გუშინ, საქართველოს ეროვნული გუნდისა და „ვალენსიას“ კარის დარაჯი გიორგი მამარდაშვილი მადრიდის „ატლეტიკოს“ სერიოზულად დაუკავშირეს. ინფორმაცია ესპანურ მასმედიაში გავრცელდა:
„ბოლო პერიოდში ხშირად იწერება იმის შესახებ, რომ ხორვატიის ნაკრების მეკარე, დომინიკ ლივაკოვიჩი, რომელიც მადრიდის „ატლეტიკოს“ ერთ-ერთი სამიზნე იყო, „ვილიარეალში“ გადასვლას უახლოვდება, რაც ნიშნავს იმას, რომ მადრიდული კლუბის მთავარ სამიზნედ ქართველი მეკარე, გიორგი მამარდაშვილი რჩება.
ქართველი მეკარე ერთადერთია „ვალენსიას“ შემადგენლობაში, რომელიც ამ კლუბის დახსნას ახერხებს. გუნდისთვის ბიუჯეტის გაზრდის მიზნით, 22 წლის მეკარის გაყიდვა გუნდის მფლობელის, პიტერ ლიმის ერთ-ერთი მთავარი მიზანია.
მას შემდეგ, რაც ობლაკი გუნდს დატოვებს, „ატლეტიკოს“ დასჭირდება მეკარე, რომელიც გუნდში გარანტირებულად იქნება ხუთი წლის განმავლობაში. მამარდაშვილის ფასი „ატლეტიკოს“ ხარჯებს ერგება და თავად ქართველიც არ იქნება უარზე კარიერაში ახალი, უფრო დიდი ნაბიჯის გადადგმაზე. მიუხედავად იმისა, რომ მას „ვალენსიასთან“ კონტრაქტი 2027 წლამდე აკავშირებს, „ატლეტიკო“ მასში დაახლოებით 30 მილიონს გადაიხდის და „ვალენსია“ არ უნდა დარჩეს უკმაყოფილო ამ შეთავაზებით“.
„ნაპოლისა“ და „მილანის“ მატჩის დაწყების წინ, ყველასათვის მოულოდნელად მოედანზე „CBS Sports Golazo“-ს ჟურნალისტებთან ახლო წარსულში ცნობილი ქართველი კალათბურთელი ზაზა ფაჩულია გამოჩნდა, რომელმაც ხვიჩა კვარაცხელიას შესახებ ისაუბრა.
„სან-ფრანსისკოდან აქ ჩამოვფრინდი, რათა კვარასთვის მხარი დამეჭირა, ქართველი სუპერვარსკვლავისთვის, რომელიც მთელს ქვეყანას ასახელებს. ასეთი ფეხბურთელის ყოლა ჩვენნაირი პატარა ქვეყნისთვის ძალიან ბევრს ნიშნავს. ძალიან ამაყი ვარ.
სტადიონზე ძალიან ბევრი ქართული დროშა ფრიალებს და ვხუმრობდი კიდეც, რომ ნახევარი ქვეყანა აქ არის. როდესაც მე კალათბურთს ვთამაშობდი, „ყველა ვარსკვლავის“ მატჩში მონაწილეობის მისაღებ გამოკითხვაში 1.5 მილიონი ხმა მივიღე, ასე რომ ეს ყველაფერი არ მიკვირს. ქართველებს უყვართ ფეხბურთი და ასეთი ფეხბურთელის ყოლის დროს, რა თქმა უნდა, მთელი ქვეყანა მის გვერდითაა“, – განაცხადა ზაზა ფაჩულიამ.
მატჩის შემდგომ, გაჩულიამ კვარაცხელიასთან ერთად ფოტოც გადაიღო:
„ამ ახალგაზრდა ადამიანს ნათელი მომავალი აქვს. განაგრძეთ მისი ბრწყინვალება, სანამ ამ მოგზაურობით სიამოვნებას იღებთ. შენით ვამაყობ, ძმაო“, – დაწერა ქართველმა ცენტრმა საკუთარ სოციალური მედიის გვერდზე.
სამწუხაროდ ფაჩულიას „მარადონაზე“ სტუმრობა ხვიჩა კვარაცხელიასა და „ნაპოლისთვის“ წარუმატებელი გამოდგა, რადგან გუნდი მეტოქესთან 0:4 განადგურდა.
ამ მტკივნეული მარცხის შემდეგ „ნაპოლის“ მთავარმა მწვრთნელმა ლუჩანო სპალეტიმ შემდეგი კომენტარი გააკეთა:
„ვერ ვითამაშეთ ისე, როგორც ვიცით. ეს იყო ჩვენს დონეზე ბევრად დაბალი ხარისხის თამაში. „მილანმა“ ძალიან კარგად ითამაშა, მათ თავიანთი შესაძლებლობები აჩვენეს და შექებას იმსახურებენ. კარგად გამოიყენეს სივრცეები, რომელიც ჩვენ მივეცით. ჩვენი დონის დაბლა ვითამაშეთ, მეტი არაფერია სათქმელი. ვერ ვაჩვენეთ ისეთი ხარისხი, როგორსაც ჩვეულებრივ ვაჩვენებთ. ძალიან ბევრი შეცდომა დავუშვით, რაც ასეთ მეტოქესთან ძვირად გიჯდება.
სამწუხაროდ, სანაკრებო პაუზით დავზარალდით, რადგან ბევრი ფეხბურთელი ნაკრებში იყო წასული, ამან რა თქმა უნდა, ჩვენს თამაშზე იმოქმედა. ბიჭები მონდომებული იყვნენ, ისინი ყოველთვის მაქსიმუმს აკეთებენ, მაგრამ უდავოა, რომ ზოგიერთები დაღლილები დაბრუნდნენ.
ახლა წინ უნდა გავიხედოთ და ყველაფერი მშვიდად გავაანალიზოთ. ყველა ამბობდა, რომ ჩემპიონთა ლიგის მეოთხედფინალში „მილანთან“ ფავორიტები ვიყავით, მაგრამ ახლა ალბათ სხვანაირად იტყვიან და ასეთი ხალხის რაოდენობა შემცირდება. ჩემპიონთა ლიგა არის შუქურა, სადაც ყველა მაქსიმუმს გასცემს და ეს ნამდვილად იქნება მატჩი, რომელშიც მაქსიმუმს გავიღებთ“.
უფრო ამაღლებულ განწყობაზე გახლდათ „მილანის“ მთავარი მწვრთნელი სტეფანო პიოლი:
„ეს მხოლოდ პირველი ნაბიჯია, ჩემპიონატში კიდევ ცხრა მატჩი დარჩა, სადაც იგივე დამოკიდებულება უნდა გვქონდეს. კმაყოფილი ვარ მოგებით. 4-მცველიანი ტაქტიკით ვითამაშეთ, რადგან მინდოდა, უკეთ დამეფარა „ნაპოლის“ შეტევა. ეიფორიაში არ უნდა ჩავვარდეთ, ეს შედეგი გავლენას არ მოახდენს ჩემპიონთა ლიგის მატჩებზე, რადგან ეს სხვა თამაშები იქნება სხვა ატმოსფეროში. ორივე ძლიერი გუნდია, რომლებიც ევროპაში კარგად თამაშობენ. ჩემს ფეხბურთელებს ვუთხარი, რომ თუ უნდათ სუპერსეზონი ჰქონდეთ, ჩემპიონთა ლიგაზე „მილანისთვის“ დამახასიათებლად უნდა ითამაშონ.
მხოლოდ ტოპკლუბები ახერხებენ ჩემპიონთა ლიგასა და ჩემპიონატში ერთდროულად კარგად თამაშს. „სერია A“-ში გვქონდა გარკვეული სირთულეები, მაგრამ ახლა სეზონის ფინალურ ნაწილს აქვს მნიშვნელობა. ნათელია, რომ ჩემპიონთა ლიგაზე შედეგი გვაქვს, რაც სერია A-სთვის თავდაჯერებად გვანიჭებს“, – განაცხადა სტეფანო პიოლიმ.
გუშინ, ახლო წარსულში ცნობილმა ესპანელმა მეკარემ, იკერ კასილასმა იტალიურ გამოცემასთან „DAZN“ ჩემპიონთა ლიგის შესახებ საკუთარი მოსაზრება დააფიქსირა.
„ჩემპიონთა ლიგის ფინალი „რეალი“ – „ნაპოლი“ იქნება. ორივე გუნდს რთული გზა აქვს გასავლელი. როდესაც ამ სეზონს ვაანალიზებ, ვხედავ, რომ თავი ყველაზე კარგად „ნაპოლიმ“ წარმოაჩინა და ამიტომ მგონია, რომ ფინალში ისინი გავლენ“.
ჩემპიონთა ლიგის მეოთხედფინალში „ნაპოლი“ „მილანს“ შეხვდება და შემდეგ „ინტერსა“ და „ბენფიკას“ შორის გამარჯვებულს დაუპირისპირდება. „რეალს“ კი „ჩელსის“ წინააღმდეგ მოუწევთ თამაში, საიდანაც „ბაიერნი“ „მანჩესტერ სიტის“ შორის გამარჯვებულს შეხვდებიან.
ავტორი
