პეკინში მიმდინარე ზამთრის ოლიმპიურ თამაშებზე გუშინ სამთო მოთხილამურე ნინო წიკლაურმა იასპარეზა, რომელიც 28 წლის სპორტსმენისათვის რიგით მეოთხე ოლიმპიადა აღმოჩნდა.
ქართველმა გიგანტურ სლალომში პირველ ცდაზე დისტანცია 1:04.49 წუთში დაფარა და 41-ე ადგილზე გავიდა, მეორე ცდაზე კი 1:05.38 წუთით 35-ე იყო. საერთო ჯამში, ნინოს მაჩვენებელი 2:09.87 წუთი იყო, რაც 34-ე მაჩვენებელი აღმოჩნდა.
წიკლაურისთვის საუკეთესო შედეგი 2018 წელს სამხრეთკორეულ პიონჩანში ნაჩვენები 39-ე ადგილი იყო, რომელიც მან სლალომში აჩვენა. გასულ ოლიმპიადაზე გიგანტურ სლალომში ნინო 46-ე გახლდათ.
რამდენიმეთვიანი უქმობის შემდეგ ესპანური „ვალენსიას“ ძირითად შემადგენლობაში კვლავ საქართველოს ეროვნული გუნდის კარის დარაჯი გიორგი მამარდაშვილი ვიხილეთ. „რეალ სოსიედადთან“ შეხვედრაში ქართველი დამაჯერებლად გამოიყურებოდა. მატჩი ფრედ – 0:0 დასრულდა.
თამაშის დასრულების შემდეგ „ვალენსიას“ მთავარმა მწვრთნელმა მამარდაშვილის ღვაწლი სათანადოდ შეაფასა.
„გიორგი კარგი იყო, ცოტა საქმე ჰქონდა, მაგრამ თავი კარგად გაართვა და კმაყოფილი ვარ. მატჩის დღეს გადავწყვეტთ, ვინ იქნება მეკარე, რომელიც ბილბაოს „ატლეტიკთან“ სათასო შეხვედრაში ითამაშებს“, – აღნიშნა ბორდალასმა.
გუშინ ქართველი კარის დარაჯი ესპანურ მასმედიაშიც ახსენეს.
„გიორგიმ სილესენის ტრავმის გამო „რეალ სოსიედადის“ წინააღმდეგ ითამაშა, სამი კარგი სეივი შემოგვთავაზა და მათგან ერთი ისეთი იყო, „მესტალია“ ფეხზე წამოუდგა. აღსანიშნავია ისიც, რომ „ვალენსიასთვის“ ეს ბოლო სამ თვეში „ლა ლიგის“ პირველი მატჩი იყო, რომელშიც გოლი არ გაუშვია. ისიც ნიშანდობლივია, რომ კლუბს „პრიმერაში“ ასეთი სულ 6 მატჩი აქვს და მათგან სამი გიორგიზე მოდის, არადა, ჯამში მხოლოდ 7 მატჩი ჩაატარა. რაც მამარდაშვილმა გუშინ აჩვენა, იმაზე მეტყველებს, რომ მას ნათელი მომავალი აქვს.”
გამოცემა მამარდაშვილის მომავლის შესახებაც წერს.
„გიორგი ბოლო თვეებში ჩუმად მუშაობდა და საკუთარ შანს ელოდა. ამ შანსმა, მართალია, დააგვიანა, მაგრამ მაინც მიიღო და გამოიყენა. იმის ფონზე, რომ მამარდაშვილმა „ლა ლიგის“ საწყის ტურებში მაღალი დონის თამაში აჩვენა, მისი სათადარიგოთა სკამზე დატოვება გაკვირვებას იწვევდა და საჭირო წუთების მისაღებად მეკარესაც წასვლა მოუნდა, მაგრამ ბორდალასმა ქართველი არ გაუშვა, რადგან სურს, გიორგიმ მის თვალწინ ივარჯიშოს, რასაც ერთი მიზანი აქვს – ზაფხულში სილესენზე კლუბი შეთავაზებას თუ მიიღებს, მამარდაშვილი „ვალენსიას“ პირველი მეკარე გახდება.
გასულ კვირაში მთავარი მწვრთნელი გიორგის სწორედ ამ საკითხებზე ესაუბრა და სათამაშო დროის მიცემას დაჰპირდა. მართალია, შეთანხმების მიხედვით, ქართველს „კოპაზე“ უნდა ეთამაშა, მაგრამ ბორდალასმა ის „ლა ლიგის“ მატჩში დააყენა. მიუხედავად კარგი თამაშისა, მამარდაშვილმა იცის, რომ სილესენი მალე დაბრუნდება და კარში ისევ ნიდერლანდელი ჩადგება, თუმცა მომავალი უფრო ოპტიმისტური გახდა.“
უახლოეს მომავალში საქართველოს ეროვნულ პირველობაზე კიდევ ერთ უცხოელ საფეხბურთო მწვრთნელს ვიხილავთ.
უკრაინული გამოცემა „Sportarena“-ს მტკიცებით 43 წლის უკრაინელი სპეციალისტი სერგეი ლიტოვჩენკო შესაძლოა, საქართველოს ჩემპიონატის „ლიგა 2“-ის გუნდ თბილისის „შევარდენის“ მთავარი მწვრთნელი გახდეს. მხარეებს შორის შეთანხმება თითქმის მიღწეულია და უკრაინელი სპეციალისტი დედაქალაქურ გუნდს მალე ჩაიბარებს.
ლიტოვჩენკო მიმდინარე სეზონში დონეცკის „ოლიმპიკს“ ედგა სათავეში. ლიტოვჩენკო ასევე მუშაობდა კიევის „არსენალში“, „რუბიკონში“, ბელარუსულ „დნეპრსა“ და სომხეთის „ლოკომოტივში“.
თბილისის „შევარდენი“ „ლიგა 2“-ში თამაშობს. გასული სეზონი გუნდმა მე-6 საფეხურზე დაასრულა.
ცნობილია რომ არგენტინელი ფეხბურთის სპეციალისტი მაურისიო პოჩეტინო მიმდინარე წლის ზაფხულში ფრანგულ „პარი სენ ჟერმენს“ დატოვებს და მის ნაცვლად გუნდს ზინედინ ზიდანი ჩაიბარებს. თუ ფრანგი სპეციალისტი „პსჟ“-სათავეში ჩაუდგება, მაშინ გუნდში კრიშტიანო რონალდოს მოყვანას შეეცდება.
გამოცემა „Daily Mirror“-ის მტკიცებით, ზიდანი მომავალ ზაფხულს გუნდს აუცილებლად ჩაიბარებს, ამ ყველაფრის შემდეგ კი პირველ რიგში რონალდოს მოყვანას აპირებს.
საინტერესოა რომ თავის მხრივ, პოჩეტინოს სამსახურით რონალდოს ამჟამინდელი გუნდი „მანჩესტერ იუნაიტედი“ ინტერესდება.
გუშინ ცნობილი გახდა რომ მიუნჰენის „ბაიერნს“ კარის დარაჯი მანუელ ნოიერი გამოაკლდა, რომელსაც მუხლის სახსარზე ოპერაცია გაუკეთდა.
35 წლის მეკარე მოედანზე 6 კვირის განმავლობაში ვერ გავა, რაც იმას ნიშნავს, რომ ჩემპიონთა ლიგის მერვედფინალურ ეტაპზე გუნდს ვერ დაეხმარება.
მიმდინარე სეზონში გერმანელმა ფეხბურთელმა ყველა ტურნირზე 28 მატჩი ჩაატარა, მთლიანობაში კი „ბაიერნის“ მაისურით 2011 წლიდან დღემდე 462-ჯერ აქვს ნათამაშები.
[sexy_author_bio]
