვნის გამო ,,ბათუმელებისა” და ,,ნეტგაზეთის” მენეჯერს, მზია ამაღლობელს 4-დან 7 წლამდე პატიმრობა ემუქრება.
ნეტგაზეთი/ბათუმელების თანადამფუძნებელი და დირექტორი, მზია ამაღლობელი 11 იანვარს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა “იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება.
წყარო: qartli.ge
