“უხელფასოდ თამაში ძალიან ძნელია, მიუხედავად იმისა, რომ ძალიან მიყვარს ფეხბურთი. “მერცხალში“ უფულოდ თამაში სტიმულს მიკარგავს. ყველა კლუბს ეხმარება მუნიციპალიტეტის ხელმძღვანელობა და კარგი იქნება, აქაც რომ გამოინახოს თანხები.
ყველას ოჯახი გვყავს, ბანკები, სესხები… ფეხბურთი ჩვენი სპეციალობაა და უხელფასოდ სირბილი და ვარჯიში სიცივესა და სიცხეში, წარმოუდგენელია. ჩვენ მოგვიყვანეს 5 თვის სტაბილური ხელფასის გარანტიით, მაგრამ არც ისეა საქმე, როგორც ჩანს“, _ ეს ოზურგეთის „მერცხალის“ ფეხბურთელების ერთი ნაწილის მოსაზრებაა, რომელიც წელს, კლუბის ერთ-ერთ კრებაზე დააფიქსირეს.
“მერცხალის“ ხელფასების თემაზე კომენტარი ოზურგეთის მუნიციპალიტეტის მერის პირველ მოადგილეს ალექსანდრე სურგულაძეს ვთხოვეთ:
„ეს პრობლემა ცნობილი პრობლემაა და ვმუშაობთ, რომ როგორმე მოგვარდეს ეს საკითხი. ყველა ა(ა)იპ–ს საკუთარი ბიუჯეტი აქვს. “მერცხალის“ დამტკიცებულ ბიუჯეტში რაღაც გაუგებრობაა და ახლა ვცდილობთ, გავარკვიოთ, რა ხდება. ველოდები წინადადებებს და განმარტებებს კლუბის წარმომადგენლებისგან. კონკრეტულად არ ვიცი დეტალების, თუმცა, მალე მეცოდინება.
“მერცხალში“ პრობლემების კომპლექსია და მიმდინარეობს საკითხების შესწავლა. სამოყვარულო კლუბია და ვნახოთ, რა გადაწყდება ხელფასებთან დაკავშირებით. ფეხბურთის განვითარების ფონდიდან ხდება პრემიების გაცემა, თუმცა, ეს თანხა სისტემატურად არ მოდის, თან გუნდს ჩემპიონატში ცუდი მაჩვენებელი აქვს“, _ გვითხრა ალექსანდრე სურგულაძემ.
სურგულაძემ დაადასტურა, რომ “მერცხალში“ შიდა აუდიტი შევიდა:
“არის რაღაც პრობლემები. მურთაზ აბაშიძე არ ასახელებს ვინაობას, მაგრამ საუბრობს შიდა დაპირისპირებაზე და არ მიუთითებს, ვისი ბრალია ეს დაპირისპირება აუდიტი შესულია “მერცხალში“ და მუშაობს“, _ აღნიშნა ჩვენთან საუბრისას სურგულაძემ.
“ხელისუფლებაში ბალაგანია… ვინც სამტრედიაში რკინიგზა გადაკეტა, ის ახლა პარლამენტშია“ (საუბარია ზვიად ძიძიგურზე) _ აბაშიძის მხრიდან ეს იყო „მერცხალში“ არსებული სიტუაციის პოლიტიკური შეფასება. სულ იმაზე აქვს აქცენტი, რუსები უნდა მოვიდნენ და ათასი მსგავსი მოსაზრებები აქვს. მიუხედავად იმისა, რომ პოლიტიკური პარტიის თავმჯდომარე ვარ ოზურგეთში, სამსახურში პოლიტიკაზე არ ვსაუბრობ.
მურთაზ აბაშიძე არც მალავს, რომ ამ ხელისუფლების მოწინააღმდეგეთა ბანაკშია და რომ ოზურგეთში სწორედ ამ ბანაკის წევრებმა გაიმარჯვეს. ამას ის გამოხატავს ღიად, საჯაროდ და ყოვლად უხამსი სიტყვებით მოიხსენიებს საქართველოს პარლამენტის წევრებს. ეს არის პროვოკაციული, მიზანმიმართული ქმედება მისი მხრიდან, რადგან პასუხის მოთხოვნის შემთხვევაში, ისევ მოისხას “წამებულის მანტია“, _ ეს კომენტარი “გურია ნიუსთან“ კლუბის დირექტორმა მამუკამ გოგუაძემ გააკეთა. როგორც ის ამბობს, ეს პოლიტიკური განცხადებები ერთ-ერთ კრებაზე გაკეთდა.
ალექსანდრე სურგულაძე ამ შეხვედრას ესწრებოდა, მაგრამ ამბობს, რომ პოლიტიკური განცხადებები არ მოუსმენია:
“ასეთი რამ მე არ მახსენდება. სიმართლე გითხრათ, პოლიტიკური დაპირისპირების შესახებ არაფერი ვიცი. იმ კრებაზე მსგავსი მე არ მსმენია და არ ვიცი, სხვაგან ვინ რას ლაპარაკობს. შეიძლება თქვა რომელიღაც შეხვედრაზე, მაგრამ მაგ შეხვედრას მე არ ვესწრებოდი“, _ თქვა ალექსანდრემ სურგულაძემ.
ჩვენ, ასევე, ვესაუბრეთ “მერცხალის“ ბუღალტერს ლია ანდღულაძეს და ვკითხეთ, ერიცხებოდა თუ არა ფეხბურთელების ნაწილს სამი თვის მანძილზე ხელფასები ადგილობრივი ბიუჯეტიდან:
“ხელფასები ერიცხებოდათ, მაგრამ ეს იყო მხოლოდ სამი თვის განმავლობაში. მოხდა ფეხბურთელების წახალისება და მათ უნდა დაედოთ შედეგი. სამწუხაროდ, ეს არ მოხდა და ახლა რა იქნება, არაფერი ვიცი“, _ გვითხრა ლია ანდღულაძემ.
როგორც “გურია ნიუსმა“ გაარკვია, ოზურგეთის მუნიციპალიტეტის მერის მოადგილეები “მერცხალის“ წარმომადგენლებს შეხვდნენ.
“მოხდა სიტყვიერი შეთანხმება და მე მივხედავ სტადიონს. 4 ჰექტარი მიწის ნაკვეთია და მივხედავთ, როგორც საჭიროა; მამუკა გოგუაძე მიხედავს კლუბს. მე კიდევ ერთხელ ვამბობ, რომ მსურს და მინდა “მერცხალი“ საუკეთესო გუნდებს შორის იყოს. ვნახოთ, რა მოხდება“, _ გვითხრას ოზურგეთის სტადიონის გენერალურმა დირექტორმა მურთაზ აბაშიძემ.
ინფორმაციას მერი მოადგილეებთან შეხვედრის შესახებ ადასტურებს მამუკა გოგუაძე და ამბობს, რომ ფეხბურთელებმა ვარჯიში გააგრძელეს:
“ეს არის ახალი თაობა, რომლებიც მეორე წრეში შეეცდებიან, უკეთესი შედეგი დადონ. როგორც ცნობილია, ახლა შიდა აუდიტია შემოსული კლუბში და ამ წუთებში მათ კითხვებს ვპასუხობ“, _ გვითხრა მამუკამ გოგუაძემ.
კითხვაზე _ ექნებათ თუ არა ხელფასები ფეხბურთელებს, მამუკა გოგუაძე გვპასუხობს, რომ ბიუჯეტიდან ხელფასები არ გაიცემა:
“ამ დროისთვის გარკვეულია ის, რომ ფეხბურთელები, მოგების შემთხვევაში, მიიღებენ პრემიას ფეხბურთის განვითარების ფონდიდან. რაც შეეხება ბიუჯეტიდან ხელფასის გაცემას, ეს არ მოხდება, რადგან ეს არაკანონიერია. ამჟამად მეტ კომენტარს ვერ გავაკეთებ“, _ თქვა მამუკამ გოგუაძემ.
